السلام عليكم جميعا
القصة باختصار أني اضعت شريطين فديو سقطت من شنطة الأهل بانترلاكن وما فقدناها إلا بعد رجوعنا للوطن بفترة يوم جينا نتفرج عليها
حيث بحثنا فوجدنا ان هناك شريطين ناقصة فقالوا لي الأهل يمكن انها طاحت مني يوم طحت بانترلاكن والشنطة طارت من يدي
فقلت لها حصل خير ما باليد حيلة وطبعا بعد عتاب على عدم تفقدها الشنطة جيدا بعد الطيحة لكن خلاص الامر انتهى
وبعد مرور شهور
مرة وانا قاعد متحسر على هالاشرطة والغيرة تاكلني جاء في بالي شئ ... قال تتوقع لو راسلتهم ممكن تلاقيها ؟
طبعا على طول قلت هذا الشئ عاد لو اننا في زمن الصحابة مو في هالزمن وبعدين الشغلة اشرطة تصوير مو شئ محرز
والحقيقة حسيت اني تافه لو راسلتهم عشان اشرطة وقالوا لي اسفين مابقي الا ندور على اشرطة وايش طيحتوا
ولك وجه تسال عن شريطين فديو ممكن اقرب واحد يشيلها يرميها او ياخذها والله لو انك تسال عن مليون ضاع منك
والحقيقة قلت خليني اراسلهم انا وش خسران كلها كلمتين بالايميل وانا جالس لقيتوها ولا لأ ؟
واقسم بالله اني متأكد بنسبة 200% ان الإجابة بتجيني بالرفض
لكن غيرتي لأن فيها صور أهلي هي اللي دفعتني للسؤال حتى ما يأنبني ضميري
وكمان شئ في نفسي قال لي شوف امانتهم وين وصلت ؟ و القصص اللي تخلي سويسرا وكانها بلد الملائكة
ولكن جاءتني الإجابة كالصاعقة ... موجودة وبالحفظ والصون و سنرسلها لك فورا ....!!!!
اقسم بالله مادري ايش المشاعر اللي اجتاحتني في تلك اللحظة احس ابغى ابكي من أخلاقهم وأمانتهم ... ايش هذا احنا فين عايشين ؟؟؟
حسيت بأن سؤالي لم يكن تافه كما كنت اعتقد وان الخصوصية لها قيمة عندهم والا ماشالوا اشيائي ورفعوها لحين اتصالي بهم وبعد مدة طويلة
وطبعا رجعت ثاني يوم راسلتهم وبعد كلمات الشكر اللي عجزت وانا احاول اوصلهم مشاعري و قلت لهم طيب عطوني رقم حسابكم عشان احولكم قيمة الشحن
قالوا الاشرطة خلاص راحت للبريد من امس وبتوصلك في ظرف خلال ايام ومانبغى منك شئ
طبعا الأشرطة كانت موجودة بكيس تغليف امن للحماية من الكسر و موضوعة بداخل الظرف
وبالمقابل طبعا حصل عندنا مالم يكن بالحسبان
طبعا وصل البريد ولقيت الظرف اللي فيه الاشرطة مقطع وفيه شريط طايح من داخله والاخر بالداخل و الخرابة هذي كلها حاطينها بكيس نايلون
واكتشفت انها بعد ما وصلت هنا عندنا قطعوا الظرف وطلعوا الاشرطة والظاهر تفرجوا عليها وبعدين رموها كلها بكيس حق اللحمة مقاس 14 وغلفوه من الطرف وجابوها لي
بس وسلامتكم