مرحبا
اول شي مبروك مقدماُ
ثاني شي يعتمد عليك طويل العمر .. المناطق متنوعة
يا انك تجمع بين
نيويورك و فلوريدا
أو
كاليفورنيا و فيغاس
و لكل من هذه المناطق مميزات تختلف عن الاخرى
خذلك لفه على التقارير المصورة و بتشوف اللى يسرك

اخوي مبروك مقدما وكنت انا فاتح ابعطيك رايي بس لقيت الاخ no nick ذكر نفس الشي الي ابقوله لك
بالتوفيق اخوي

الف مبروك ..
اخوي في نص فبراير و في نيويورك .. بصراحة مابي اخوفك
بس بيصير شهر العسل .. شهر ثلج
بالنسبة لاورلاندو لاس فيقاس الجو بيكون لابأس حلوو
بس نيويورك مرة برد ماراح تتهنون خاصه انك في شهر عسل
بالتوفيق لك

مشكورين ع الردود الحلوة
بس ممكن مقترحات لأماكن أقدر أزورها يعني ولايات أخرى يكون الجو فيها حلو

1. أعتقد يكفي اورلاندو 5 الى 6 أيام ...

بحكم ان الجو راح يكون بارد في نيويورك أنصحك ما تطول فيها يعني تخليها محطة للوصول والمغادرة وأصلاً هي ما تستاهل أكثر من يومين ثلاثة بالكثير ..
أنا ما أدري كم مدة سفرتك أو الخطوط الي جاي عليها .. لكن أبفترض انك واصل على الخطوط السعودية لنيويورك .. راح توصل الصباح .. تريح فيها يومين ثم تركب إلى حيث المتعة ( كاليفورنيا ) وبما انك أول مرة تزور أمريكا أنصحك تبدأ بكاليفورنيا وتحديداً لازم تشوف : لوس انجلوس وضواحيها مثل اناهايم وارفاين - سان فرانسيسكو ممتازة كزيارة أولى - سان دييقو ..... وكل هالمدن ممكن تتنقل بينهم بالسيارة والمسافات بسيطة ساعتين تقريباً بالسيارة مع ملاحظة أن القيادة والسفر بالسيارة في امريكا = متعة لا تضاهى ..
بعد ما تخلص هالجولة والي يكفيها من ال 12 إلى ال 15 يوم بوجهة نظري تتجه للخيال والروعة ( لاس فيقاس ) وعلى فكرة تقدر تروح بالسيارة وكلها 240 ميل يعني 4 ساعات ويا محلا الطريق الصحراوي الي بين لوس انجلوس ولاس فيقاس .. في لاس فيقاس بتجد متعه عجيبة .. انت متزوج حديثاً يعني راح تجد ضالتك في الفنادق الفخمة والتسوق في أسواقها وطبعاً العروض المبهرة وأولها عرض ( مستير ) في فندق تريجر آيلاند لا يفوتك خطير .
لاس فيقاس أعتقد تكفيها 4 أيام كاملة .. بعدها وبحكم أن الميانة انفكت بينك وبين المدام نوعاً ما
يجي وقت التنطط واللعب والعودة لأيام الطفولة ----------------> إلى اورلاندو ( طبعا بالطيارة ) ولا تحجز سيارة ترا ما راح تحتاجها .. كل الموضوع تكسي من والى المطار ومشوارين ثلاثة .. والسكن انصحك بفندق في وسط الديزني اسمه ( هيلتون ليك بونا فيستا ) ممتاز جداً سكنته مرتين وحتى فيه مطعم ايطالي مجنون .. ولا تنسا تخصص يوم كامل لليونيفرسال استوديو لأنها ممتازة للكبار وايضاً يوم للسي وورلد بس يكون بعد مشوار لسوق مثل كاليفورنيا مول مثلاً لأن السي وورلد صغيرة والعابها الي عليها الكلام محدودة ..

أعتقد يكفي اورلاندو 5 الى 6 أيام ...

بعدها ترجع لنيويورك تبات فيها ليلة قبل السفر ... أو اذا حاب ممكن تخلي الوصول لنيويورك والمغادرة من واشنطن عشان تشوف واشنطن بالمرة لأن الخطوط السعودية توصل وتقلع من هالمحطتين ... واذا بتسوي كذا واشنطن يكفيها 2 إلى 3 أيام ..
اخوي هذا على عجالة اقتراحي لك وترا سويته على استعجال وباختصار وبدون تفاصيل الفنادق واماكن الزيارة والطيران ..... الخ لأن الوقت خاني ونا خوك ودخولي للمنتدى أصبح محدود لكثرة اشغالي لكن لازم ارد لها المنتدى لو القليل من الكثير الي قدمه لي ..
ملاحظة : بناءً على خبرتي المتواضعة وزيارتي لأمريكا 5 مرات وكلها بغرض السياحه .. أعتقد ان من يزور امريكا كسائح لأول مرة يجب عليه ألا يخرج عن ( كاليفورنيا عموماً + لاس فيقاس + اورلاندو ) وطبعاً يعتمد على مدة البقاء في الولايات المتحدة فمن اجازته شهر ونصف اكيد ممكن يطلع عنها لكن انا اتكلم من سفرته من ال 15 الى ال 20 يوم وحولها ..
الف مبروك وموفق ان شاء الله .
mode

