Rayoom99
سويت الرد بالجوال, ان شاالله يكون واضح

س1/ ماهو افضل شهر لزيارة النمسا اي يكون الجو معتدل وليس بارد جدا..
من نهاية مايو حتى نهاية سبتمبر كلها فترة مناسبة لزيارة النمسا،
لكن شخصياً أفضّل تكون الزيارة من نهاية مايو حتى منتصف جون الأجواء جميلة و زحمة السيّاح بتكون أقل
س2/ زوجي لا يجيد اللغه الانجليزيه تماما وانا وسط فهل بالامكان تواجد سواق او مرافق عربي هناك حتى لا يشعر زوجي بانه لازم انا اترجم كل شي له..
ما أنصحج لا بالسواق الخاص و لا بالمترجم العربي كلها أسعارها نار يبي لها ميزانية لحالها والكثير منهم يحترف النصب على السياح للأسف
و أنتوا تقدرون تتدبرون أمركم بنفسكم ترى الوضع سهالات ولو اطلعتي على تقارير الأعضاء بشكل كافي بتكونين عارفة تدبرين كل أمورج بنفسج أثناء و قبل السفرة بدون الاستعانة بأحد
و النمساويين شعب ودود جداً لو احتجتوا لأحد منهم عادي يخلصون لكم موضوعكم عن طريق الإشارة لأن أصلا مو الكل منهم يعرف انجليزي
س3/ كم ممكن تكلفة رحلة لشخصين لمدة 10 ايام ..
للأسف مالي خبرة بالميزانيات هالأمر دايم على الرجال الله يجزاهم خير :$
بس تقدرين تحطين ميزانية تقريبية حاولي تسوين حجز تجريبي عن طريق النت على الخطوط و الفنادق و السيارة و تشوفين جم تكلف إجمالاً
و طبعاً تحددين المصرف اليومي اللي يناسب احتياجاتكم أثناء السفرة كل هالعوامل بتعطيج مؤشر على الميزانية الكافية لكم بإذن الرحمن :")
س4/ زوجي يحاول اقناعي بان الدول الاوروبيه ممله ونظامهم نوم بدري ومافي امن ومن هالحكي وانا مصره على الذهاب للنمسا من بد كل الدول الاوروبيه ...
أبداً ما بتشوفون الملل في النمسا بإذن الرحمن ، و النوم البدري معناه إنكم بتستمتعون بنهار حافل بالرحلات الجميلة
و بخصوص الأمن في النمسا خصوصاً أمن أكثر من بلادنا بس ابتعدوا عن السواقين والمترجمين الخاصين و بتكونون بخير بإذن الله :")
س5 / باختصار كم تقيمونها من الناحيه الماديه ( غاليه ، متوسطه ، عاديه )..
ما تعتبر غالية بوجهة نظري ومقارنةً بباقي دول أوروبا اعتبرها أقل من ناحية الأسعار،
و إن حجزتوا و خلصتوا أموركم مبجر يعني شهرين إلى ثلاث شهور قبل الرحلة بتوفرون أكثر
س6/ استخراج الفيزه كم ياخذ وقت ؟
حسب الشهر اللي تبون تسافرون فيه