تحية طيبه للجميع
وكل عام وانتم بخير
انا مشكلتي اني راجعت السفارة الفرنسية في الرياض عشان اخذ الشنغن
وما دريت انها اعقد سفاره في الاتحاد الاوربي المهم كان باقي يوم واحد على السفره
والجواز ما طلع اخذت الجواز من عندهم وقلت العوض على الله ما فيه باريس الصيف هذا
لين شار علي اخي العزيز scott44 وقال مالك الا بريطانيا خلال 24 ساعة تاخذ التاشيرة
وفعلا سافرت للندن ، واستمتعت جدا فيها والفضل بعد الله لاخي الكريم scott44
تحياتي

صحيح اللي يقرا اللي كاتبته ررومانة مايدري شسالفة بس تراني ذكية وفهمت قصدهاا..
وأتكلم عن نفسي والمشاكل الي واجهتني.. طبعا بقول سالفة وحدة من بين المواقف الكثيرة اللي كانت تصير لي وأغلبها مبكي بس احيان في مضحك..
طبعاً خبركم حنا في بلدنا معتمدين اعتماد كلي على السائق (ماراح اقول الأب ولا الأخ ماحد فاضي لأحد ) في قضاء المشاوير عشان كذا انا وحدة من الناس تعودت ما أثبت على الشوارع يعني المهم اني اوصل غايتي.. بس لما رحت فرنسا بغرض الدراسة اكتشفت ان هالسالفة كانت عائق كبير بالنسبة لي.. يعني اعرف اطلع من الشقة اللي كنت ساكنة فيها وأوصل المكان اللي ابيه بسلام بس ماعرف ارجع للشقة لأني اضيع اسامي الشوارع وبالعربي ماكنت اصلاً افكر مجرد تفكير اني اقرى اسم الشارع الي كنت امر فيه.. والله احيان اقضي مشي اكثر من ساعتين وأنا ادور مكاني
لين بيوم من الأيام ضعت وأنا راجعة الشقة وقعدت احوس على رجلي لمدة طويلة وكنت وقتها تعبانة أبي اتذكر اسم الشارع اللي اعبر فيه كل يوم ماني قادرة اتذكره.. وكل ماشفت فرنسي ولا فرنسية سألتهم بس مافي فايدة (مايحتاج اقولكم ان العنوان كان مكتوب بورقة في شنطتي والورقة من الخوف نسيت سالفتها ).. إلين مدري من وين جا بطريقي لبناني وأنا من زود التعب وثقت فيه على طول ووصلني الشقة ومن بعدها ماطلع غير بدفتر وقلم وكل مامشيت بشارع سجلت اسمه وأحيان اصوره بعد
وسلامتكم

الموقف الي صار لي
اني عادة احط كل اوراقي وبطاقاتي وفلوسي في المحفضه
والمحفضه في الجيب الخلفي في البنطلون
وفي يوم من الأيام حست ان المحفضه ثقيله
قلت اخفف منها
طبعاً شليت الأوراق الغير ضرورية
والبطاقات البنكيه الي ماراح احتاج لها لأني متعامل مع اكثر من 5 بنوك
ومعي فيزيتن
وخليت معي فقط بطاقتين صراف مع فيزه وحده
ونزلت بطاقة الأحوال والرخصه وكل هذا بسبب اني ابي اخفف من المحفضه
ورحت لجالري لافييت
وفي اول دخولي فقدت المحفضه
وبحثت عنها ولم اجدها
واتصلت على البنوك التي بطاقاتها في المحفضه والغيتها
والحمد لله لم يسحب منها اي شي
ولكن الي قاهرني
توني صارف 600 يورو وكانت في المحفضه
والمحفضه نفسها توني شاريها قبل السفر وهي ماركة دنهيل
يالله ما اقول الا الحمد لله
ان الخساره في المال وليس في الأرواح لأني معي زوجتي وبنتي
وفي نفس الوقت الحمد لله اني قبل لا اطلع نزلت باقي البطاقات ولا كان جالس اشحت هناك

تان تان
هلا بك اخوي تان تان
فعلا موقف صعب والحمدلله اللي جت على قد كيذا
بس المره الثانيه لاتحط المحفظه في الجيب الخلفي ان كان ولا بد فيه الشنط الصغيره الهاندباج خاصه للرجال مره حلوه او حط اغراضك بشنطة المدام
ومشكور لمرورك

