بسم الله الرحمن الرحيم
كل عام وانتم بخير
اليوم جايب لكم تقرير مصور عن رحلتنا إلى لؤلؤة الخليج ( البحرين )
حيث قررنا السفر لها وتم إختيار يوم الأحد الماضي للرحلة
وإنطلقنا من الجبيل الصناعية حوالي الساعة 2 بعد الظهر وإليكم الصور
هذي ربى كاشخة ومتجهزه للسفر

وهذا أول ما طلعنا من البيت

أول ما طلعنا من الجبيل الصناعية ( المدينة الجميلة )

وهنا أول ما دخلنا جسر الملك فهد الله يرحمه

وهنا أيضاً

بداية دخول منطقة الجمارك

وهنا زحمة الجمرك
بس الحمد لله كانت الزحمة مقبولة

والجوازات

وهذي أول لوحة إعلانية قابلتنا بعد الإنتهاء من إجراءات الدخول للبحرين

وهذي لوحة سفارة خادم الحرمين الشريفين الله يحفظه

وهنا بعد ما عدينا الجسر
وبما إننا رايحين لسوق واقف فلازم نأخذ مخرج مدينة حمد وهذا كوبريها

وهذي يمكن أوضح شوي

وأخيراً سوق واقف واللي دخلناه تقريباً الساعة 4:30

وآسف ما قدرت أصور أكثر من صورة للسوق لكثرة الحريم فيه
===
وهنا ربى تلعب مع السمك بأحد محلات الملابس

وبعد التسوق طلعنا متوجهين إلى المنامة وخصوصاً إلى مطعم الأصفهاني ( إيراني ) اللي بشارع المعارض
لأننا كنا هلكانين جوع
وصورة من الطريق للمنامة

والوصول للأصفهاني

والله يا عليهم أكل أم وخصوصاً الكباب الأصفهاني شي والله

والمنيو حقتهم

وبعد الطلب جابوا لنا الشوربة اللي على كيف كيفكم وهي ضيافة من عندهم من غير الطلب

وبعدها بدأ يجي طلبنا شوي شوي
أولها السلطة الخضراء
ورقاقات الجبن ( السبرنغ رول )

ثم الدجاج بانيه والكباب الأصفهاني يم يم يم

وبعد الأكل والشبع ولله الحمد شفت لمبتهم وأعجبتني وصورتها لكم

وبعد العشاء قررنا نروح لمجمع السيف لمشاهدة أحد الأفلام العربية المعروضة في السينما
وفي الطريق وعند إشارة المجمع جانا هاك الهندي اللي يوزع منشورات وهذي صورتها

عطانا نسخ كثير شكله متوهق بهم أو يبينا نوزعهم له
طبعا مصيرهم أقرب برميل ( وأنتم بكرامة )
=====
بعد ما وصلنا للسيف جلسنا تقريباً نص ساعة ندور موقف
زحمة ما تتخيلونها
وأخيراً لقينا بحريني يبي يطلع ووقفنا مكانه
وهذا مجمع السيف من المواقف

وهذا الفيلم اللي أخترناه( فلم حسن ومرقص ) بطولة عادل إمام وعمر الشريف

وهذي من داخل القاعة

طبعاً الفيلم يتحدث عن التعايش بين المسلمين والأقباط في مصر وتدور أحداثه بقالب كوميدي مميز
وبعد ساعتين من العرض طلعنا إلا ونتفاجأ إن المجمع بدأ يقفل والناس بدأو يقلون فخرجنا من المجمع
وهذي صورة المجمع كما بدا لنا

وبعد التشاور قررنا نرجع لأرض الوطن
ودخلنا الجسر تقريباً الساعة 12:30 بالليل وتمت الإجراءات بكل يسر وسهولة ولله الحمد
ووصلنا الجبيل الساعة 1:40
وكنا منهكين من يوم حلو وممتع بأرجاء لؤلؤة البحرين وكلنا أمل بزيارة أخرى قريباً
وآسف على الإطالة
وأي إستفسار أنا حاضر
دمتم سالمين