أخوي mode
ألف ألف ألف شكر ع المعلومات الحلوة وإلي أكثر من رائعة
بصراحة أفدتني كثير الله يجزاك خير ، والوضع كذا تغير لأني بصراحة أول مرة أروح وشهر عسل يعني لازم الواحد يفكر زين وين الأماكن الحلوة و إلي فيها الوناسة أكثر ، وبعدين حبيت أقولك أخوي بأن مدة السفرة إن شاء الله 18 يوم تقريباً ، ممكن لو سمحت توزعها بطريقتك الرائعة بحكم خبرتك ، وبعدين أنا طالع مباشرة من الرياض و أفضل الخطوط السعودية لأنها بتطلع مباشرة لنيويورك وإلا وش رايك، وأسف ع الإطالة والإزعاج أخوي ...
تيحاتي لك يالغالي

السلام عليكم
اختار لك طيران الامارات له طيارة مباشرة الى لوس انجلوس
والعودة ممكن تكون من نيويورك

1. Gentle man


2. ألف ألف ألف شكر ع المعلومات الحلوة وإلي أكثر من رائعة

Gentle man

ألف ألف ألف شكر ع المعلومات الحلوة وإلي أكثر من رائعة

بصراحة أفدتني كثير الله يجزاك خير ، والوضع كذا تغير لأني بصراحة أول مرة أروح وشهر عسل يعني لازم الواحد يفكر زين وين الأماكن الحلوة و إلي فيها الوناسة أكثر ، وبعدين حبيت أقولك أخوي بأن مدة السفرة إن شاء الله 18 يوم تقريباً ، ممكن لو سمحت توزعها بطريقتك الرائعة بحكم خبرتك ، وبعدين أنا طالع مباشرة من الرياض و أفضل الخطوط السعودية لأنها بتطلع مباشرة لنيويورك وإلا وش رايك، وأسف ع الإطالة والإزعاج أخوي ...
تيحاتي لك يالغالي
لا شكر على واجب وتامر امر ..
بخصوص الطيران فانا شخصياً افضل السعودية .
أما جدول الرحلة فبصراحة 18 يوم مضغوطه مرة وقليلة على اقتراحي لكن اقترح عليك التالي :
وصول لنيويورك : يوم الوصول من السعودية + يوم ثاني .. بعدها اقلاع ثالث يوم للوس انجلوس
وصول للوس انجلوس : يوم الوصول من نيويورك + 6 أيام .. بعدها الذهاب للاس فيقاس في اليوم ال 10
واغلب مدة بقائك في كاليفورنيا تتركز في البفرلي هيلز ( صن ست - هوليوود - يونيفرسال استوديو - روديو درايف ... الخ ) واناهايم وايرفاين وسانتا مونيكا والثيرد ستريت وغيره من ضواحي لوس انجلوس ... وما اعتقد بناء ً على مدة سفرتك يمديك تغطي سان فرانسيسكو وسان دييقو لكن ممكن تنقز من الصباح بدري لسان دييقو في يوم وترجع .. يعني البيتش على سان دييقو زو ( حديقة الحيوان ) على الداون تاون بيمديك عليها لكن بيصير يوم مرهق .
وصول للاس فيقاس : يوم الوصول من كاليفورنيا + 3 أيام .. بعدها اقلاع إلى اورلاندو في اليوم ال 14 ولأن المسافة بعيدة وفيه فارق توقيت فأكيد راح توصل اورلاندو واليوم ال 14 قد راح عليك ..
وصول لأورلاندو : تنام وتريح من الرحلة الطويلة في اليوم ال 14 وتقضي الأيام 15 - 16 - 17 - 18 وبعدها لنيويورك للعودة والي يريحك بتجي قبل الرحلة بيوم تنام في نيويورك أو قبل رحلة الخطوط السعودية بساعات مع العلم ان رحلة السعودية من نيويورك للرياض الساعة 2 الظهر .
هذا مقترح بسيط لل 18 يوم وترا كل شي يعتمد على مزاجك ومدى ميولك وهواياتك في السفر .. يعني ماهو شرط يناسب هالمقترح الكل .. لأن فيه ناس تكره التنقل وتحب تستقر وناس لا عادي عندها التنقل وتحبه ... عشان كذا اتمنى هالمقترح يساعدك على الأقل ..
ملاحظة : نيويورك + لاس فيقاس + اورلاندو = لا تستأجر سيارة .
موفق ان شالله
mode

mode
مشكور يالغالي وبالعكس مزاجك مره رائع وعلى فكرة احتمال أخر الرحلة لنهايل أبريل لأن كثير ناس نصحوني علشان البرد ، وبعدين الأيام ممكن تتمدد ، بس عندي إستفسار بسيط أخوي أنا قالي أحد الشباب بما انك أول مرة تروح أفضل شي تكون دخلتك وطلعتك من البلد من مطار واشنطن أفضل من نيويورك لأن تعاملهم أرقى وأسهل في الإجراء ، فهل فعلاً هل المعلومة ؟
وأسف ع الإطالة وتقبل تحياتي يالغالي ..