- بسم الله الرحمن الرحيم
- الغريب في الأمر والقهر :
بسم الله الرحمن الرحيم
راح أحاول أختصر لكم الحديث عن الرحلة ولكن كان ندائي لجميع أعضاء المنتدى فقط لمحاولة توضيح نقاط يمكن أكون نسيت شئ منها ولكن راح أحاول أن أساعد كل من يريد الاستفسار عن شئ بالمراسلة على الخاص ..
أولا وصلنا الى تركيا يوم الخميس 24 / 8 ( ميلادي ) الى استنبول ومن استنبول الى انطاليا ( معاي ولد عمي وواحد من أصحابي ) وبصراحة كانت من اجمل الرحلات ( صحيح ما تصلح للعائلة الخليجية بس لا يروح بالكم بعيد يوم اني امدحها )
أول يوم كنت أنا وولد عمي فقط طبعا نزلنا الأكوا بارك تبع فندق ديدمان انطاليا وما قدرنا نتغلب على التعب نمنا على وقت المغربية ولا صحينا الا الساعة 6.30 الصباح راح علينا اليوم الأول :112: لكن بصراحة ارتحنا كثير اليوم الثاني نزلنا الى الأكوا بارك ( مو مصدقين المدينة المائية ) وقبل ما ننزل نبي نروح الى موظف الاستقبال علشان نوصيه على صاحبي اذا وصل وسأل يبلغه انا موجودين في الاكوا بارك لأني مخلي الجوال في السفتي بوكس وبالصدفة وأنا في اللوبي الا وصاحبي قدامي الحمد لله على السلامة سلمنا عليه ووديناه الغرفة بدل وسريع على الاكوا بارك وبعدها تقريبا الساعة 3 رحنا على وسط المدينة في منطقة تسمى على ما أعتقد كلاتشي اللي صار فيها التفجير ( طبعا اليوم الثاني ، الحمد لله سلمنا ) رحنا زرنا المسجد اللي فيها ناسي اسمه والله بس هو معروف وزرنا المتحف الصغير اللي مجنبه وتغدينا ومرينا على مكتب سياحي نسأل عن الأماكن السياحية ولقينا الرافتنق ( التجديف في مياه شبيهة بالنهر )ورجعنا على الفندق خويي تعبان ونرجع ونريح الى الساعة 10 في الليل من ازعاج حفل الزواج اللي في الفندق بس من جد ممتع طلعنا نتعشى وندور لنا على مقهى نتقهوا فيه ورجعنا بعد 3 ساعات
ونمنا وصحينا بدري استعداد للرحلة صدقوني اللي ما طلع شبيه لهالرحلة صدقوني باقي ما كملت البسطة عنده ، مدحي لها بسبب الطبيعة وبرودة الماء وعذوبتها وتعرفنا على قروب كامل ايراني وشوي اسرائيلي ويوم عرفو انا عرب ومن السعودية مستغربين صدقوني مو مدح بس كنت أتمنى من الجميع معاملة الأجنبي في بلده بكل احترام مهما كان الشخص من وين ( صدقوني مو تعاطف مع الاسرائلييني لعنة الله عليهم لكن غيرهم من أتراك أو ايرانيين ) المهم الايرانيين كانو معانا تمام والاسرائليني مافيه أي احتكاك بيننا الا عند التصوير سألو من وين قلنا لهم وسألناهم وعرفنا انهم اسرائليين .
