ADEIL
هنا بعض الاقتراحات
قمة جنفرو بالرغم من طول المسافه وارتفاع السعر بس حلوه
كهف سانت بيتوس لايفوتك
الزحاليق الصيفيه هذا اللي بتتزحلق فيها مع المدام (لاتفوتك)
طبعا الشلالات كل واحد احلى من الثاني
مطل هاردكلم قريب من الفندق تقدر تروح له مشي
ايه ايه تذكرت شي ضروري
قريب من الفندق فيه شارع عليه مطاعم عربيه وماكدونالدز ومحلات ساعات ومحل كاكاو
المهم
فيه على نفس الشارع على صفت ماكدونالدز مطعم عربي يبيع شاورما (تقريبا هو احسن مطعم عربي في ذيك المنطقه وبتشوف زحمه عليه شوي)
تشوف اللي يبيع فيه واحد ووحده مصريه تقريبا
تشوفه معلق الكاتشب والشطه والمايونيز في السقف (بعدين تعرف معنى كلامي اذا رحت)
المهم لايفوتك الشاورما خطير مره بس للاسف نسيت اسم المطعم(صحيح الشاورما غاليه شوي بس تستاهل =9يورو يعني تقريبا 50ريال)
جب لي واحد شاورما معك بدون مايونيز وبدون كاتشب وشوي شطه
بالتوفيق ان شاء الله

السلام عليكم ..
ما شاء الله ما قصر اخوي بو مريم .
بالنسبة لموقع الفندق ..فهو قريب من محطة القطار الغربية .
هذا موقع القطارات والباصات السويسرية :
http://www.sbb.ch/
وله تطبيق على الايفون .
حط مكان المغادرة ...ومكان الوصول ..وشوف مسارات الرحلة والخيارات المتاحة .
جميل جدا جدا جدا.
============
تنويه : جميع محطات القطارات ..يوجد بالقرب منها محطة باصات .
القطارات للمشاوير الطويلة ..يعني يربط المدينة خارجيا.
والباصات للمشاوير الصغيرة ..يعني يربط المدينة داخليا .
=======
اليوم الاول ..يوم الوصول الى انترلكن ..وممكن الاكتفاء بزيارة مطل الهاردركلم والتمشي في سنتر انترلكن .
الهاردر كلم قريب من محطة القطار الشرقية .
========
اليوم الثاني :
زيارة شلال تروميل باخ + قمة اوروبا .
قبل عمل هذا النشاط التأكد من الاستقبال في الفندق عن حالة الجو.
وممكن سؤالهم عن اي شي ودكم فيه ...او قبل كل نشاط تسووه.
الذهاب من محطة القطار الى محطة قطار لوتربرونن .
Lauterbrunnen
ثم من محطة الباصات الى محطة شلال التروميل باخ .
Trummelbachfalle
بعد الانتهاء..الرجوع الى لوتربرونن..ومن محطة القطار الى قمة اوروبا الينفيرواخ.
Jungfraujoch
==================
اليوم الثالث :
رحلة بالقطار البانورامي ..واللي يسمونه القطار الذهبي ..الى مونترو ..ومن مونترو الى بروك Broc لزيارة مصنع الشوكولاتة ..ثم قلعة جريير.
وبالقطار من محطة مونترو..الى المحطة اللي بقرب مصنع الشوكولاتة :
Broc-Fabrique
القلعة ..ممكن زيارتها بالباص من الباصات الموجودة في محطة جريير ..في المحطة:
Gruyères, ville
ممكن الاكتفاء بزيارة مصنع الشوكولاتة ..وزيارة مونترو الجميلة .
والعودة راح تكون بالقطار العادي.
=
ركزو معايا بخصوص القطار البانورامي .
لأن القطار الذهبي يحرك من انترلكن الساعة 9 وهو الوحيد ..يعني لو فاتك ..راح تطلع بالقطار العادي .
ومسار الرحلة كالتالي:
رينجنبيرج - انترلكن (مهم قبل الساعة 9 صباحا)-زويسمن (راح تعمل تبديل للقطار zweisimmen)-ثم الى مونترو Montreux.
تدخل على موقع القطارات السويسرية.
وراح تجد خانة الذهاب وخانة الاياب ..وخانة ثالثة (Via)
الخانة الاولى ..interlaken ..اي وحدة الشرقية او الغربية.
الخانة الثانية ..Montreux
الثالثة ..Zweisimmen
التاريخ المطلوب
الوقت من الساعة 0900 صباحا.
وراح تطلع لك في الكومنت ان هذه الرحلة عن طريق القطار الذهبي.
ولازم تتأكد ان الرحلتين كلها سوا جولدن باس.
ما تحتاج حجز القطار اذا معك السويس باس. ..لكن لازم تحجز مقعد عشان تضمن الرحلة.
على هذا الموقع
http://www.goldenpass.ch/CMS/default.asp?ID=252
وسعر المقعد 5 فرنكات.
وهناك مقاعد الفي اي بي..على ما اعتقد ان حجزها من شباك التذاكر وقيمتها 15 فرنك ..يعني اول ما توصل جنيف في اي محطة قطار تطلبهم اياها
=======================
اليوم الرابع :
زيارة بحيرة البلاوسيه والاوشن سي وقرية كاندرشتج.
الذهاب من محطة القطار الى محطة قطار فروتينجن
Frutigen
ثم من محطة الباصات اللي اسمها Frutigen, Bahnhof
الموجودة في محطة القطارات
الذهاب الى محطة باص البلاوسيه Blausee
Blausee BE
يجب اخذ مواعيد الباصات ..مهم جدا .
ثم
من محطة البلاوسيه الى محطة كاندر شتج ..بالباص طبعا.
Kandersteg
راح تسوي تبديل للباص ..وتطلع على الباص المتجه على الاوشن سي:
Kandersteg, Talstat. Oeschinen
ثم بالتلفريك الى البحيرة .
من التلفريك الى البحيرة ..مسافة طويلة شوي..لكن توجد حناطير تجرها الخيول توصلك للبحيرة .
العودة
ترجع الى باصات كاندرشتج ..ومن محطة القطار اللي فيها ..ترجع الى شبيتز ومن شبيتز الى انترلكن
=========================
ممكن اذا كان الوقت متاح لكم ..تعملو رحلة بحرية في بحيرة برينز او ثون .
======================
بالنسبة للسويس باس ..يعتمد على عدد ايامكم في سويسرا ..ممكن اربعة وممكن ثمانية .
قيمة بطاقة السويس باس للفردالبالغ لمدة اربعة ايام فقط ب 435 فرنك .
.يعني حدود 1827 ريال .
http://www.swiss-pass.ch/en/swiss-pass/
وهذا شرح تفصيلي لها .
السويس واليوريل باس - تقرير وشرح مفصل https://artravelers.com/p/re/62167
بالمختصر ..جميع تنقلاتكم بالقطارات والباصات والبواخر ..مجانا
بالاضافة الى خصومات 50 % على القطارات الجبلية والتلفريكات .
ودخول بعض المتاحف مجانا .
أتمنى اكون افدتك ..ورحلة سعيدة باذن الله
وبالتوفيق

