ويـن أسافر
12-12-2022 - 01:09 pm
السلام عليكم ورحمة الله وبركاته
سؤال لاهل الخبر واللي سافروا هالسنه زلمسي
انا ان شاء الله بروح عالسنه الجايه مع عيلتي المكونه من 9 افراد اصغرهم5 ابتدائي
والظاهر ان روح السفر والحماسه من الان مشتعله فيني وابي اخطط من الان واحجز واخلص
لكن المصيبه مااعرف انجلش ومحد من العيله الكريمه يعرف فسؤالي الاول هل ضروري مره الانجلش هناك يعني ما امشي ولا انبسط ؟
ثانيا ابي اعرف الاسعار في زلمسي من ثم انترلاكن مع العلم اني راح اخذها رحله استجمام مو لازم كل يوم طلعه كل 3 ايام يومين مو مشكله يعني اهم حاجه براد وقهوه وبحر
بما ان عائلتك مكونه من تسعه اشخاص
فانا اقترح عليك اختيار احدى المدينتين زيلامسي او انترلاكن للتقارب الكبير بينهم
والافضل لك يكون خط سير رحلتك
فينا زيلامسي سالسبيرق ميونخ
وراح يكون اقل عليك كلفه من لو رحت انترلاكن
طبعا في كابرون المجاوره لزيلامسي راح تحصل شقق وفيها مطبخ وتوقع انها المكان الافضل لسكنكم
لانها بالعربي تشرح النفس
بالنسبه لسياره راح تحصل سياره عائليه فان اوفر من استجار سيارتتين
يمكن تاخذها اخر يوم لك في فينا وتسلمها في سالسبيرق
او تاخذها من مدينه المانيه بالقرب من سالسبيرق اسمها فريلاسينق وتسلمها في ميونخ على كلام الاعضاء انها اوفر من ناحيه ماديه
بالنسبه للطيران على حسب الوقت الي بتروح فيها يعني لو بالصيف القادم ان شاء الله احجز بدايه السنه الميلاديه
وان شاء الله بتاخذها باقل الاسعار من 2000 ونت طالع
الفيز تكلفك لو طلعتها من مكاتب من 800 الى 900 ريال
ولو طلعتها بنفسك في حدود 500 الى 550 ريال
بس يكون معك حجز الطيران وحجز الفنادق
صرف العمله يختلف من وقت لاخر الان في حدود 4.80 يعني اليورو ب 4.80 ريال ويمكن يزود او ينقص والله اعلم
اما سالفه اللغه مو معناه انك ماراح تنبسط اذا ماتعرف لغه بس يحتاج لغه بسيطه في المطارات احيانا والاسواق والمطاعم وشباك التذاكر فقط ولا غير درعم محد درى عنك
اتمنى اكون افدتك في بعض الاسئله وعذرني على التقصير
وان شاء الله الاخوان راح يفيدوك اكثر مني
تحياتي لك