بالنسبه لي احب ابدا من بداية الرحله من هنا في الرياض
حجزنا من مكتب على خطوط الاتحاد بس المكتب مو الوكيل الرسمي للاتحاد ..طبعا الوكيل مكتب المواسم او مكتب الاتحاد نفسه .. المهم كانت رحلتنا في الذهاب فيها ترانزيت لابوظبي ليله كامله .. وطلبنا من المكتب انه يضبط لنا الاوتيل في ابوظبي..
طبعا المكتب مانتبه او نسى ولما رجعنا ناكد على الطلب ارسل الاوراق بس صادفت ايام عطله للمكتب
ولما وصلنا ابوظبي تفاجئنا ان الطلب ماوصلهم!!
بس كانوا الاتحاد مره متعاونين وبدل مايخلونا ناخذ اوتيل دبرولنا من عندهم لان الطلب بالكثير يوصلهم بعد 4 او 6 ساعات ..
ومن هنا احب انه يتم تلافي هالموقف او ان الواحد بيضطر ياخذ اوتيل على حسابه
لما سالنا الوكيل قال لو انكم حاجزين من عندنا كان علطول ينزل لكم طلب بدون ماتقدمون عليه مثل المكاتب الثانيه وهذي فايدة الوكلاء
والمواقف كثيره والمشاكل بس يالله وروني مشاركاتكم

تان تان
سالفتك فعلاً تصير ياتان تان.. وكثير بس أنا من راي رمانة حاول ماتحط محفظتك بالجيب الخلفي..
عموماً انا عندي مداخلة خطيرة جداً.. ياترى انت تسافر وتاخذ معك بطاقة الأحوال
انا فهمت من كلامك ان البطاقة تكون معاك بالسفر وهذا بحد ذاته مشكلة ولا ايش رايك

romanah
هذي غلطتي للأسف
وحتى الرخصه كانت معي
لأني نسيت انزلها في الرياض

تصدقون ما عمري واجهت هالمشاكل اللي تقولون .... حول اللغة في اي مكان بالعالم اتكلم انجليزي سواء في فرنسا او الصين او سويسرا والكل يحاول يتجاوب معي ومني كلمه ومنه كلمه وتنحل المشكلة حتى الشرطة هناك فرندلي جدا جدا يسولفون وياخذون ويعطون ( يموتون في زيزو ) السرقات تصير بكل محل في العالم ( احد الزملاء مسروق جواله من يده عند محطة بنزين بالرياض قبل ايام ) اما العنصرية فلم اقابل حياتي اي شخص في اي مكان في العالم وحط من قدري لاني ملون او مسلم بل اني اجد في فرنسا وسويسرا كل الاحترام مع العلم اني ممكن البس ثوب وزوجتي تلبس عباية ومحجبة وكانت معي خالتي الصيف الماضي وكانت مغطيه وجهها بعد ووالله العظيم لم اجد الا كل احترام ... والعيد اللي قبل 10 ايام عيدت في سويسرا في مونترو وجاري ارسل لي هدية يوم عرف ان فيه عيد .... الحق يقال انا شخصيا استغرب من من بعض المشاكل اللي تطرح مع العلم اني ما اخلي شارع والا سكة الا لازم ادخل واتفرج ... يا جماعة الخير لازم نشوف هل المشكلة بالشعب اللي قدامنا والا فينا بمعنى تصرفاتنا هي اللي تحكم تعامل الاخرين معنا ... اكرر اسفي ولكن قلت اطرح رايي من باب الانصاف وعرض التجربة ... مع العلم اني تقابلت مع بعض الاعضاء وشاف وشلون اعيش هناك والراحة والسعادة في الوقت اللي قضيناه مع بعض ... تحياتي ... scott

والله عاد اسمعوا الحريص ماراح ينسرق منه شي أبد
شوفولنا مشكله غير السرقات نقدر نحلها
طيب سمعت ان فيه مشكله هي مشكلة أفياش الكهرب في فنادقهم تختلف عن اللي عندنا اللي يبي يشحن اللاب توب ولا الجوال ولا الكاميرا بيتورط
عشان نجيب معنا قسامات الكهرب
إذا احد الأعضاء مرت عليه هالمعلومه لايبخلبها علينا