يعطيكم العافيه بالنسبه للسويس باس واليوريل باس
تنصحني اخذ والا ماله داعي مع العلم اني ما ابغى استأجر سياره ؟
والجدول الا عملتوه جميل وراح اخذ منه وارتب واعرضه عليكم وماراح تقصرو معاي
شكرا جزيلا

عيوننا لك اخوي عادل ..
انا قلت لك ان السويس باس مناسب لك ...لكن كم المدة اللي راح تقضيها في سويسرا ..هل هي اربعة ايام فقط اللي في انترلكن ..والا كمان في مخططك الكامل زيارة مثلا زيورخ وجنيف وغيرها .
لأن لو اكثر من اربعة ايام ..تاخذ ابو ثمانية ايام .
اليوريل باس ما تحتاجه ..اذا كانت روحتك ورجعتك من دولتين فقط في اوروبا .
وفي انتظار جدولك النهائي.

تسلم لي عيونك يابعد قلبي المده الا راح اقضيها في انتر لاكن قرابة الخمس او الست ايام
من 31اغسطس الي 5 سبتمبر
يوم 6سبتمبر انتقالي لجنيف راح يكون السكن
في فندق ( هولدي ان اكسبرس جنيفا ايربورت)
ليوم واحد وبعدها اقلاعي الي جده بتاريخ 7سبتمبر..

يسلم راسك يالغالي ..
بالنسبة للسويس باس ..اذا كانت انترلكن ستة ايام ..فالافضل انك تاخذ سويس باس لمدة ثمانية ايام ..يغطي جميع تنقلاتك في سويسرا .
الهوليدي ان ممتاز ..وقريب منه محطة ترام .
بس مدري من فين راح تجي انترلكن ..هل من جنيف ولا من زيورخ ؟
عشان تشوف من فين تاخذ السويس باس وتفعله .

راح انزل من باريس في طيران ايزي جت الي جنيف ومن جنيف لانترلاكن

قراءة هذا التقرير عن مدينة انسي https://artravelers.com/p/re/92602
وعجبتني ايش رايكم في زيارتها تنصحوني ؟

نعم وبكل تأكيد ...أنسي جميلة وتستحق الزيارة ..وهي قريبة من جنيف ..
وممكن تمر عليها وانت طالع من انترلكن عن طريق ايفيان وجنوب بحيرة ليمان وايفواغ ثم انسي .
وبالتوفيق