بسم الله الرحمن الرحيم
شعار الخطوط السيرلانكيه (نحن نخدمكم في السماء ونسرقكم في الأرض)
ملاحظه اللي بيسافر بالخطوط السيرلانكيه لايتعب نفسه ويحط أقفال لأنهم بيكسرونهم ويفتشون الشنطه على راحتهم وما يحق لك تشتكي على كسر القفل دام الوزن ماتغير .... هذا قانون ثابت فاهمين
عشان كذا أنا حبيت اكتب لكم قصتي مع الخطوط السيرلانكيه كاملة ومن غير زيادة لاكن ينقصها بعض المناوشات مع المسئولين عن العفش عشان المسألة طويلة
أنا قبل 6 شهور كان عندي رحله من الدمام إلى هونج كونج ترانزيت كولومبو درجة رجال أعمال ولما وصلت الشنط كانت متأخرة مع إن عليها ستكر الافضليه وكنت أشوف الشنط بالسير ومفتوحة سحاباتهم وأقول ليش الناس مهملين وماسكرو شناطهم زين ولقيت شناطنا مفتوح نصهم مثل الناس و كان فيه شنطتين مكسورة أقفالهم وحنا توقعنا إن هونج كونج كاسرينهم عشان فيه مواد غذائية قلت يمكن ممنوع بس قالو لي انه ما يصير يفتحون الشنط بغير وجودي ولما رحنا الفندق لقينا أغراضنا مفككه وكل الشنط الصغيرة مفتوحة وكل سحابات الشنطه مفتحه وكان فيه كامرتين بس ربي سلمهم واكتشفنا إن اللي كسرهم حراميه يدورون ماخف وزنه وغلا ثمنه وعدينا الموضوع
وبعدها بمده وصلنا إلى كوتشين ولقينا وحده من الشنط مشقوقة والأغراض اللي في الجيب الخارجي ضايعه ورحنا واشتكينا وعطونا ورقه وقالو نعوضكم وكان العوض على الله لان رحنا للمكتب ويقولون بعدين وما احد يعطينا كلام صحيح
لاكن المصيب هذي المرة رحت رجال أعمال من كوتشين إلى كوانزو وسكنونا ليله في كولومبو على حسابهم وكانت شنطنا مشحونة مباشره على كوانزو ولما استلمناهم لقينا 3 شنط مكسره أقفالها والرابعة قفلها ثابت فيها طلعوه من مكانه بس اكتشفوا إن الجوانب مقفولة بمفتاح فما قدروا يكسرون الشنطه ورحت أدور مكتب السيرلانكيه بالمطار سألت الاستعلامات قالو لي مافيه لهم مكتب إلا بوسط كوانزو وعطوني رقمهم فمن الطبيعي إني أروح للفندق ولقيت مسروق من الشنطه كمرتين الديجتال والفيديو والشاحن يعني ماقيمة 4200 ريال ومن الوقاحة حاطين الأقفال داخل الشنط ومغلفينهم بستكر امن الهند يعني إن الهند هم اللي فتحوهم وكانوا كاسرين وحده من يدين السحاب ومن الوقاحة مبين إن الأقفال مفتوحة بزراديه وأنا شاريه أقفال حديدتها على حجم الحلقة عشان مايقدرون يدخلون شيئ وبعد ماعاقهم وهذي صورة الاقفال .
والصبح اتصلت على المكتب ورحت للعنوان قالو لي أنتي غلطانة ليش طلعتي من المطار حنا عندنا مكتب هناك وما نقدر نسوي لك شيئ لازم نقيس أوزان الشنط ونتأكد واللي نقدر نسويه إننا نرسل ايميل وطبعا أرسلت لهم ايميلات وما من مجيب وتنكدت السفرة وما قدرت أصور أي شيئ باستثناء كاميرات الجوال .. وقبل ما أروح لكولومبو كلمت المسئول في كوانزو وقال لي بيتواصلون معك بالدمام وقلت له لا أنا بروح لكولومبو وأبيهم يتصلون عل هناك على رقمي وقال طيب و كالعادة مااحد اتصل ...
