- السلام عليكم جميعا ورحمة الله .....
السلام عليكم جميعا ورحمة الله .....
بصراحة صار لي اسبوعين راجعة من سويسرا وابغي اكتب تقريري عن هذي السفرة بس والله مب هاين علي اني رجعت اه يا سويسرا والله اني غير جميلة سبحان الله بكل معنى الكلمة جميلة وبسبب الاجازة القصيرة لم اقض فيها سوى 9 ليالي تقريبا وان شاء الله المرة الجاية ابقى فيها شهر على الاقل ... يمكن اشبع منها مع اني ما اعتقد انه الواحد يشبع من هذا المكان ...
اخواني واخوات الاعضاء اشكركم جميعا لانني لولا الله ثم انتم لما فكرت في سويسرا بالذات ...
المهم انا مب شاطرة في الكتابة وسرد التفاصيل
ما عليه اتحملوني بحاول على كثر ما اقدر اني اجمع كل شي ...
احم احم ... رحلتنا كانت على الخطوط الاماراتية من دبي بتاريخ 8/8/2007 وكنا ما شاء الله قروب من 8 اشخاص وما بينا أطفال المهم وصلنا زيورخ الساعة 9:30 مساء بتوقيت سويسرا وكانت الشمس توها بادية تغرب ....
وهذي بعض الصور من زيوريخ ....
في زيورخ كنا حاجزين في فندق سويس أوتيل والفندق حلو وجنب محطة القطار وسعره فنان ...
خذنا جولة سريعة في زيورخ وثاني يوم تحركنا على مونترو ............... اه على مونترو ....
شو اقول عن مونترو وعلى فكرة هذي ثاني زيارة لي لسويسرا بس المرة اللي طافت رحنا لوزان هذي المرة ما لقينا حجز في فنادق لوزان فقلنا خلنا نشوف مونتريه لان لقينا حجز على فندق الجراند هوتيل سويس ماجستيك ....طبعا الفندق هذا تعيس بمعنى الكلمة ... تعبان على الاخر طبعا اطلالة الفندق روعة وقريب جدد من محطة القطار بس بصراحة من داخل تعبان جدا جدا جدا بالرغم من غلاء سعره والله ما اعرف على شو .... المهم على طول عنسلنا حجزنا فيه ودورنالنا بروحنا على فندق ثاني ولقينا في فندق ثاني من مجموعة البيست ويسترن وكان وايد اوكي واطلالته روعة وسعره احلى ... المهم نقلنا اغراضنا الفندق الثاني وهذا الفندق باين في الصور هو الفندق الابيض والازرق اعلى فندق على بحيرة ليمان ومطل مباشرة على البحيرة ... نزلنا وتمشينا في مونتريه والجو كان رائع والمطر طول اليوم والغيم نازل سبحان الله ولكم هذي الصور من مونترو ...
خذنا في نفس اليوم رحلة بحريه في بحيرة ليمان انطلقت الساعة 8 مساء وخذنا تقريبا ساعتين في البحيرة وثلجنا من البرد والمطر وكان يوم لا ينسى ..... بس سامحوني صور الرحلة البحرية ما وافتني فيهم اختي لين الحين ...
ثاني يوم في مونترو قررنا انه نزور مصنع النستله ...
ترقبوا باقي التقرير وفيه صور حصرية لاحلى كاكاو في العالم كاييه
اشوفكم باجر ان شاء الله مع الحلقة الثانية
