السلام عليكم و رحمة الله وبركاته ..
اولاً احب اشكر جميع اعضاء المنتدى على جهودهم العنيفة في خدمة جميع المسافرين .. والله اني استفدت و قاعد استفيد الكثير الكثير من مواضيعكم.... الشكر عام لكل البوابات.. و لبوابة النمسا خصوصاً..
مالكم بالطويلة .. ربنا انعم علي و زرت السفارة النمساوية في الرياض اخيرا و قدمت اوراقي في يوم الاربعاء الموافق 6-8-2008
طبعاً رحت و حاولت قد ما اقدر اني ما اغفل عن اي من التفاصيل بالنسبة للاوراق المطلوبة.. كل شي كان موجود معي (فاوتشرات, .. تقدرون تقولون اني كنت مسلح تسليح كامل بكل انواع الاوراق الرسمية و لكن أغفلت شي بسيط (غير مهم اساساً) راح اجي على ذكره من خلال الموضوع ..
وصلت الساعة 8:30 .. و اكتشفت ان الدوام يبداً في ال 9:00 .. و خذلك محاولات مع الهندي حق البوابة انه يعطيني رقم بس .. لكنها كانت مقفلة معه اخر تقفيلة و ما رضى ..
رجعت السيارة و سويت فاينل تشيك على كل اوراقي .. و سمعت بعض المصالة الموجودة عل ام بي سي افم ام .. و عدى الوقت .. رجعتله و الحمدلله كان رقمي 1 ..
اول ما وصلت قعدت شوي استكشف المكان حواليني ... شوي تقوم الموظفة تناديني .. حظي الردي خلاني أطيح في اللبنانية اللي ما تتسمى .. و اخذت كل اوراقي و اوراقي زوجتي .. و قعدت تحوس و تحوس و نادت العجوز اللي معهم و واحد ثاني و كانوا غير عرب.. تبي تطلع غلطة بس .. المهم و هي قاعدة تدور اناظر في الموظف الثاني ((اليمني)) .. و اشوفه يتصفح موضوع الاخ آخر الفرسان..!! و قاعد يقراه بحماس .. و الحمدلله ان الشباب يكتبون بأسماء مستعارة .. و للا كان محد تمت الموافقة على روحته للنمسا .. خاصة مع كثرة الحش عليهم هنا في المنتدى
في هذه الاثناء و عودةً للبنانية اللي تشيك اوراقنا.... جتني مع ابتسامة صفراء على الريق..إتسامة واحد حصل ثغرة و مبسوط .. و تقولي بكل سخافة ... جوازك القديم معاك!؟ ليش يا بنت الحلال اش تبغون فيه!؟
قالت انت كاتب ان جوازك تشنجن قبل كذا .. و الفيزا القديمة في جوازك القديم .. لازم اثبات يثبت صحة إدعائك !!:112: يا ساتر !
قلتلها لا والله مو معي .. و يمكن اني رميته بعد .. و اصلاً الجواز مامنه فايدة بعد ما ينتهي(disposable) و حسستها ان طلبها غبي .. و لو اني كاتب انه ما تشنقن كان اصرفلي .. قالت لو عندك منه كوبي .. ارسله لنا بالفاكس .. قلتلها و لو ما عندي !؟؟ قالت تروح إدارة الجوازات على قولتها و اطلب منهم انهم يعطونك نسخة من الجواز القديم !!؟؟ معقولة !؟ ليه العباطة و التعقيد !؟ وشلون الجوازات يعطوني جوازي المشنقن و الجواز اصلا هم ما اخذوه بعد انتهائه و لا دروا عن الفيزا اساساً ..!؟؟
المهم انه الحمدلله قبلوا اوراقي مع الوعد اني ارسلهم صورة الشنقن القديمة بالفاكس .. طلعت بعدها للدوام و كلمت زوجتي ترسلها لهم بالفاكس و خلصنا الحمدلله ...
الشاهد من الموضوع: لاتغفلون هالنقطة و هي احضار الجوازات القديمة اذا كانت الجديدة غير مشنقنة .. او الحل الثاني .. كتابة ان الجواز ما تشنقن من اساسه و ريح راسك ...
