عندي اقتراحين لك
الاول .. من زيلامسي الى انترلاكن وتقضي فيها 4 ايام واليوم الخامس تطلع على
يورب بارك على طول وتقضون النهار فيها وترجعون لزيورخ واليوم السادس تروح تسلم السيارة في كوستانس
وتقضي باقي اليوم في زيورخ للتسوق
الثاني نفس الشي من زيلامسي الى انترلاكن 3 ايام وبعدها 3 ايام زيورخ اليوم الاول تقضونه لوزيرن وانتوا طالعين من
انترلاكن الى زيورخ الى المسا وبعدها تروحون زيورخ واليوم الثاني تطلعون بدري لليورب بارك وترجعون نفس اليوم
واليوم الثالث ترجعون السيارة في كوستانس وتقضون باقي اليوم في زيورخ
جنيف وزيرمات ما أنصح تسيرولهن لانهن بعيد وبتتعبون من كثر الخطوط والسيارة
انترلاكن بامكانك الرجوع للدليل السياحي لأبو عزيز واختيار الانسب لكم واقترح عليكم زيارة البلوسي وزيارة الشلالات
المحيطة بأنترلاكن ويمكن تزورون قمة جنغفرو وزيارتها يبالها يوم كامل تقريبا لان الطريق للقمة ياخذ وقت

الله يعطيك العافية اخوي المقدام شكلك خبير من جد تصدق قبل اشوف كلامك دخلت على استفسار واحد يسأل عن زرمات ورد عليه واحد يقول انه زارها من قبل المدينة صحيح صحية ولا فيها سيارات بس تصلح لشياب واللي حاب ياخذ راحة ونقاء الجو
لذلك استبعدتها من زيارتي لسويسرا وكذلك لوقانو لبعد ومشقة الطريق إليها وكذلك جنيف بعيد الطري إليها 3 ساعات من انترلكن ولا يستدعي زيارتها غير البحيرة وبعض الاسواق اللي ممكن اشوفها في زيورخ
يعني انترلكن 3 ايام بعدين زيارة خاطفة من الصباح الساعة 9 حتى الساعة السادسة تكفي لوزيرن بعدين التوجه لزيورخ للاستعداد ليوم خاص لليورب بارك بعدين بعدين يوم نرجع فيه السيارة والرجوع لزيورخ لتسوق والتمشية بعده صحية من الصباح ريوق دسم وتمشي قليلا بعدين التوجه للمطار الساعة 9ونصف ونودع سويسرا والنمسا كلام سليم ولا ايش رايك اخوي المقدام

والله انا مانصحك بانتر لاكن لان البحيره مو داخلها مو مثل لوزيرن
لاكن انتر لاكن فيها الشلالات وتركب البارشوت منها وايضا من انتر لاكن تذهب الى قمه جونغفورو اعلى ثاني قمه في العالم 4540 متر وتذهب لها عن طريق القطار
اذا تبي مدينه استجمام فا انصحك بمونتروو وهي قريبه من جنيف حوالي 70 او 80 كيلو
جنيف لاتستحق الزياره الا بالكرنفال فقط لاكن دامك قربت منها لايمنع تتقهوى فيها وتشوف النافوره ايضا
واذا كنت ساكن بمونترو تقدر تروح لشامونيه وتزور ايضا مدينه اسمها انسي فرنسيه قريبه منها حوالي 150 كيلو
يعني بتقدر تستمتع ولا اني افضل مونترو العشق

والله مدري احترت اللحين طيب ايش نقول 3 ايام انترلكن تكفيها زياراتها واجد
قممة الجنغفرو يوم كامل شكلها كذا
الشلالات الثلاثة بختار منها اثنين قيس باخ ورخن باخ والوانق شلوخت فست وشلوخت اوست يوم
بحيرة اوشن سي والزحليقة الصيفية والبلوسي البحيرة الزرقاء يوم بعد كذا
التوجه إلى منترو والتمشيية فيها 3إلى 4 ساعات بعد ذلك التوجه إلى لوزيرن والتمشية فيها 3 إلى 4 ساعات كذا كملت يوم شحططة بعدها التوجه إلى زيورخ والسكن فيها 3 ايام وزيارة اليورب بارك في اليوم قبل الاخير بعدها التمشي في زيورخ حتى الليل بعدها نصحى الصباح بدري لاكمال التمشية في زيورخ بعدها الوجه للمطار وتسليم السيارة والعودة للوطن ايش رايكم كويس

مونترو اصرف النظر عنها بسبب قلة المدة وبسبب انها تقع عكس اتجاه لوزيرن
وبالنسبة لوموضوعك الاخر عن هايدي لاند فمن رأيي تزورونها وانتوا قادمين من زيلامسي متوجهين
الى انترلاكن وتخلونها نقطة استراحة لانها تقريبا على الطريق يعني تطلع شي بسيط من الطريق
وايضا هي في منتصف المسافة تقريبا بحيث تبعد عن زيلامسي 349 كم وتبعد عن انترلاكن 194 كم
ولأن الخط متعب على طول يعني وانتوا طالعين من زيلامسي الى انترلاكن فلازم تكون منطقة استراحة
في الطريق او تريحون مرتين ... المرة الاولى ممكن تريحون في انسبروك والثانية في بيت هايدي
وعندهم عند بيت هايدي كوفي شوب جميل واطلاته رائعه وعلى فكرة اعتقد بيت هايدي الزيارات
له تنتهي الساعه الخامسة مساءا
وبالنسبة للاحداثيات والمكان شوف هالموضوع لأبو عزيز وبيفيدك ان شاء الله

