1. http://www.cochemer-sesselbahn.de/cms/index.php/chair-lift


2. صور من النت عن كوخيم

قرية كوخيم COCHEM
تقع كوخيم في الغرب الالماني
قرية جميله ونوعا ما هاديه ولكن ليس الهدوء الممل
وهي تعتبر سياحيه من وجهة نظري
حيث تتميز بطرازها المعماري الذي يرجع للعصور الوسطي بالاضافة لوجود المرتفعات الخضراء ومرور نهر الموزل فيها
وعلى امتداد هذا النهر بتشوفون المطاعم والمقاهي المطله ع النهر واللي اليلسه فيها ترد الروح
بالاضافه انه في جزء مخصص لألعاب الاطفال ، وسوبرماكت وأسواق
ومقابل النهر يوجد سنتر المدينه اللي عباره عن سكيك قديمه وفيها الكثير من المحلات والمطاعم ومنها مطاعم تركيه والتمشي في هالجانب جدا ممتع وحلو
وع الجهه الثانيه من هالنهر بتشوفون مزارع العنب الموجود ه ع منحدرات الجبال واللي منظرها يريح النفس والعين
وممكن تسيرون للجهه المقابله مشي مجرد تعبرون الجسور اللي تربط بينهم
وهالجسر هو بنفسه مكان جميل تشوفون النهر من زاويه جميله وخلابه تستحق انك تتصور وتكون خلفيه لصورك
وأذكر بعد في هاذيج الجهه فيه سوبرماركت كبير مره سرنا واتشرينا منه بس للاسف ماصورته
قرية كوخيم فيها كثير من الانشطه وبخبركم عن بعضها ...
1- وجود تلفريك يصعدلك لين فوق وهناك عندك عدة اشياء ممكن تسويها:-

• الجلوس في الكوفي والمطل ع قرية كوخيم الجميله
• المشي في الغابه
• المشي لمسافه طويله لمدينة العاب

وهاي ما انصحكم فيها لأنه المسافه بعيده والافضل تسيرون بالسياره لها
((هنيه استوالنا موقفين بخبركم عنه عقب ويالصور ))
عنوان التلفريك
Endertstraße 44
2Cochem
2- قصر رايشسبورج
هذا مازرته تعرفون أنا مب راعيت متاحف وقصور بس شكله جميل من قرية كوخيم
موقع القصر من النت
http://www.burg-cochem.de/english/business_hours.htm
3- فيها مدينة العاب وفي نفس مدينة الالعاب حديقة حيوان صغيره
بعد هاي مازرتها
موقعهم ع النت
http://www.freizeitpark-klotten.de/
4- جوله ع السفينه في النهر وأحلى وقت قبل الغروب عشان لما تظلم تصير كوخيم جميله بالاضاءه المنعكسه ع النهر
5- قطار سياحي يأخذك في جوله حوالين القريه ويعبر الجسر وياخذك في جوله للجهه الثانيه
6- جوله في القرى اللي حواليها وهاي فيها الكثير من مزارع العنب وبتشوفون في أشجار لفواكه مختلفه بس أكثر شي عنب ، وهاي القرى أحيانا تكون عندهم فيها احتفالات متنوعه
هاذيل اللي أذكرهم من أنشطة سياحيه في قرية كوخيم
والجزء الثاني بآخذكم لأماكن حوالين كوخيم
بعض المواقع اللي فيها معلومات أكثر عن كوخيم
فيديو لقرية كوخيم ومعالمها
وهذا فيديو ثاني

http://www.cochemer-sesselbahn.de/cms/index.php/chair-lift

صور من النت عن كوخيم

https://www.google.ae/search?q=%D9%83%D9%88%D8%AE%D9%8A%D9%85&espv=2&biw=1366&bih=643&tbm=isch&imgil=FRjAKAFMD8zasM%253A%253B5WaFsIiNXVO0CM%253Bhttp%25253A%25252F%25252Fwww.travelzad.com%25252Fvb%25252Ft20351-12.html&source=iu&pf=m&fir=FRjAKAFMD8zasM%253A%252C5WaFsIiNXVO0CM%252C_&usg=__Fr4aq2ABMUSijKbf2F-jttejVhk%3D&ved=0CDoQyjc&ei=V_1XVMScLoTTaOzkgKAM
موقع كوخيم السياحي
http://www.cochem.de/tourismus/en/index
أخيرا صور من تصويري

هذا النهر اللي يتوسط قرية كوخيم

لوخذيتوا جوله بالسفينه قراب المغرب بتشوفون هاي الاضاءه الجميله المنعكسه ع النهر

لو حبيتوا تتمشون ، موجود ممشى خاص بجانب النهر

أو حبيتوا تسوون رياضه

شلوا وياكم بقايا خبزكم وانتوا سايرين تتمشون عند النهر لأنه هناك يتريونكم البط والوز

هذا الجسر اللي تعبرون منه للجهه الثانيه

اذا تعبتوا من المشي فهناك يلسات مطله ع النهر

واذا ضقتوا بتحصلون شطرنج كبيره ممكن تلعبون مع أحبابكم

وفيه ورود جميله تتصورن عدالها
تذكرت الهنود اللي عندنا يوم كانوا ايلسون عدال الورد ويتصورون في الشارع ونحن نضحك ونعلق عليهم ، ودار الزمن وسوينا شراتهم في بلاد الالمان

اذا عيالكم طفروكم وتعبوا من المشي ، ممكن تريحونهم في منطقة الالعاب

منتجعنا موقعه ع مرتفع عن القريه ، وأغلب طلعاتكم لازم تنزلون لين سنتر القريه ع النهر وتسيرون وجهتكم

