saffron
بالنهدي 12 لصقه ب30 ريال

اخوي زعفران اولا : انا امس شريت لصقات طارد البعوض من احدى صيدليات الرياض , علبه صغيره ب20 ريال وياليتنى خذيت وحده ثانية .
ثانيا : ابشرك ولمت الشناط لكنى ماسكرت سحابهن كل شوى اذكر حاجه واحطها, الا ما قلت لى شريت مظلات للمطر حق مونار ؟ خ , شفت الاغراض ماتقضى . ُ

soaaal
كأن السعر غالي ياسوال ياخوي
الوحدة تطلع بثلاثة ريال إلا
خل الباعوض يعرشن ولا أدفع هالمبلغ

تراميسو6
قولي لي
قصدي قولي لولد أختي ..من أي صيدلية بالضبط ...وأنا أجيب لتس وحدة زود ...فقط ب 25 ريال
أجيبه لكم لوجه الله ..منب آخذ أكثر من 5 ريال
ايه على قولتس ماتخلص الأغراض ههه هذاي كل شوي ناطن للسوق وجايبن شي
لاتنسين خوذوا فيش دولي من ساكو مثلي يبي ينفعكم
المظلات لا ماشريت بس آخذن معي جاكيت مطر ... الصغار مهوب لازم يطلعون بالمطر انا ودي ترخ علي وأصور وهي تمطر ياسلام كم هو شعور جميل
بعدين لو تشرين من هناك أزين شغلانة هالمظلات وان انتفشت وانتم بالمطار فشلتكم بشكل شنطتكم تصير كأنه ناقة مصدومة من اسبوع
على هالتوصيف كأني راعي مزايين
أخبر طيارتكم باتسر
او هي الليلة ؟
موفقين

الفندق مايقصرون فيه مظلات عند الرسبشن( سبيل)
اليوم ماسكة على ( مايقصرون)

درب يرد مايسد
وأنت ماتقصر ولايقصر إلا ردي العزايم
إلا ماودك تصير قصيرنا ؟
ونروح أنا وانت نسافر ونقصر الصلاة
واذا ثوبك طويل قصره
ونشوف قصر عذلة وقصير بن متروك وقصر بن عقيل ونمر على قصر الضيافة
قصر صوتك بالله فيه ناس نايمين
طيب القصرات
قصدي اللصقات وين يلقاهن ولد اختي ..توه جاي من صيدلية القصار قصدي السقاف اللي على مخرج 9 مالقاهن

صبحكم ربي بالخير .. خساره فاتني النقاش المهم .. ان كنتوا كل ماطق بروسكم شي شريتوه وشحنتوه باغراضكم الله يعافيكم لا عاد تسافرون .. اخاف بعدين نصير نجمع لكم عقب خساير الاسهم قصدي السفر
وتبي اقول لك وين شريتهم منه مستعد تحط يدك الثانية وتغطي العنوان .. لانها صيدليه جنب بيتنا ما اذكر حتى اسمها ماهي من المعروفات مثل النهدي والسقاف يعني لا تستقل صيدليه .. لكن انت دور زين الله يهديك العالم لقوها الا انت ترا بيخلصونها عنك .. والمظلات اذا كل الشركات مثل بعض ففي المرتين يكون بسيارتنا مظلات كبيره
ربي يحفظكم وييسر اموركم

munnar..
صبحتس بالنور والسرور...هالحوار الوطني اللي فاتس ههه
خرطن فاضي
يا munnar عاد هذا أشوفه قصدي يشوفه ولد أختي من أهم الأشياء
يقول بأنه حصل بخاخ بس يقول اخاف انه ممنوع بالطيارة
يعني شي مهم ويقول انه يكره الباعوض ولاوده يتضايق منه
قلت له من قال لك ان كيرلا فيها باعوض ؟
قال انا قريت بالنت
قلت وانت تصدق كل شي يكتب بالنت ؟
قال ايه
قلت حتى أنا أصدق كل شي يكتب بالنت
طيب هالحين يبي لي أقعد أدور صيدلية ماتكون من الصيدليات المشهورة وتكون مهيب على شارع تجاري وتكون حول بيوت
ياصغر الرياض عاد كل اللي بوه 3 صيدليات
مير ما اشتهيتي تعلمينن ... ياشين الجحادة ... سبحان الله ... ترى لتس دعوة بظهر الغيب تسيف تحرمين روحتس منه
أو يعني عشان نقول ماشاء الله عليه munnar محتاطة للرحلة
طيب اذا باقي عندكم من هاللواصق شي حطيه لي تكفين عن الراجحي فرع الإزدهار أجي آخذه
على طاري الراجحي الإزدهار ياهو الظهر زحمة يالربع مهيب طبيعية .. وش ذا .. أخذت الورقة أنتظر قال يبي لك 102 دقيقة عشان يجي دورك .. لو اني ابقابل أوباما على هالوقت
وأقوم أسوي ايداع بالمكينة والحمد لله
بس باقي اصرف دولارات قالوا مخرج 14 فيه تحويل الراجحي ...الفلوس بالشقة وكل ماطلعت قلت بس ابرجع وهن مسروقات
المهم تراي مغطي بيدي العنوان من الحين بس علمين
أوتدرين باتسر أفرغ نفسي للدوجة بالصيدليات .. وأبلقاهن ان شاء الله
عافاتس ربي
مع تحيات مميز الباعوض
سفرون بن زعفران آل أبوشيبة

والله العظيم فيه مكاين صراف تصرف دولارات لا تقعدون تحوسون
وفيه للباعوض كريم ايضا بس جربته في رحله ورجعت ناقصه 3 كيلو اكلها الناموس
دور يامال العافيه انت مالك هم هاليومين الا تدور جت على هاذي .. الله يتم رحلتك والجميع بخير عقب هالتعب لو عروس تجهز جهازها كان يمديها خلصت وعلى طاري اليد ترا الموضوع راح وانت للحين حاط يديتك تدري اذا رحت للصيدليه خليه يعطيك كريم فولتارين ليدك وعلى حسابي وتصدق عاد انو باقي عندي من اللصقات بلزق لك الكرتون عند اشارة مخرج على الدايري وما رح اقول لك اي مخرج احراج بس انت على قولتك ذهين بتلقاها