أنا صار لي كذا يوم متفاجىء بأسعار الفنادق في دبي و اللي أشوفها بالنازل فنزلوا الأسعار غصب.
على العموم ميزانية ال 1000 درهم ان شاء الله بتكفيكم لسكن ممتاز و خذوا لكم فرة على شقق و فنادق الروتانا على الموقع http://www.rotana.com/ و اختاروا بين دبي و الشارقة.
و انصحكم تشوفوا الموقع https://www.booking.com وحاولوا تحددوا خيارتكم أكثر و نحن ان شاء الله بننصحكم باللي نعرفه.

اخوي الله لا يهينك
ماني جاهل بمواقع النت ولا طريقة الحجز
ودخلت على مواقع كثيرة وشفت الاسعار بس المشكلة مثل ما قلتلك انا عليمي بدبي, يعني ما ادل هل المكان هذا قريب من الخدمات او من الاماكن اللي ذكرت اني ابغى ازورها وكيف نظافته وخدماته....الخ
شاكر لك اخي ومقدر والله يجزاك الجنة

السلام عليكم
اخوي الكريم إذا المدة 3 أيام ما انصحك بالسكن فالشارقة ، عشان تستغل الوقت.
إنت ماذكرتلنا تريد غرفة وصالة ولا غرفتين وصالة ، لأن الأسعار تختلف.
شقق تشلسي تاور نظيفة ومناسبة للعوائل -على شارع الشيخ زايد- قريب من الإمارات مول ولمارينا وسوق جميرا ... وتحت الفندق العديد من المطاعم.
شقق جولدن توليب، قريب من الإمارات مول.
http://www.goldentulipsuitesdubai.com/Gallery.aspx
الأسعار فالرابط:
https://artravelers.com/p/re/192351

• أو تاخذلك غرفتين بينهم باب في فندق كراون بلازا سعر الغرفة من النت 500درهم

الفندق ملاصق للفستفال سنتر وجديد
https://artravelers.com/p/re/202780

• اخوي أسأل عن شقق الواحة إن شاء الله تلقاها بسعر ممتاز ، في جميرا

https://artravelers.com/p/re/124984

• برجمان روتانا غرفه+صالة =800درهم ، ملاصق لمركز برجمان

http://www.rotana.com/hotelaccom-11-4-2.htm
.

اولا بارك الله فيك يا بنت الرجال
ثانيا ابغى طبعا غرفتين وصالة
ثالثا كراون بلازا ارخص سعر حصلته للغرفة العادية 1335 درهم, وشقق الواحة 1226, وكذلك باقي اللي ذكرتيه
وانا ابغى الف درهم وتحت مو فوق
شاكر لك مساعدتك وما نستغني والله

اسف جدا جدا جدا
نسيت اقولكم اني جاي شهر 10 يعني شوال - اكتوبر
هل راح تكون دبي زحمة
يعني ارجع للفكرة الاولى اللي هي استاجر سيارة ويكون السكن في الشارقة, بس ما دري كيف ادل الاماكن اللي ابغاها في دبي
الله يسعدكم ويجزاكم كل خير وييسر اموركم ويشرح صدوركم وللمسلمين مثلها الاحياء والاموات

يا أخي الكريم لو انك جاي في فترة جيتكس فدبي بتكون قمة الإزدحام.
سكن الشارقة ممكن يتاسبك بشرط ما تخرج من سكنك قبل 9 صباحا و لا ترجع له قبل 9 مساء لأن الإزدحام كريه جدا. و سيكون أيضا عندك فترة ساعتين من 1:00 الى 3:00 ظهرا يخف فيها الإزدحام ويمكن أن ترجع للشارقة لو اضطريت. لكن من ال 4:00 مساء الى 9:00 ستكون رحلة عذاب من دبي إلى الشارقة. و في جميع الأحوال تجنب القيادة في دبي من ال 5 الى 8 مساء للمشاوير التي تحتاج الى عبور الجسور لأنها فترة خروج الموظفين و عودتهم الى البيوت
.
بالنسبة للأماكن اللي ذكرتها ا سأرتبها لك حسب قربها من الشارقة:
مدهش
ستي سنتر
فستفال ستي
برجمان
سوق التنين
مول الامارات
الجميرة
المارينا
ابن بطوطة

قول آمين
الله يحرمك على النار ويسعد قلبك ويرزقك الذرية الصالحة انت ومن تحب والمسلمين
انا جاي تحديدا 10/10/2008 طبعا مادري متى دبي جايتكس ولو كان وقت جيتي فالحمدلله على هذا التقدير الطيب.
اذا وافقتني اني استاجر سيارة, واسكن في الشارقة فبقي الفنادق. اتذكر اني قرات تقرير لبعض الاخوة مدحو فيها شقق المها ريجنسي وتوليب ان الشارقة, ان كنت تراها مناسبة وما في احسن منها فايهم اختار.
جزاكم الله خير

