1. قال ابو البصل : دامني اساسي وبتحطوني راس حربه موافق موافق موافق


2. وطلبوا من ابو البصل انه ينفذ فكرته

لكم قصة احد المسافرين للعمه والي توه جاي من العمه من طقطق الا سلامو عليكم
القصه مدعمه بسوالف قديمه وسوالف ناس ثانين وذلك لوجود تداخلات مع نفس قصة المسافر خوينا
وعلى ما اعتقد ما ان يدخل للموضوع راح يعرف انه هو المقصود (بس قلبه كبير وما راح يعترض على الكتابه والموضوع)
الحصه الاخيره في مرسة الفارابي بالعقربيه والاستاذ يشرح وابو البصل جالس باخر الفصل وينتظر متى يرن الجرس والذبان يحوم فوق راسه ويوقعون على الطلاب الجالسين عن يمينه وعن يساره والذبانه اللي بايعتها توقع على ابوالبصل على طول تفطس
والذبان يهابونه ومايقوون يوقعون عليه ماهوب من نظافته لا والله واصلا هم مادخلوا الفصل الا لعيون ابوالبصل بس اللي حارمهم منه ريحته متبخر بفليت
المراد انه يوم رن الجرس ويطلع من المدرسه يركض ويوقف عند باب المدرسه يحتري ياخذ دشه اليومي ويجي اخيه الادون منه لؤي ويوقف جنبه وتمرعليهم سيارة البخور قصدي البلديه ترش فليت وهو اللي يذب شنطته على لؤي يوديها معه للبيت
ويفصخ نعاله ( وانتم بكرامه ) ويحطها بين منادغه ويصفر لصحيبه راجو سواق سيارة الفليت يخفف السرعه وهو اللي يعض طرف ثوبه وينفلت ورى السياره لين طابق ورى الرشاش ثمن زاد راجو السرعه وابو البصل حاط رجله وسط معمعة الفليت ويدورون بالشوارع لين قضى الفليت
ويوقفون السياره بالبلديه ويجيك ابو البصل مدحدر للبيت مبسوط ومروق فليت الله يكفينا شر الادمان
ويدخل البيت وشافه ابوه وهاوشه وسمعه نفس كلام كل يوم بس ذا المره زاد كلمه جديده قال : يابو المرطباق (طبعا من كثر ما ياكل مطبق ريحته كلها بصل) اخوانه سمعوا الكلمه وقام لهم ضحك وصاروا يعايرونه ابو المرطباق
العياره تسربت للجيران ثمن للحاره ومنها للمدرسه وبعدها انتشرت بالديره وصاروا ماينادونه الا بابو المرطباق هو كان متقبل العياره بروح رياضيه لين قرر ان ينحاش من الديره
طلع الشارع وجلس يناظر فراعي المرطباق اللي قدام بيتهم . يطالع فيه ويبكي.... ناداه راعي المرطباق وسأله عن وضعه وليه جالس يبكي . علمه السالفه ورد عليه البياع حق المرطباق (طيب وايش فيها يعني ) المفروض انك تفتخر.
الزبده ابو البصل عطاه نظره وصفطه (ويدبر عنه ) يعني عطاه ظهره ومشى ... الا وراعي المرطباق يقوله روح اندونيسيا وشوف راعي المرطباق كيف محترم هناكا..
ويجي ذاك اليوم وهو جاي من المدرسه وتوه بيدخل البيت ناظر.. تحته ويحصل تذكره سفر !!!! ماهوب حلم تذكره يا بو البصل خذها...(المخرج عاوز كدا)
ابو البصل ما يقوى يصبر اكثر من كذا وعزم انه يطس من البلد كلها وهو اللي يدرعم بالتذكره على مكتب سفريات ويوريهم التذكره ويسجلونها باسمه ومن حظه كان فيه رحله لاندونيسيا بنفس اليوم ويحجز عليها ويجي راجع للبيت ويدخل غرفته ويلبس ترنق رياضه وفنيله مرسوم عليها دعايه فليت بف باف ورقم 33 وياخذ جوازه ويحط غريضاته وسط بقشه ويربطها وينحاش من البيت على المطار ويركب الطياره وتاخذ منه المضيفه البوردنق وتوريه كرسيه وتعطيه هدفوون وتمعط منه البقشه وتحطها بالدرج اللي فوق راسه ويجلس جنب شايب اندومي لابس نظاره وقاعد جنب الدريشه ويقرا له بمجله وتطير الطياره وابو البصل وده يتفرج مع الدريشه وهو اللي يمد يده من فوق الشايب ويفتح الدريشه ويرفع رويسه بس ماقوى يتفرج وهو يدخل اصبعه في اذنه كانه ينظف اذنه وكوعه يفرك به خشة الشايب يبي يطفشه عن مكانه . ابعد الشايب راسه وهو مستمر يقرا بالمجله, ويمط ابو البصل رقبته قدام الشايب كانه يقرا معه بالمجله الشايب راعي طويله صك المجله ومدها لابو البصل
