هلا ابو نجلاء انتم شخصين وخفيفين يعني كثرة التنقلات ما فيها مشكله ولكن هل انتم بشهر عسل ...... او تمونون على بعض واهم شيء سياحه وجوله عالميه

برنامجك 15 يوم راح ازيد عليها 3 ايام فقط واقتراحي لك اذا تبي برنامج سياحي عالمي
روما 3 ليال
الانتقال بواسطة القطار المباشر الى فلورنسا ساعة ونصف والبقاء فيها ليلتين (حيث يمكن تخصيص اليوم الثاني زيارة بيزا فهي بالقطار ساعة ونصف )
الانتقال من فلورنسا الى فينيسيا بالقطار المباشر ساعتين وقضاء ليلتين (اذا لم ترغب في فلورنسا القطار المباشر من روما الى فينيسيا 3:45 دقيقه )
الانتقال من فينيسيا الى ميلان بالقطار المباشر ساعتين ونصف ويكون السكن في منطقة لوقانوا السويسريه ساعة بالقطار من ميلان وفي لوقانوا السويسرية يتم استئجار سياره وبعد قضاء ليلتين
الانتقال بالسياره الى انترلاكن المسافه ساعتين ونصف وهناك في احضان الطبيعه حيث المتعه والسحر الرباني تقضي فترة استجمام 4 ليال
ثم الانتقال بالسياره ساعتين ونصف الى منطقة بحيرة جنيف (جنيف - مونترو- لوزان-ايفيان وانسي الفرنسيتان ) وبعد قضاء ليلتين تسلم السياره وبما انك استلمتها من لوقانو السويسريه فلن يكون هناك ضريبه اختلاف دول ولن تكون مكلفه
وتنتقل الى باريس بالقطار المباشر بدون تبديل يستغرق 3 ساعات
وهناك تقضي اخر 3 ليال
تحياتي

اخوي دايم الله يديم عليك الصحه و العافيه ومن يقرا
بالنسبه لنا انا و زوجتي تجديد شهر عسل يعني مش تونا معاريس ,,, البرنامج حلو لكن هل يكفي لروما ثلاث ليال ؟ وبالنسبه لفلورنسا ما اتوقع اني راح ادخلها بالبرنامج بصراحه ماودي اكثر تنقلات .. وبالنسبه لميلان مافهمتك هل تقصد اسكن في لوقانوا واستأجر سياره واصير اتردد على ميلان اذا حبيت ازورها ؟ وكيفراح اوصل الى لوقانو بنفس القطار اللي طالع من فينيسيا او اخذ قطار ثاني من ميلان بنفس اليوم يعني ابدل قطار في ميلان ؟ وبالنسبه لمنطقة بحيرة جنيف وين راح يكون السكن في جنيف نفسها او في اقتراح افضل ؟
مشكور لسعة صدرك وتجاوبك

نعم 3ليال كافيه لروما يخصص يوم واحد للباص السياحي المكشوف خصوصا ان برنامجك يغلب عليه المدن الكبيره ولا يوجد جزء ريفي الا انترلاكن لذلك اذا كنت سوف تلغي فلورنس فيمكن زيادة عدد الليالي في انترلاكن الى 5 اذا كنت ممن ينسحرون بالطبيعه الخلابه مثلي وبصراحه هذي الاماكن اللي تخلق بداخلنا شعور غريب لاننا محرومين منها والليله الاخرى تكون لمنطقة جنيف وبما ان معك سياره بسويسرا فيمكن السكن باي مكان ذكرته لك بين الاقواس فجميعها متقاربه شف افضل عروض السكن وخذها بالنسبه للقطار من فينيسا الى لوقانو يستغرق تقريبا 4ساعات لانك تبدل القطار في ميلان

عند السكن في لوقانوا يمكن تخصيصةاليوم الثاني الى ميلان فهي تبعد ساعه تتمشى بساحة الدومو وهي الزبده

طيب اخوي دايم ,, تنصحني استأجر السياره من هنا او اذا وصلت هناك استأجرها ؟
وكيف السواقه هناك لأني بصراحه ما جربت اسوق برا ومتخوف من التجربه شوي

abo najla
السياره احجزها من موقع الشركات العالميه بالانترنت والسواقه هناك خصوصا بسويسرا ممتعه جدا وانا نصحتك بالسياره بعد الخروج من زحمة ايطاليا لكي تستمتع بطبيعة سويسرا وهي تعتمد على الشخص كانه يحب النظام ويطبقه بيستانس وكان سياقته قائمة على الهمجيه وضارب لاقوانين المروريه عرض الحائط واستخدام الاشاره اثناء الانعطاف مطموس من قاموسه عزالله بيتوهق ويوهق الخلق هناك طبعا مع الاستئجار يجب اضافه التامين الشامل للحوادث والسرقه

خلك على جدولك واطلع من فينيسيا الي باريس طيران
رخيص ومناسب توفر وقت واذا انت حاب انك تروح باريس فقط

الله يعطيك العافيه اخوي دايم وان شاءالله ان السواقه مظبوطه وعلى قول المثل ياغريب كن أديب
اخوي الف حرف ودي اتحاشى الطيران الداخلي يعني لو رجعت لخطتي الأولى وطلعت من فينيسيا الى باريس دايركت هل ممكن اطلع لها بالقطار مثلا ؟ وكيف راح تكون الرحله ؟
وياليت أحد يفيدني عن الميزانيه هل هي كافيه تقريبا 50 ألف وكيف بالنسبه للوقت (منتصف سبتمبر) ايطاليا تحديدا هل ستكون مناسبه بهذا الوقت ؟
والله يجزاكم خير جميعا