اخوي الكريم الأسعار في شهر أكتوبر ترتفع .
يعني حالياً ما أقدر أعطيك الأسعار الأكيدة.لغاية أول شهر أكتوبر
سعر لكراون بلازا (الفستفال) 500درهم للغرفة من هالموقع، طبعاً هذا سعره الحالي
https://www.booking.com/airport/ae/DXB.html?aid=1300939
جولدن توليب أسعاره أقل عن ال1000 للغرفتين وصالة.
وإذا شفت أسعار الشارقة تناسبك ، لاتحاتي الشوارع والطرق مليانه لوحات إرشادية أبداً مابتضيع تقريباً على كل شارع وبدون مبالغة... سواء بأسماء المناطق أو الأماكن السياحية.
وتستأجر سياره أفضل من التاكسي
اضيف عالأماكن المذكوره:

• عرض الدلافين ممتع في حديقة الخور(دبي)
• الباص البرمائي أو يسمى الباص العجيب(دبي)
• الكافية الثلجي(دبي)
• سوق مدينة جميرا قريب جداً من برج العرب المطاعم جلستاهم حلوه عالنهر الصناعي
• مربى الشارقة للأحيار المائية
• قناة القصباء فالشارقة

https://artravelers.com/p/re/191790
ورحلة سعيدة بإذن الله
.

أحب أشكرك أخي الكريم على طلب المساعدة مني .. أتمنى أكون قد الثقة اللي أعطيتني اياها
في موقع Booking.com لقيت شقق Xclusive في شهر أكتوبر بسعر 960 درهم
وهذا أرخص الشقق المضمونة .. يعني اللي أقدر أرشحلك اياها بدون مشاكل بإذن الله
شوف هالتقرير
https://artravelers.com/p/re/181635
لأن الشقق اللي ماجربتها أخاف يكون فيها ملهى ليلي .. مثل الكثير من شقق دبي الرخيصة
وعلى فكرة .. في شهر أكتوبر مدينة مدهش ماراح تكون مفتوحة .. لأنها من ضمن فعاليات مفاجآت صيف دبي
وإذا كنت تبي تزور كل هالأماكن في 3 أيام .. الأفضل تسكن في دبي .. لأن الطريق بين دبي والشارقة زحمة غير طبيعية
وإذا تبي تروح كل هالأماكن بسرعة .. الأفضل تروح بتاكسي .. بس بيكون شوي أغلى من تأجير السيارة .. بس أسرع بما انك أول مرة تروح
والمشكلة بعد بوابات سالك .. يعني لو ضيعت الطريق وقعدت تدور بالسيارة .. غير انك بتضيع وقت وبتصرف بترول .. ممكن تمر على بوابة سالك أكثر من مرة .. ويحسب عليك 4 درهم في كل مرة (ومكاتب تأجير السيارات يحسبونها عليك 5 درهم)
وترى في 4 بوبات لسالك في دبي .. بس بحد أقصى يحسبون عليك 24 درهم في اليوم
بس لازم تعرف مواقع الأماكن اللي بتروحلها .. يعني مثلا:
سيتي سنتر وفستيفال سيتي قريبين من بعض .. وهم في ديرة
برجمان في بر دبي .. وقريب من الشقق اللي أعطيتك اياها
جميرا والمارينا في نفس الشارع .. اسمه شارع الجميرا
مول الإمارات وابن بطوطة في في الشارع الموازي لشارع الجميرا .. واسمه شارع الشيخ زايد
مول الإمارات بالضبط مقابل قرية الجميرا
وابن بطوطة قريب من المارينا
أبعد واحد فيهم هو سوق التنين .. وهو يعتبر معزول عن وسط دبي وعن الأماكن السياحية
عالعموم إذا تبي تدل أي مكان ..ممكن تتصل على الاستعلامات السياحية ورقمهم 700017000
بس طبعا المكالمة أغلى من المكالمات العادية .. أعتقد الدقيقة بدرهم
وممكن يدلونك على أي مكان في دبي
وبالنسبة للملاهي العائلية .. مافي في دبي غير وندر لاند حاليا (الباقيين تحت الإنشاء) .. وهي موجودة بجانب حديقة الخور .. مقابل سيتي سنتر
وأنصحك تشوف خريطة دبي .. وتحاول تحدد الأماكن
وأنصحك تاخذ جهاز GPS إذا كنت بتسوق .. بس حط في بالك ان الشوارع في دبي تتغير بسرعة .. بالتالي يمكن الخريطة في الجهاز ماتكون دقيقة 100%
وأي استفسار آخر أنا وباقي الأعضاء حاضرين
وأنصحك تركز على ردود بنوتة الإمارات .. وايد مرتبة ومفيدة من ناحية ترتيب جدول سياحي في دبي