وبالنسبة لانترلاكن الشلالات تقدر تزورها كلها او اغلبها في نفس اليوم وقمة جنغفرو اذا كنتوا زرتوا القمة
الموجودة في كابرون اشوف مالها داعي تزورونها لانها بتاخذ منكم اليوم كامل
وبالنسبة انك تقول اني خبير فأنا اكتسبت خبرتي البسيطة من قراءة المواضيع الرائعه فيها المنتدى
الجميل وخصوصا الدليل السياحي لسويسرا لعمدتنا ابو عزيز جزاه الله الف خير وايضا ان الاماكن اللي انت
ناوي تزورها كانت شبيهه ببرنامجي والمناطق اللي زرتها هذي السنه والسنه الماضيه
واي استفسار انا حاضر اخوي واتنمى لك رحلة موفقه

صحيح سوف ازور كابرون في فينا يعني من رايك ما اروح لقمة الجنغفرو مالها داعي يعني ماراح اتندم اني مازرتها انا من النوع اللي يحب الثلوج والقمم
طيب ايش رايك يا الغالي ترتبني بجدول واكون لك من الشاكرين من يوم اطلع من زيلامسي مع العلم اني غيرت رايي بتسليم السيارةفي مدينة كونستنز بسبب بعد المكان وراح يضيع علي يوم الله يعين ادفع زيادة 1000 ريال واسلمها في المطار ولا يضيع علي يوم كامل لتسليم السيارة غاوي خسارة ولا غاوي ضياع الوقت
يعني رتبني بارك الله فيك في جدول من زيلامسي حتى زيورخ بالايام اليوم السادس الساعة 9 صباحا لازم اكون في المطار اسلم السيارة وطيارتي الساعة 11 ونصف

حاضرين ان شاء الله
بعد ماتطلع من زيلامسي طبعا بدري يعني الساعه 9 او 10 على اقل تقدير تتوجه الى انسبروك حوالي
ساعه و 45 دقيقه توصل زيلامسي وتتمشى في اسواقها شوي خصوصا السوق القديم بتحصل باركنات
هناك مقابل السوبرماركت واسمه markthalle تطلع من البراكنج وتخلي السوبر ماركت في ظهرك
ووتمشي حوالي 100 متر بتشوف المدينه القديمة امامك على اليمين تتمشى فيها وتتغدا وبعدها تطلع
لهايدي لاند والمسافه 207 كم تقريبا وتقضون فيها بعض الوقت
وبعدها تتطلعون لانترلاكن وطبعا بتوصلون المسا ترتاحون وتعشون
اليوم الثاني التوجه الى البحيرة الزرقاء والزحليقة الصيفية في كاندرستيج والافضل اول شي الزحليقة الصيفية
وبعدين البحيرة الزرقاء ويمكن تتغدون في البحيرة الزرقاء وهو مطعم واحد فيها يسوون اسماك فيه
وبعدها ترجعون انترلاكن ( للذهاب للزحليقة الصيفية لازم تركبون تلفريك يوصلكم فوق واول ماتوصلون بتشوفون
الزحليقة بجنبكم وفيه بحيرة هناك لكن المشي لها صعب شوي خصوصا الرجعه لانها تمشون في مصعاد ومسافه
طويلة شوي) بامكانك الرجوع لهذا الموضوع للاحداثيات وهو للعضو طوكيو
https://artravelers.com/p/re/409140
والمسا تتمشون في انترلاكن
اليوم الثالث تزورون بعض الشلالات القريبة لانترلاكن في الفترة الصباحية وبعدها تتغدون وبعد الغدا التوجه لشلال
reichenbachfall وبعد الشلال اذا تحبون تركبون قارب (طراد) في قرية brienz وبامكانكم بالقارب الوصول الى مصب
شلال giessbach ويبعد 2 كيلو متر وشوي في الجهه المقابلة وتاخذون يمين شوي
ومكان تأجير القوارب بالقرب من محطة القطار ومكتب البريد
ايضا تقدرون تزورون قرية جرينوالد اذا فيه وقت في اليوم الاول او الثاني وفيها زحليقة حلوه اسمها pfingstegg
اليوم الرابع تتطلعون لزيورخ وانتوا بالطريق تمرون لوزيرن وتقضون اليوم فيها بزيارة السوق القديم والجسر
الخشبي وبعدها تتطلعن لزيورخ (او تقضون الثلاث ايام في لوزيرن ) المهم توصلون لزيورخ وتريحون
واليوم الخامس الذهاب ليورب بارك واليوم الاخير للتسوق والتمشي في زيورخ
واتمنى ان ترجع لتقارير الاعضاء وخصوصا الدليل السياحي لاختيار ما يناسبكم من برامج خصوصا انترلاكن ولوزيرن

يعطيك العافية ماقصرت يالذيب
يعني 3 ايام انترلاكن بعدين 3 ايام لوزيرن او زيورخ ايهما افضل وهل يمكن زيارة يوربا بارك من لوزيرن ولا المسافة بعيده يعني ممكن اخلي يوم في لوزيرن ويومين زيورخ وفي اليوم الثاني في زيورخ اتمشى فيها واتوجه للمطار