السلام عليكم ..
أعتذر اخواني عن التأخر في كتابة هالتقرير رغم بساطته ..
انشغلت من رجعتي بتعب الأولاد وأشغال البيت اللي ما تخلص ..
مثل ما وعدتكم .. أنقل لكم صور عن هالسكن اللي كان نكبة بالنسبة لنا .. يقولون انه 4 نجوم !!
وهو ما يستاهل نجمتين
حرصت أنزل هالتقرير عنه في موضوع مستقل رغم ان لي ردود بهالشيء ..
لكن مو الكل ينتبه للردود فحرصت ان الكل ينتبه و يعرف عنه ويكون في الصورة وما يطيح طيحتنا ..
الفندق ميزته الوحيدة قربه من البرجين وإطلالة الغرفة ..
شقتنا تطل على المسجد وهالشيء يشرح الصدر .. خصوصا مع صوت الأذان ..
هذي صورة المسبح
وهذا هو المسجد ... جنبنا ما يبي له غير خطوتين ...
وهذا البرجين .. منظر ولا أروع ..
هذا الجانب الحلو ...
وهالحين نجي للجانب القبيح ..
السكن مستواه رديء .. الأثاث قديم ومو بنظيف .. خصوص الحمام يجيب الهم ... هو أكثر شيء ما قدرت أتحمله ...
وإزعاج إزعاج .. أصوات عالية من العاملين و وقربعة في آخر الليل
ما يستجيبون لطلبك بسرعة .. يعني يبي لنا عشر طعش مرة نكلمهم على شغلة معينة .. رادين بالشعب !!
اللوبي يجيب التكة .. من شفته أول وصولنا وأنا حاطة يدي على قلبي ..
الممرات ضيقة ومظلمة ...
عربة التنظيف تستقبلك في الدخلة والطلعة طول اليوم قدام المصعد .. وما يبعدونها إلا بالليل ..
لأنها ببساطة ما تدخل في الممر بين الغرف من ضيقه ..
غير مجمع الزبايل اللي في آخر الممر !!!! على الأقل حطوا باب .. ستارة .. أي شيء يغطي منظرها البشع !!!
أترككم مع بعض الصور تحكمون بأنفسكم ..
الموكيت
المطبخ .. يمكن الفضايح مو مبينة كثير لأن التصوير من جوال ..
غير ان وحدة من اللمبات خربانة فما فيه إضائة جيدة
من قريب ..
الحمام وآآآآه من الحمام
مقبض الباب
من قريب ..
البانيو ..
هذا أكثر شيء جاب لي الهم .. للأسف لا الإضاءة ولا كاميرة الجوال البايخ ساعدت على توضيح هالشيء
حتى تسرب الماء من الرشاش اللي لافينه بلزق مو مبين ..
هذا الممر وقدام المصعد .. كاميرة جوال فمو واضح مرة .. لكنه أساسا مظلم ومحترقة بعض لمباته ..
ولأننا بالليل طبعا شالوا عربة التنظيف .. لكن في آخر السيب زبايل كان ودي اني أصورها لكم ..
قلت لولدي اقرب شوي عند المصعد عشان تكون الصورة واضحة لكنه رجع خايف يقول ما قدرت فيه ضاطور قدام المصعد !
هذا كل شيء عندي .. وأتمنى اني أفدتكم ..
وأعتذر مرة ثانية لتأخري ولردائة التصوير اللي ما وضحت العيوب بشكل أكبر .