وكنت آخذه معي أقفال احتياطي وقررت إني أشيل ورقه الافضليه تبع درجه رجال الأعمال قلت يمكن الحراميه إذا شافوها يركزون عليها وكانت الرحلة ترانزيت هونج كونج إلى الدمام و أنام ليله في كولومبو وقررت اخذ الشنط و أتعذب ولا يستفردون فيهم ولم وصلت لقيت شنطتين مكسورة أقفالهم ومفتحه السحابات ورحنا نشتكي ومن الغباء قالو لازم نشيك على الأوزان (من كثر الدقة )عشان إذا كانت ناقصة نعطيكم ورقه وإذ تطلع أوزان الشنط زايده كيلوين بقدره قادر قالهم الوالد يعني الحرامي فتح الشنط وحط فيهم زيادة كيلوين وبعدين حنا مسروقين في كوانزو ونبغي نشتكي قالو الحين مانعطيكم شكوى لان بس الأقفال مكسره وما نقص الوزن وش المشكلة إن الأقفال تتكسر ومن داخل السحابات مفتحه
والسرقة القديمة روحوا لكوانزو واشتكوا حنا مالنا شغل وبعد مناوشات وجدال عطونا رقم رئيسهم المسئول عن كميرات المراقبة عند العفش و بنتصل عليه بكرا ونتفاهم معاه
لما رحنا اليوم الثاني للمطار دخلنا أغراضنا و أصرينا إن ورقة الافضليه تشيها وقالت لاممنوع الأمن لازم يحطها وتهاوشنا معاها لمن شالتها وسوينا حركة اختبار عشان نتأكد إن مافيه احد فتح الشنط بما إن الأقفال الاحتياطية خلصت ربطنا الأقفال بخيوط بعقد متادخله عشان اللي يبي يفتحهم يتعب مايحصل الشنطة بسهوله ولو تشوفون اللي يحمل الشنط يضحك علينا إننا نقفلهم بحبال يعن وش خايفين عليه ولما عرف إننا في رجال أعمال قال آسف أنا استعجلت عليكم ... دخلنا اللاونج و اتصل الوالد على الرجال اللي عطوه رقمه وطلب مقابلته ورفض الرجال انه يجي وقال أنا مالي شغل وكان رحت لخدمت العملاء بوسط المدينة قاله الوالد ليش ماقالو لي الكلام أمس لما كان عندي وقت و الحين تقولون لي لما بقى ساعتين على طيارتي ياتجي وتسمع قصتي أو بوصلها للي أعلي منك ولمجلس الإدارة قال له لاما تسويها وما راح أقابلك قال له الوالد طيب أنا أروح للي أعلى منك
وطلعنا نسأل عن مسؤل خدمة العملاء في المطار قالو مش موجود و اكتبوا شكواكم ونتواصل معكم في الدمام قلت لهم ماراح أتحرك الطيران السيرلانكي مصدره هنا وأنا كل الرحلات تختلف الوجهات تماما إلا كولومبو هي نقطة الوصل بينهم يعني البلا فيها .....الخ قلت ما راح اكتب أنا آبي مسئول الكاميرات يوريني شنطي في يوم رحلة كوانزو من فتحهم ولما شافوا اصرارنا وأننا ما راح نتحرك قالوا روحوا للاونج وهو بيجي لكم ...
وفعلا وصل رجالين واحد مسئول الكاميرا والثاني بعد نقاشات ولما قال الوالد إنهم عطوني رقم واحد ورفض يجي قال الثاني أنا اللي كلمتك خاف لما جاه أمر من رئيسه وكالعادة ماحصلنا لاحق ولا باطل و وريناه الأقفال المكسورة وقال لهم الوالد ايش الطريقة الغبية سالفت قياس الوزن الحرامي ما راح يسرق ملابس يبغى يبغى ماخف وزنه وغلا ثمنه وحنا بكل الحالات ما اخذنا حقنا أول مره مادرينا والثانية اشتكينا وعطونا ورقه والثالثة طلعنا برا المطار ورحنا للمكتب والرابعة رفضوا يعطونا ورقه عشان أقفال مكسره بس يعني كل الحالات جربناهم وقالوا ارسلو ايميل بالتفاصيل وهذيك الساعة نبدأ نفتش في الكاميرات ونتواصل معكم والخ وما من مجيب حتى الساعة
وعلى فكره أخيرا شناطنا ولله الحمد وصلت أسرع من لما يكون عليها ستكر الافضليه لان دائما توصل آخر شنط وهي عليها الستكر الخايس وما فتحوهم ولا قطعو الخيوط شكلهم قالوا هذولا لا وراهم ولا قدامهم مربطين شناطهم بحبال ماله داعي نتعب أنفسنا عليهم ...
هذي قصتي مع الخطوط السيرلانكيه والله يشهد إني ماظلمتهم بشيء اللي يبي يتعض خير له ولي يبي يغامر الله يساعده بس انصحه لايحط أي شي غير الملابس بالشنط
صحيح إني طولت بس إني حبيت اشاركم بتجربتي واذكرها بأغلب تفاصيلها عشان ما اضلمهم والله على ما أقول شهيد
ورجاء اللي عنده طريقه اقدر اخذ حقي منهم يفيدني رجاء وجزاكم الله خير واسفه على الاطاله ....
سلالالالالالالالالام