محاولة جديدة وتجربة جديدة
فى العرب المسافرين .
أعتقد أنها ستفيد نوعية معينه من المسافرين
عامه ولبعض الشباب المصرى خاصة
أرجو أن لاتنسى التفاصيل الدقيقة فى هذة الرحلة
صف مشاعرك وتجربتك وأنطباعك عن الناس والمدينه والتجربة عامة
يسعدنى متابعتك

1. السلام عليكم


2. المهم خد منه الباسبور وورقه بيضه صغيره بتقول اني ليا 6 شهور في امريكا


3. وريتله العنوان وقولتله هتاخد كام؟؟ قالي لما نوصل لما نوصل

السلام عليكم

نكمل الحكايه، المهم حجزت طيران من اكسبيديا وسافرت علي اسبانيا عملت ترانزيت وكان الترانزيت بتاعي 4 ساعات تقريبا علشان بعد كده اخد طياره نيويورك، نزلت من الطياره ودخلت المطار ادور علي حد يقولي اروح الجيت بتاعتي ازاي فوانا واقف لمحت واحد شكله مصري فقربت منه وسالته ، وطلع فعلا مصري وقالي انا كمان رايح نيويورك استني معايا وسالنا في الاستعلامات وكانت بنت ملامحها اسيويه كده قالتلنا استنوا الباص هينقلكم المطار التاني ودردشنا شويه انا والراجل طلع انه كان عايش في امريكا وانه نزل مصر من كذا سنه و فكر انه يرجع تاني ، كان تقريبا في اواخر الاربعينات وكان محترم جدا وفضلنا نتكلم علي مالباص جيه وركبنا وفضل ماشي بينا مسافه كبيره جدا
اه والله مشي بينا كتير قوي لدرجة اني قولت للراجل هو احنا هنركب طياره نيويورك من مطار باريس ولا ايه فضل يضحك ،
وصلنا المطار التاني الحمد لله فضلنا تقريبا 4 او 5 ساعات في انتظار الطياره لحد ما ركبنا
المهم ركبنا الطياره وحظي الجميل وقع في الكرسي اللي في النص وعلي يميني بنت أمريكيه في العشرينات كده بس زي القمر وعلي شمالي راجل عجوز وجنبه راجل كمان، يعني مش هعرف أتمشي في الطياره واتحرك براحتي علشان اكيد مش كل شويه هقومهم وبالذات ان البنت بدأ تفرد حاجتها ، يعني طلعت الآي باد وكتب وحركات كتير كده
وبعد 3ساعات كنت عايز اروح الحمام وبعد تردد قولتلها ممكن أعدي قالتلي أتفضل بس حسيت انها عايزه تكلني بسنانها ههه وفضلت 10 دقايق تقريبا تلم في حاجتها اللي فرشاها في كل مكان.
المهم الطياره وصلت علي الساعه 11 بليل بتوقيت نيويورك وخلو بالكم اني من الفجر بتوقيت مصر صاحي يعني تقريبا داخل في 20 ساعه
نزلت من الطياره ودخلت المطار لاقيت طابور طويل انا اتخضيت بصراحه، قولت دانا هخرج بعد اسبوع :-)
فضلت اتفرج علي المطار لاقيت علم امريكا في كل حته بس لاحظت ان المطار عادي زي كل المطارات اللي شوفتها هو نظيف جداً طبعا بس مفهوش حاجه مختلفه
المهم فضلت في الطابور اكتر من ساعتين وكان في كزا طابور جنبنا وكنت انا العربي الوحيد تقريبا، كلهم أمريكان واوروبيين ، شويه كدا وبضرب بعيني لاقيت مجموعه كبيره من اليهود اللي بيلبسو البدل السودا والطواقي السودا الطويله وعملين ضفرتين
وطبعا كانت اول مره اشوف الناس دي بس كان احساس غريب بصراحه لما شوفتهم وقولت في سري ( انتوا بقي اللي مدوخين الدنيا كلها ومبهدليين الفلسطينيين والعرب ومطلعين عنينا، ربنا يحرقكم ياولاد التيت)
طبعا كنت بفكر في الاسئله اللي هتتسأيلي عند شباك الظابط وانا اصلا كنت رايح معرض بعد 10 ايام وكنت قلقان يقولي جاي بدري ليه ؟