قفلت معى ابو البصل خذ المجله وذبها على الجالسين وراه وهو اللي يسكر الدريشه وينسدح على متن الشايب ويتنفس في وجهه ونفس ابو البصل فليت مركز. الشويب ماقوى يقاوم الا يوم اختنق وقام يكح ...كح..كح...كح... لين اغمى عليه وشافته المضيفه وتركض تنادي له دكتور معهم بالطياره واسعفوه بتنفس صناعي يالله تلاحقوه بغى يفطس الشويب وشالوه من مكانه وجلسوه على سرير باخر الطياره وحطوا عليه اوكسجين
و ابو البصل يناظر المضيفه تكلم الدكتور بالاندومي وهي مشره عليه وهو يهزهز رويسه كانه فاهم وش هي تقول يابوالعريف ويقوم ويفتح الدرج اللي فوق راسه وياخذ بقشته ويجلس على الكرسي الثاني ويتسند على الدريشه ويتوسد البقشه ويتمغط على الكرسين وحط الهدفوون على اذانه الا يوم قامت الطياره تهتز بقوه المضيفين فتحوا بيبان الطياره وقاموا ينطلون العفش يبون حمولة الطياره تخف وطلبوا من الركاب انهم يساعدونهم وذبوا كلش حتى ملابسهم اللي هم لابسينها ولا فيه فايده
وتكلم كابتن الطياره بالمكرفون وقال انه باقي ثمانين كيلو وتسلم الطياره وماعاد عندنا شي نذبه غير واحد منكم يالركاب ونبي واحد وزنه من ميه وثمانين وحولها وانتم بصركم هاه من يتبرع ؟؟ ولا واحد من الركاب تكلم ساكتين
وابو البصل ماهوب يمهم مايدري وش السالفه لايفهم لهم ولا يسمعهم لاهي مع الهدفون ويعيد الكبتن كلامه هاه من يتبرع ؟؟؟ ويرعص ابو البصل اللمبه يبي المضيفه تجيب له كاس مويه الا يوم قاموا الركاب يصفقون ويصفرون له واستانس ابو البصل وهو اللي يطفي اللمبه ويولعها ثانيه وزاد التصفيق ماخذى الا المضيفين يتطامرون عليه ويشيلونه فوق ويلبسونه برشووت ثمن حلتوه من الطياره والركاب يصفقون
وهو في الهوا يصارخ عليهم : ياقليلين الخاتمه الهاند باق ( البقشه ) ويحلتونها عليه
وينزل بالبرشوت ويطيح له على قبيله في اندونيسيا يقال لهم ,, ال مشمل ,, قبيله كل اهلها رجليهم الثنتين يسار واذا مشى الواحد منهم قام يحذف يسار مثل شوتات ريفالينو
ويتجمعون عليه اهل القبيله ويناظرون رجليه ويلمسونها مستغربين منها وياخذونه لشيخهم وقبل مايدخلونه في مجلس الشيخ اظهر كل واحدن منهم شباصه وشبص بها خشمه ودخلوا المجلس ويناديه الشيخ ويجلسه جنبه بس ماقدر ابو البصل يحتمل الريحه اللي تطلع من الشيخ ريحه مخيسه بالحيل اثرهم يصكون خشومهم بالشباصات حتى شيخهم ياخذ راحته وهو يدخل يده بمخباته ويظهر التذكره ويشق منها ورقتين ويدرعمها ثمن سد بها مناخره الا يوم ردت له الروح وسأله الشيخ عن قبيلته ؟؟
وقال : قبيلتي كلها انقرضت ومابقى منها الا محاتسيك ابو البصل وودي انكم تضفوني معكم
قال الشيخ : اللي يشرينا نشريه يابو رجلين مختلفه ومن هالحين انت واحدن منا وفينا وحنا مجتمعين اليوم نخطط لحربنا باتسر مع قبيلة ,,ال مجنب,, من كل اهلها رجليهم الثنتين يمين
وحربنا معهم بسبب المويه البير حقهم جاين عن يسارنا وبير الماء حقنا جاين عن يمينهم والا بغينا نروي تدري حنا نحذف يسار وهم يحذفون يمين وكلن صار يشرب من بير الاخر وكنا صابرين وساكتين لكن اللي زعلنا انهم صاروا يسبحون بقرهم في بيرنا مع انه مايشرب من البير الا هم عاد حنا ماقوينا نصبر وعناد فيهم صرنا نغسل حميرنا في بيرهم اللي نشرب منها
وصارت لنا يجي فوق العشرين سنه وحنا وياهم بحرب وكل اخر سنه نتواجه ونتحارب وباتسر اول السنه
وانت يابو البصل رجال لا تحذف لا يمين ولا يسار ومواريك مواري واحد بيبدع وبنعطيك الرايه وبنخليك راس حربه هاه وش قلت ؟

