أخواني الأعزاء أعضاء المنتدى
السلام عليكم ورحمة الله
أخواني أود الذهاب إلى عمان في اجازة الحج , وأريد منكم فضلا ً , لا أمرا ً , وكما عودتمونا (الفزعة والنخوة )
أريد منكم عمل خطة سير بشكل دائري بحيث أدخل عمان عن طريق ( العين ) متوجها إلى نزوى - مسقط ومن ثم الساحل الشمالي الشرقي وأعود إلى الإمارات مرة أخرى , لأذهب أخيرا ً إلى السعودية .
أريد منكم مع أسفي لإزعاجكم معي , لكن أنتوا كرماء واحنا إن شاء الله نستاهل :
- خطة السير ( المدن الهامة اللي أمر فيها وأزورها )
- توضيح المسافات بالكيلومترات بين المدن ( علشان أحسب حسابي في البنزين والوقت اللي أجلس في البلدة) .
- المدن اللي تستحق المبيت فيها , وعدد الأيام الكافية (إن أمكن) .
- أنا أحب المناظر الطبيعية ( الجبال والأشجار والبحار ) أكثر من التسوق .
- عدد الأيام 6 أيام أو زيادة شوي مو مشكلة .
- طبعا ً بروح مع العايلة (الزوجة وأربعة أطفال تحت سن 12 سنة )
- أي شي تذكرونه ممكن يفيدني (لاتقصروا وياي الله يحفظكم )
تحياتي لكم , والله يعطيكم ألف عافية
رحلة موفقة وحج مقبول ان شاء الله
فيه طريق من العين البريمي الى عبري ومن عبري الى بهلا ونزوى .... بس بخصوص المسافات ما اقدر افيدك كثير لكن بالسيارة راح تاخذ 45 دقيقة او ساعة من عبري الى نزوى ... في نزوى تقدر تزور القلعة والسوق القديم جنب القلعة وايضا فلج دارس والجبل الاخضر اذا كان عندك سيارة دفع رباعي بس يبيلك هناك ملابس ثقيلة للاطفال عالجبل .. تقدر تزور مسفاء العبريين في ولاية الحمراء تقدر تبات في فندق نزوى ليلة .... من نزوى اتجه صوب مسقط شارع مزدوج راح تاخذ ساعة ونصف تقريبا بس حاول ما تزيد السرعة عن 120 كم لانه المنعطفات كثيرة والرادارات على طول الشارع.. لما توصل مسقط افضل تقرا المواضيع المطروحة الاخرى للتفاصيل ... من مسقط اتجه صوب الباطنة (الطريق الرئيسي المؤدي الى الامارات) بعد 50 كليو بتصادف دوار ولاية بركاء بتلاحظ لوحة مصنع بركاء للحلوى العمانية زين تاخذ لك شويه منها ..من الدوار انعطف يسارا واتجه صوب ولاية نخل على مسافة 20 كيلو تقريبا..الطريق بياخذك صوب العين الثوارة ...زين تقضون خمس ساعات هناك تتغدون وتعملون لكم مشاكيك .... ارجع بنفس الطريق ومن الدوار انعطف يسارا كانك رايح الامارات وبعد 15 دقيقة تقريبا بتحصل على يمينك لائحة لمنتجع شاطئ السوادي خذ يمين واتجه على طول الى فندق الشاطي بعد 10 كم... بات ليلة هناك في الفندق واستأجر قارب لرحلة بحرية انزل على احدى الجزر واذا عندك خيط للحداق يكون شي طيب تصيد لك كم هامور .... استأجر دراجات للاطفال وركبهم على الحصان اذا كان موجود ..واذا ما حبيت تبات بالفندق يكفيك تقضي اليوم على الشاطي تحت المظلات...عند حدوث الجزر راح يتراج الماء للوراء ةعندها تقدر تمشي الى الجبل انت والاطفال .... ومن السوادي ارجع للشارع العام وكمل طريقك صوب مدينة صحار على بعد 150 كيلو او اقل ... اتمشى فيها عالكورنيش و اتسوق من المراكز التجارية وكمل دربك صوب البريمي ومن ثم العين