الغريب في الأمر والقهر :
الايرانيين طلعو معانا في نفس الفندق وسألناهم بكم ماخذين الغرفة طلع بأقل من نص السعر والله العظيم قالوا لنا ماخذينه ب 50 دولار وأنا وولد عمي دافعين 128 دولار ويوم وصل خويي زاد 30 يورو على الاكسترا بد طبعا وش كان ردهم انتو سعوديين فلوسكم كثيرة مهما كان سعودي كويتي اماراتي بحريني عماني قطري كلنا أهل بس من المفروض علينا ما نظلم بعضنا في كل مكان فيه الفقير والغني ليه نظلم اللي متوسط الدخل ويبي يسافر صدقوني للمعلومية ((اللي يبي أسعار حلوة ورخيصة يراسلني على الخاص بسبب أنظمة المنتدى بعد اذن المشرفين واحترامي لهم ))
المهم عادينا نسينا الموضوع حنا رحنا نتمشى ما رحنا نتحسر بعد الرحلة رجعنا الى الفندق استرخينا وشوي وتجهزنا وطلعنا نتمشى نتعرف على مناطق ثانية من انطاليا طبعا ما نطلع مع التكاسي أسعارهم نار معتمدين على الباصات خط البلدة جربوها صدقوني راح تنبسطون عليها بس راح أقول لكم ما تصلح في استنبول ( وجهة نظر ) المهم اتفقوا معنا العائلة الايرانية على رحلة مع بعض قلنا لهم تعبانين بكرة ما نقدر بعده اوكي سألونا طيب بكرة وين قلنا راحة والأكوا بارك قالوا أوكي نتقابل في الأكوا بارك
بالفعل تقابلنا وبصراحة كانت ممتعة الألعاب بعدها جاء عندنا عريسهم اللي هو الولد وطلب يبي ينسخ السي دي تبع رحلة الرافتنق وقال لنا انه مسافرين اليوم الثاني ، المهم كل يوم على نفس الموال لكن المرة هذي زادت مواجعنا أكثر بسبب انا رحنا الى الشاطئ المجاور للشيراتون وبعد ما تمشينا قلنا نبي نستفسر عن أسعار الفندق وحنا رايحين للشيراتون فيه فندق قريب مجاور له وبنفس الفخامة حبينا نسأل بكم سعر الغرفة كانت غالية وبالصدفة تقابلنا مع أخ مصري شغال مع مكتب سياحي في فترة الصيف وبدينا ناخذ ونعطي معاه بالسواليف عاد ما صدقنا نلقى عربي المهم قمنا نسأل وقال لنا حنا جاين ومعانا قروب كامل من مصر وتكون تكلفة الشخص الواحد من تذاكر سفر واقامة 8 أيام / سبع ليالي ( 1920 ريال سعودي ) قهر والا لا ؟؟؟؟
اليوم الأخير كلمنا المكتب السياحي على رحلة السفاري وبصراحة ما كانت على ما توقعنا بس حليوة تعرفنا على أكثر من منطقة وهذا اللي حلاها رجعنا نتجهز ونرتب الشناط وقلنا نريح ونقوم كالعادة ولكن ما قمنا الا الساعة6 اليوم الثاني من التعب نزلنا أفطرنا وسوينا التشك آوت ومشينا على المطار الى استنبول وصلنا وعلى الفندق وللأسف الله يسامح الموظف تبع المكتب اللي حجزنا من عنده قال لنا الفندق في تكسيم وطلع في شيشلي طبع كلمناه وكنسلنا الحجز مرينا على مكتب سياحي تركي حبينا نحجز في مرمرة وللنصيحة اللي يبي يسكن في تكسيم لا يسكن الا في مرمرة بسبب الموقع ( خيالي ) المهم كانت أغلب الفنادق فل قلنا ديدمان قال عليكم الثلاثة 130 دولار وسعر اغرفة المزدوجة في الأصل 130 يورو ، شفتو الفرق مع اني متأكد ان انغلب علينا بس بالمقارنة مع أسعارنا في الخليج أفضل بكثير ونصيحة للعوائل الخليجية يامرمرة والا برى تكسيم بسبب خوفي عليهم تحس ان الاتراك اللي يتكلمون عربي أكبر نصابين وخوفي على أخواني اللي بيروح ومعاه عائلة ..
المهم عنده المواصلات نار نار وكنا ناخذ المترو من الفندق ونرجع بالتاكسي أضعاف مضاعفة طبعا اليوم الأول كانت جولة عند ميدان الاستقلال في تكسيم واليوم الثاني جولة في مسجد السلطان أحمد مع السوق المصري وجولة في مضيق البسفور( بالعمر كله ) واكتفينا رحلات كنسلنا الأميرات وبورصة من التعب بس مو مشكلة اللي يسأل عن أسعرها راح أرسله لمكتب سعره مناسب مرة
أما الأسواق بصراحة عندهم مجمع جواهر في شيشلي يسوى مجمعاتنا اللي في السعودية كلها من بضائع أو المجمع نفسه مع احترامي لمجمعاتنا كلها ..
وللإفادة كانت تكلفة الشخص الواحد ما يقارب من 8 إلى 9 آلاف ريال سعدي كانت من المفروض من 5 إلى 6 آلاف لكن كل دقة بتعليمة ..
أي استفسار من إخواني أنا جاهز في أي وقت وأتمنى ما أكون طولت عليكم لكن صدقوني فيه كلام كثير حاولت اختصره لكن كان اهتمامي في الأول والأخير مساعدة اخواني أعضاء المنتى باللي أقدر عليه وأكبر شئ حرصني على الاهتمام في كتابة هذا الموضع هو أني أعرف عوائل كنسلت رحلاتها بسبب غلى الأسعار .
وآسف مرة ثانية اذا كنت طولت عليكم
أرى انه من حسن حظكم ان الغيتم الرحلة لجزر الاميرات فهي متعبة على لاشيء ( وجهة نظر شخصية )
حفظكم الله ورعاكم