قال ابو البصل : دامني اساسي وبتحطوني راس حربه موافق موافق موافق

قال الشيخ : استعدوا للحرب باتسر وانت يابو البصل ضيفي وبترقد عندي وخذ هذي شباصه خلها معك
ويرقد ابو البصل ويوم اصبح الصبح قام وغسل وجهه وقبل مايدخل على الشيخ اظهر شباصته وشبص بها خشمه وتجمعوا اهل القبيله وابو البصل مستغرب منهم ماحد من اللي بيحاربون معه سلاح كل واحد معه قربه مويه حاطها على متنه ودخل عليهم الشيخ معه الرايه وسلمها لبو البصل وتوجهوا للحرب تدرون الحذفات مختلفه واكيد ان القبيلتين ما يتواجهون لان كل قبيله تحذف على جهه ,, ال مشمل ,, صارو يدورون على اليسار و,, ال مجنب,, يدورون على اليمين واذا مروا على بعض قام كلن يتفل على الثاني تف تف تف وصاروا مسوين دويرتين تدور جنب بعض ويشربون من القرب اللي معهم ويتفلون وكل شيخ جالس في وسط دويرته وابو البصل صار بين الدويرتين والتفال صايرن عليه وهو اللي يزعل ويبتل بالرايه ويطلع فوق راس (جبل) ويركز الرايه جنبه ويجلس يتفرج على العرض وهو جالس يتفرج طرت عليه فكره وهو اللي يطمر ويدخل وسط دويرة ,,ال مشمل,, ويعلم الشيخ بالفكره وجازت للشيخ و يطلع من دويرتهم ويدرعم وسط دويرة ,,ال مجنب,, ويعلم شيخهم بالفكره وجازت للشيخ بالحيل ووقفوا الحرب

وطلبوا من ابو البصل انه ينفذ فكرته

وقام ابو البصل ونادى له رجال من ,,ال مشمل,, ورجال من ,,ال مجنب,, ووقفهم جنب بعض وخلى رجال ,,ال مشمل,, يسار ورجال ,,ال مجنب,, يمين وربطهم بشطرطون ( لزقه ) وفكهم يمشون الا يوم ضبطت المشيه ماعاد فيه حذفه لا يمين ولا يسار واستانسوا اهل القبيلتين على هالاختراع وتصالحت القبيلتين وصار اللي يبي يعرس ماياخذ الا من القبيله الثانيه حتى يربطونه بحرمته وسووا حفله كبيره بيكرمون فيها ابو البصل واجتمعوا اهل القبيلتين وجالس بالمنصه شيخين القبيله مربوطين مع بعض بمشكبيات وطلع لهم ابو البصل على المنصه والناس تصفق وقالوا له المشايخ : تستاهل يابو البصل انا نكرمك وبنعطيك اعلى وسام في قبيلتنا ومافيه احد قبلك قد خذه ولا بياخذه ومن اليوم وساير اهل القبيلتين بينادونك باسم هالوسام ؟ ؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
وسام ..ابو البصل... راعي المرطباق ...