أغلب الايام اللي قضيناها في كوخيم كان الجو جميل وحلو

مزارع العنب ع المرتفعات في الجهه الثانيه من النهر

مقابل النهر شارع رئيسي ومن عقبه ايي النهروع امتداد هالنهر تصطف المحلات والمطاعم والفنادق

مره من المرات قررنا نتعشى في مطعم من هالمطاعم
واخترنا واحد يقدم استيكات بس ماعجبنا وايد بس اليلسه والاجواء كانت تجنن

هاي مدينة الالعاب اللي مازرناها

مره من المرات طلعنا كلنا ويالقروب وتجولنا في القرى اللي حوالين كوخيم وشفنا الكثير من مزارع العنب والقرى الجميله وخساره انه ماعطيناهم حقهم وتمشينا أكثر فيهم

في الشارع هاي الفواكه

شوفوا العنب اللي ينباع في السوبرماركت

مثل ماتشوفون كلها مزارع ، وشوارع منسقه بالورود ، وأنهار
مناظر تسر الناظرين

الواقع أجمل من صوري

نتابع جولتنا
في سنتر المدينه مطاعم تركيه ومحلات وكوفيهات

وهاي القلعه المشهوره عندهم وتقدرون تشوفونها من شارع كوخيم لأنها موجوده ع مرتفع

التلفريك

قطعنا التذاكر وركبنا التلفريك وصعدنا وكان هاليووم الجو بارد وممطر

نحن صعدنا بالتلفريك وغيرنا يصعد ع ريوله

أول ماوصلنا فوق شفنا واحد يصورنا
وسألونا اذا نحب نشتري الصور ولكن الصور مابيسلمونها ياها في نفس الوقت انما بيرسلونها لنا البلاد
انا ماكنت موافقه ولكن بوعيسى وافق تحت أصرار البنات وبالفعل صدقوا ووصلت صورنا البلاد عقب فتره
نكمل عقب ماوصلنا فوق شفنا جدامنا طريجين

واحد يويدنا صوب الكوفي شوب وهذا عدالنا والثاني صوب الالعاب
قلنا خلينا نشوف الالعاب وعقب نرجع صوب الكوفي
ومشينا مشي الله لايوريكم
المشكله مب في المشي المشكله انه صب علينا المطر صبيب وهواء والجو بارد ، ونحن معتقدين انه المكان بيكون قريب
وكل مامشينا أكثر نقول الحين بنوصل ولكن مانشوف الالعاب
والمشكله الثانيه انه مب قادرين نرجع
وتمينا جذي لين أخيرا وصلنا
وأول ماوصلنا دخلنا في مطعم مدينة الالعاب اللي كان عند المدخل نحتمي من الامطار
وشفنا الوضع مايسمح انه ندخل وقررنا من يتوقف المطر نرجع صوب الكوفي
ولما خف المطر رجعنا بسرعه ، بس الصراحه هذا اليوم كان ممتع وايد
أحس عشنا مغامره جميله

عقب مارجعنا سرنا صوب الكوفي وتفاجأت بالمنظر الجميل ع قرية كوخيم
هنيه وقفت بمظلتي أتأمل الجمال وبنتي تصورني وانا ما أدري

شوفوا هاليلسه والمنظر اللي يخبل

بس نحن يلسنا داخل ماقدرنا من المطرنيلس برع

طلباتنا كانت كلها آيس كريم

وكان طلب بنتي المفاجأه
بعد ماوصل وكلت منه شوي شكينا في الطعم وسألت الموظفه اذا الايس كريم خالي من الكحول وطلع انه هالطلب الوحيد اللي فيه كحول
عصبت عليها وقلتلها انتي تعرفين انه نحن مسلمين ومانآكل أي شي فيه كحول ، أعتذرت وعقب يتنا المسؤوله واعتذرت وبدلونا الايس كريم

وبهالجزء أختم تقريري عن قرية كوخيم اتمنى انها عجبتكم مثل ماعجبتنا

تابعوني في الجزء الثاني
رحلاتنا حول المدن القريبه من كوخيم

روعه يا ام عيسى
مدينة الالعاب فيها زحليقة حلوه
بارك الله فيج

قرية رائعة ام عيسى
وجولة كانت حماسيه
يعطيك العافية

قرية جميلة جدا عزيزتي ومناظرها رائعة وفيها أشياء ومناشط سياحية متنوعة
السنتر جدا رايق ومرتب وشرح
والفيديو عن السنتر مسوي شغل وحركات بالتقرير
معلومات جميلة ومفصلة لمن يرغب بزيارة هذه القرية
دمت بود

قايد
الله يعافيكم يارب

اهلا بالبدايات الجميله واهلا بقرية كوخيم الجميله
بداية رائعه ي ام عيسى ولاشك هالمناظر تسر الناظرين
شكل العنب يفتح النفس والايسكريم ودي اكل حتى الكاسه معاه ام
وزين عصبتي عليهم واعتذرو منك والمفروض لمن طلبتي بلغتيهم هذولا ناس تغرف وتعطي مايهمهم
عدستك مميزه ومع هالمناظر اللي تشرح الخاطر حتماً سنتابع تقريرك المميز
يعطيك العافية

الصراحه الصور والناظر في غاية الجمال

ماشاء الله تبارك الله تقرير مميز وقرية جميلة ودنا الله يعطيك العافية بالاحداثيات وغشتك رحمة الله