السلام عليكم ورحمة الله وبركاته
كل عام وانتم بخير
ومن العايدين الفايزين
وتقبل الله منا ومنكم صالح الاعمال
الصراحه براحه والبراحه ارض فاضيه والارض تقدر تستغلها وتبني لك بيت فيها او شقق للاستثمار يعني او استراحه اللي تبي انت مخير
او تخليها ومع الوقت يزيد سعرها انا اعرف ناس جاهم مكسب 200% وناس 500% والله العظيم اني صادق:suprise:
اقولك والله العظيم وتميل خشتك
اصلاً خشتك مايله بدون ما تميلها
وش معنى خشتك
(خشتك يعني كشرتك)
وش معنى كشرتك
:112:
الحين هذا اللي قاعد ياكل وين ياكل معه:36_11_15:
اللي ياكل بطاطس
لا اللي ياكل فجل
هاهاهاها هذا ياكل بطاطس مب فجل:36_1_19:
طيب يا ذكي وش اسمه
اسمها بطاطس
بطاطس ليز
يا غبي يا مغفل الحين اسألك وين ياكل معه وتقول بطاطس ليز انت وخشتك
وش معنى خشتك
(خشتك يعني كشرتك)
وش معنى كشرتك
اقول قم اطلع برا
والله اتوب
اطلع برا
والله آخر مره
انا لله وانا اليه لراجعون كلها من الصراحه ما جابت الا وجع الراس ما عاد نبي الصراحه
المهم بدون الصراحه(شوفو احذفو بدون بس لا يدري ابو خشه مايله)هالمنتدى ما ادري وش اقول عنه وش اقول والله لأ شق فنيلتي
والله ما تشقها
وخر والله لأشقها علشان هالمنتدى
والله ما تشقها انا اشقها عنك
ليش تشقها :36_1_18:
انت تقول والله لأشقها قلت انا اشقها عنك يمكن ترضى عني بعد ما عصبتبك
انا اكذب ما ابي اشقها بس بغيت اعبر عن حماسي حرام عليك فنيلتي جديده هاذي اول لبسه
تلعب على الناس يا نصاب يا كذاب
من الكذاب
آسف
من الكذاب قم اطلع برا
لا تكفى
اقول اطلع برا
مصدق انت انا متندم اني رجعت اول مره من زينك ومن زين جلستك حر وموت حتى المروحه مب عندك
بس قبل ما امشي حبيت اقولك ان هاذي بوابة استفسارات مب بوابة خفت دم انت وخشتك
والله انك صادق معليش اعذروني بأبدا بجد
انا الصراحه دقيقه ابو خشه مايله تو قال انت وخشتك يعني يستهبل علي من اليوم تكفون اسمحولي بلحق عليه قبل ما يروح
اقول تعال انت بتسأل ولا نمشي
تمشون إلا هذي
بس قبل ما أسأل بقولكم قصت حياتي تحملوني
طيب قبل قصة حياتك وش سالفة الحرمة اللي في العنوان
جايكم بالسالفة بس اصبروا
بإختصار اناكنت ناوي اسافر لأسبانيا في شهر11 الجاي سألت احد الزملا ء ودلني على مكتب سياحي في الرياض استقبلني صاحب المكتب بكل تقدير واحترام الله يجزاه خير حتى اني توقعت انه بخلي السفره على حسابه
واتفقت معه على الموعد للحجز وقال ارد عليك بعد اسبوعين
طلعت من عنده ورحت للبيت وقلت في نفسي ليش ما اسأل في النت عن اسبانيا وافتح قوقل واكتب عبارة ما اذكرها بس المهم انها سؤال عن اسبانيا وارعص على بحث واختار اول عنوان وتفتح الصفحه على العرب المسافرون
العرب المسافرون والله مب غريب علي هالاسم قد سمعت به الا والله دايم اسمع به مع الناس
المهم دخلت على بوابة اسبانيا واقلب فيها بس ما اعجبتني لان اغلب اللي فيها قصور قديمه وآثار واشياء ما تهمني
طلعت منها وقمت الف على البوابات اللين طحت في بوابة النمسا وصدق انها ديره ما لها مثيل وخصوصاً الطبيعة لأن هذا اهتمامي انا والمدام و قلت مالك الا النمسا
وقررت ان الرحله تكون في شهر 4 الجاي لان اللي فهمته ان الجو يزين من شهر اربعه يعني يذوب الثلج وتبين الطبيعه والخضار وما يكون فيه برد (ارجو تصحيح المعلومه إذا كانت خطأ)
الرحله لمدة 15 يوم تبدأ بميونخ علشان استاجر السيارة منها بدون ما اجلس فيها يعني منها للنمسا ولو تكرمتو تكملون الجدول لي مع الحرص على ان تكون الفنادق بارخص سعر ومهم تكون نضيفه وعادي 3نجوم او نجمتين او بدون والسياره كذلك تكون من نوع عملي ورخيصه
لاكن فيه مشكله عندي وهي الحرمه
وش قصدك المدام
لا
طيب وش تقصد اخلص ترا ملينا
طيب لاتنفخون الحرمه هي اللغة الانجليزية
ننصحك تكنسل السفره
اقول ان شاء الله رايح رايح لو تقولون اللي تقولون
طيب مدامك مقتنع وش تبي داخل هنا
لا انا ابيكم تساعدوني انا جمعت تقريباً كل الخرايط اللي احتاجها في رحلتي وانا بأستاجر سيارة والقارمن موجود يعني خلاص السؤال عن الاماكن ما يحتاج انحل ان شاء الله
منتب سهل يا الذيب
لا يخسي الذيب انا اذكاء منه
لا بجد وش رايكم في كلامي وبالنسبه للفنادق احجز من السعوديه ولا من هناك او يكفي احجز اول يوم والباقي من هناك
واخيرأً احب اني اقول ان هالمنتدى بجد اروع من الرائع ويشكر كل القائمين عليه وما انسى اقول لرجل شرقي يا اخي انت وش اقدر اوصفك به
انت رجل الكرم انت رجل الاخلاق انت رجل التضحيه والله يا بشر لا تلوموني الناس اغلبها تسافر لأجل
الاستجمام والراحه وتنسى كل شي الا هالرجل كل همه وشلون ينفع الناس اللي جايين بعده من هالمنتدى وغيره
يا رجل شرقي قرب راسك هاذي بوسه مني ومن كل واحد استفاد من معلوماتك اللي ما تعد ولا تحصى
وانا ما انسا الاخوان (آخر الفرسان & بيمو & حدي مصر..........................الخ)
واللي ما ذكرت اسمه يعذرني لاني الحس مخي من كثر ما دخلت من تقارير
ولكم كل الشكر تحياتي:x1: