- وقالي هل زوجتك لها اهل او احد في الولايات المتحدة ؟ جاوبته لا
- قالي كم سنه وانتوا متزوجين ؟ جاوبته.
حبيت اني اطمن جميع الي مقدمين على الفيزا السياحية ...
وماشاء الله الشباب كفوا ووفوا في هذا الخصوص بس برضو قلت اني ابي اشارككم ...
في البداية احب كل الي ساعدوني في جميع استفساراتي عن الفيزا واخص بالشكر الاخت (( بنت الصقور )) والاخ (( ناصر كويتي )) على تعاونهم معاي .
كان موعدي انا وزوجتي اليوم 2-5-2007م وكنا واقفين عند السفارة الساعة 6:20 وكان الي قدامنا حوالي 14 شخص .
زي ما تفضل اخوي Modi كان الفرق بين التقديم في عام 2005 والحين في عام 2007 مختلف تماما لاني مريت بنفس التجربة لنفس السنتين ....
كان الفرق في الترتيب للطابور ومضلات وبخاخات ترطيب وتنظيم رائع ومعاملة احلى من رائعة من الموظفين ....
يوم جات الساعة 7:45 بداء مندوب السفارة بالمرور على الطابور وقال كل واحد يطلع الابلكيشن والصورة وصورة ايصال رسوم السفارة من البنك الامريكي فقط ... وكان يشيك وحده وحده وكان جدا محترم ومتعاون لابعد الحدود حتى اذا كان في احد عنده اي نقص يخليه يستناه اول الطابور علشان لمان يخلص تشييك على استمارات العالم يجي ويقله ايش يسوي !!
كان في واحد وراي كان معبي في النموذج القديم و طلب منه انه يستناه في اول الطابور ولما خلص تشييك ناداه هو وكل الي عندهم نواقص ووجههم ايش يسوو بالضبط (( وبخصوص الصورة النسائية حبيت اني انوه عنها ان الاذن لازم تكون باينه ووضحة لانه في ناس طلب منهم انهم يروحوا ويصوروا مرة ثانية وقالهم وين بالضبط ، وكان الموقع مو بعيد من السفارة ))
المهم دخلوا الناس بترتيب جميل جدا ويحاولوا انه ما يصير اي تأخير كانوا فقط قبل الدخول يطلبوا عند البوابة الجوازات فقط من غير اي اوراق ثانية علشان يتأكدوا انه عندكم موعد ويشيكوا على اسمائكم ....
عدينا من التفتيش الاول ولازم قبلها تتأكدوا انه ما يكون معاكم اي اجهزة الكترونية حتى ريموت السيارة بيعطوكم ظرف عند البوابه بيحطولكم جميع الاجهزة والجوالات لين انتهائكم من المقابلة .
(( طبعا من الممنوعات داخل السفارة - اي سوائل او مكياج للمرأه او MP3 Player ، جوالات ، لابتوب ، شنط كبيرة ، مأكولات او مشروبات ))
وعدينا التفتيش الثاني ....
ودخلنا الغرفة الاولى (( غرفة تشييك ان الاوراق كاملة وان المعلوماة كاملة فيها وبياخذوا منكم الاوراق والجوازات )) ....
بعد ما اخذنا رقم انتظار لين ما جا دورنا ... (( حاولو تكون اوراقكم كاملة وكل شخص من افراد العائلة او الاصدقاء اوراقه لحالها مع جوازه وسلموها واحد واحد ))
اخذوا مننا الاوراق وكان الحمد لله كل المعلومات كاملة ورجعولي زي ما اتفضل الاخ MODI كشف البنك ومن جد مره استغربت بس لازم تاخذوه معاكم يمكن يطلبوه وكمان رجعولي جوازي القديم مع انه فيزتي الامريكية الاولى الي ما استخدمتها كانت فيه !!
كان في ناس ياخذوا اوراقهم مع الجوازات ويقولولهم خذوا رقم للمقابلة اما انا عطوني اوراقي والجوازات مربوطة وقالولي خذ رقم وبعدين ودي الاوراق للشباك رقم 3 (( مع العلم انه في هذي الغرفة فيه 3 شبابيك بس 2 للتشييك وواحد لتسليم الجوازات الي في حالتي بس لين الحين ما ادري وش هي حالتي ، رحت واخذت رقم ووديته بوابه رقم 3 مع الاوراق اخذها مني وقال روح لصالة انتظار المقابلة طبعا هذا الكلام كان الساعة 8:45 ....
رحنا صالة انتظار المقابلة الشخصية وانتظرنا لين ما جا رقمنا الساعة 9:10 ورحنا للشباك وكان حوارنا كالتالي :
طلب مني في البداية اني احط اصابع يدي الاثنين مضمومه على الاسكانر من غير الابهام كل ايد لوحدها وبعدين طلب مني احط ابهام اليدين مره وحده ..... وبعدها طلب من زوجتي نفس الشي .
سألني وين شغال ؟ جاوبته.
كم سنه ليك شغال ؟ جاوبته.
وين درست وكم سنه ؟ جاوبته.
مسمى وظيفتي ؟ جاوبته.
هل سافرت لسوريا ، العراق ، اليمن ؟ جاوبته لا لا لا
لي احد ساكن بالولايات المتحدة وله لا ؟ جاوبته لا
سألني اذا رحت امريكا قبل كذا ؟ جاوبته لا
وقالي بس انت اخذت فيزا قبل كذا بس ما رحت ؟ قلتله نعم
وحط علامة صح في اخر النموذج وجا دور زوجتي .....
بس ما سألها سألني انا كل الاسألة (( مع العلم انه انا الي عبيت نموذج زوجتي وموقع اني انا الي عبيته )) !!
وقالي هل زوجتك لها اهل او احد في الولايات المتحدة ؟ جاوبته لا
قالي كم سنه وانتوا متزوجين ؟ جاوبته.
وبس وحط نفس الصح على اخر نموذجها ، ودبس كل جواز بكرت واعطاني الكروت وقال الفيزا بتكون جاهزة بعد اسبوعين زي اليوم تجي تاخذها بعد 3:30 العصر بس انت روح سدد رسوم لك 27 ريال في اخر شباك وبس ...رحت وسددت الرسوم ومشينا ونقول الحمد لله ربنا يسرها وطلعنا بالضبط 9:35
وان شاء الله بروح بعد اسبوعين السفارة واخذ االفيز واعطيكم كل الاخبار ...... وربنا يعين ان شاء الله .
واذا فيه اي استفسار انا حاضر واسف جدا اني طولت عليكم بس حبيت اني اشرحلكم ايش الي قاعد يصير في السفارة بالضبط
عموماً موفقين ان شالله ...