• دخلت عليه وكل اللي قالهولي انت جاي لمعرض؟ قولتله ايوه

بس معرفش عرف ازاي ، الظاهر ان الابلكيشن اللي بعمله علي النت وببعته للسفاره علشان اخد الفيزا بيكون كل البينات اللي انا كاتبها بتكون قدامه علي الكمبيوتر ( ده تخمين الله اعلم)

المهم خد منه الباسبور وورقه بيضه صغيره بتقول اني ليا 6 شهور في امريكا

خرجت من باب المطار وبضرب بعيني لاقيت حفله بتتعمل عليا، شويه سواقين جم نحيتي وفضلو يقولولي أتفضل معانا وعايزيني اركب التاكسي اللي عليه الدور باي طريقه ، بس انا لاحظت حاجه ان انا بس اللي هجموا عليا كده مع ان كان في ناس تانيه خرجه معايا من المطار، بس تفسيري للموضوع ده ان كان باين عليا اني جديد واول مره انزل امريكا
المهم الدور كان سواق من اصل هندي زي درفه الباب بالظبط طويل جداً وعريض جداً ماشاء الله عليه بغل.

وريتله العنوان وقولتله هتاخد كام؟؟ قالي لما نوصل لما نوصل

قولتله لا لا لا لازم اعرف دلوقتي فضل برضو يقولي لما نوصل، المهم انا ركبت التاكسي ويارتني ماركبته، بس الغريب انه لونه كان اسود مش اصفر زي مابنشوف في الافلام، وانا مصمم اعرف هياخد كام خاصتا اني مشفتش عداد بيحسب الفلوس لاقيت السواق الهندي ده بيقولي انا هاخد منك 130 دولار،، هوبا هي بقت كده ،،،، المعلم شفاني زبون جديد في امريكا قال ازنجفه بقي ، انا سمعت الرقم مصدقتش وداني قولتله كام ؟ قالي 130 دولار علشان المشوار طويل، وفضل يرغي بقي رغي السنين وانا طبعا قاعد في الكرسي اللي وراه ومرعوب منه ، خايف يطلع مسدس ويموتني ولا حاجه، ماحنا في امريكا بقي
وانا راكب التاكسي ورايح للراجل وبالرغم من الرهبه اللي انا فيها لان دي اول مره اروح امريكا لكن كنت حاسس بسعاده وحاله نفسيه حلوه جدا وحاسس ان الهوا نفسه مختلف وطبعا علشان كنا بالليل مكنتش شايف البلد كويس ورغم كده كان بواضح جدا النضافه وجمال الطرق والمباني .
المهم بعد حوارات كتير واجيله يمين يجيلي شمال اجيله شمال يجيلي يمين ، قولتله ماشي يا عم هديلك اللي انت عايزه ، مانا خفت انزل من التاكسي احسن يحصل لي حاجه وخاصتا ان الساعه بقت واحده ونص تقريبا
المهم وصلنا واديته الفلوس وقولتله في سري غور يا اخي ربنا يكرمك وتلبس في الحيطه ولا تلبس في تريلا
وللحديث بقية بإذن الله

أخى الكريم
وصف دقيق عن تجربة سفر الى نيويورك
أتوقع أنك ستنطلق بعد ذلك الى أفاق عليا فى كتابة التقارير عن كل رحلة
ستخوض غمارها بعد ذلك
فتقريرك يذكرنى بأول تقرير كتبتة فى هذا المنتدى عن رحلتى الى فيتنام
كنت أشعر بصعوبة الكتابة والتحميل والانتقاء والرد
أرجو أن تدعم موضوعك بالصور
فالصور بالنسبة للتقرير كالروح بالنسبة للجسد
لاتحزن من عدم تجاوب الأعضاء
فالبوابة متخمة بموضوعات وتقارير عديدة
ولكن لايمنع أنك تستحق الأشادة لبداياتك الأولى

متحمسين معك ياغالي ,,