السلام عليكم ورحمة الله وبركاته
اسعد الله اوقاتكم بكل خير
الحمد لله وصلت انا والعائله الغاليه ولاول مره بالنسبه للعائله بزيارة امريكا
كان افلاعنا الساعه 12:15 بعد منتصف الليل قبل البارح
الرياض- باريس(ترانزيت 3ساعات)- اتلانتا (ترانزيت ساعتين ونص)-اورلاندو
مدة الرحله من الرياض الى باريس حوالي 6ساعات
ومن باريس الى اتلانتا حوالي 10 ساعات
ومن اتلانتا الى اورلاندو ساعه وربع
.
.
طبعا حجزي كان بتكت واحد ومع هذا ما استفدت شي
فعند التشيك في الرياض قال ما اقدر اعطيك الا بوردنقات الرياض -باريس
واذا وصلت باريس خذ كرت الصعود حق باريس وحق اتلانتا
وقال عفشك بشيكه الى اورلاندو(والله من الدجه وقلة السنع عندهم)
قلت توكل على الله
المهم وصلنا باريس وطلعنا كروت الصعود حق باريس اتلانتا
وقلت لهم عطوني حق اتلانتا اورلاندو وقالوا نفس كلام اهل الرياض الجهاز مو راضي يطبع
قلنا الشكوى لله
المهم وصلنا اتلانتا بعد التعب والسهر وعدم النوم والدرجة سياحيه يعني انواع التلصاق
الا وقدامنا سرا طويل للجوازات
هذي والله البلشه
والاطفال متعومسين ويبون النوم
المهم ساعه ونص في سرا الجوازات
وبعدها رحنا بسرعه واخذنا عفشنا اللي يقولون السعوديه انك بستلمه في اورلاندو
المهم الوقت بدا يسرع ويداهمنا
بعدها رحت الجمارك وقالوا تعال انت والعائله الكريمه اجلس
فعلا جلسنا عندهم وما ندري وش السالفه
الحقيقه ما اخفي عليكم انا ماخذ ادويه وشكلي زودتها حبتين
وقلت اكيد انهم شكوا في موضوع الادويه
واخر شي جاء واحد وناداني وصارت كل السالفه على موضوع الكاش
وقلت دامها كذا سهالات
المهم عطوني ورقه مطبوع فيها معلوماتي وعناوييني ووقعت عليها وطلعت من عندهم وباقي على الاقلاع
25دقيقه اقول الاقلاع وليس موعد صعود الطائره
وباقي عندنا كروت الصعود وشحن العفش مره اخرى
اول ماطلعت من الجمارك كنا في صاله f
وعلى طول لقينا مسار خاص للعفش الترانزيت وخذوا الشنط وهي في الاصل عليها تاق من الرياض الى اورلاندو
وبعدها رحنا نطلع كروت الصعود وقامت تطقطق فلبينيه غشيمه وقامت واطبعت الكروت
لكن...قالت باقي كرتين مارضى الجهاز يطبعها!!!!؟؟
تقول يطبعونها لك من البوابه
قلنا يالله
وش سالفة ذا الرحله فيها شعرة الذيب؟؟
المهم بعد ما اخذنا الكروت وكان باقي بالضبط 20 دقيقه على الاقلاع
رحنا التفتيش
واربشونا وفصخو انعال حتى الاطفال تكرمون
ومع الربشه نسيت جوالي عندهم
ورحنا وركبنا القطار من صالة f حتى صالة b اللي فيها بوابة الاقلاع
وحنا ركض وفي وسط الطريق تذكرت اني نسيت الجوال
وقلت للاهل خلوكم مكانكم انا برجع بالقطار للصاله الاولى واخذا الجوال وارجع لكم
وقالوا توكل على الله
وبدون مبالغه وللمره الاولى في حياتي كنت اركض في وسط المطار وماعاد فكرت في شي...
المهم اخذت الجوال ورجعت ركض ومن محطة الى محطه حتى وصلت اهلي وكان موعد الاقلاع جاء بالضبط ...
الا ونشوف سيارة قولف في المطار من كبره لتوصيل المسافرين والعاجزين...
والله ونوقفها وننقزع معها وهي ماتدري وش السالفه
قلنا يالله يالسنافيه على b1 وبلغيهم بالجهاز ان حنا معك...
طبعا باقي عندنا كرتين مارضى الجهاز يطبعها(تتذكرون)
وصلنا الكاونتر واطبعت لنا الموضفه الكرتين ودخلنا الطياره والله انهم اغلقوا الباب بعدنا ...
المهم نزلنا اورلاندوا
واخذنا عربيتين للعفش الوحده ب5دولار
والله يا ذا الامريكان يقدرون السنت
انسى انهم ياخذون عربيات للعفش
كلنا يدف شنطته والحرمه تدف والطفل يدف وانت ماشي(الله لايبلانا)
وصل عفشنا اول شي...
ورحنا لقسم اجار السيارات اللي في المطار...
واكثر اللي معنا في المنتدى يتذكر سالفه قبل شهرين
انه فيه موقع ناشيونال والمو للسيارات كان عندهم السستم ضارب وكان يعطي اسعار زهيده ؟؟
المهم انا كنت حاجز من شركة المو في فترة عطل السستم واعطاني سعر رخيص لايكاد يذكر..
واتذكر الاخوان هنا قالوا ان الشركه ارسلت ايميلات تصحح لهم الاسعار..
المهم مالكم في الطويله انا عندي حجزين حجز بسعر رخيص وحجز بالسعر العادي من شركه اخرى في حال ان الشركه رفضت اعطائي السياره...
وصلت الشركه اليوم واعطيتهم ايملهم بالسعر الرخيص وقالوا اطلع واختار السياره واللون اللي تبيه من نفس فئة السياره...
المهم يوم شفت ان السالفه اظبط معنا قلت وش نوع التامين ؟
قال التامين العادي اللي كل الناس تاخذه..
قلت فيه افضل منه ؟قال فيه التامين الشامل كل شي...مع رسوم الطرق مع البنزين فل واذا سلمتها مو لازم تفللها...
قلت بكم يزيد ؟
قال في اليوم 11دولار
قلت توكل على الله
واخذنا باثفندر 2013
600دولار تقريبا شهر
المهم طلعنا من المطار الى المنتجع اللي انا حاجز فيه...
طبعا المنتجع ما شفت احد سبق ان حجز فيه او اذكره
لكن انا من كثر ما قريت وشفت الخريطه حسيت انه كويس وبيريحني ..
الحمد لله راهنت عليه عند العائله وكسبت الرهان..
لدرجة ان العائله يقولون اول مره نشوف فندق في الطبيعه احلى من الصور..
حقيقه المنتجع مافيه كلامه وبالنسبه لشقتي اللي انا ما خذها يا اما انها جديده او مجدده ..
طبعا المنتجع هو Marriott's Cypress Harbour
عموما اسف واعتذر لكل من يقرا الان فقد اطلت عليه لكني احببت ان
افيد كل من قد يمر بنفس التجربه
كلمة شكر/ للاخ الغالي الخلوق ابوسعودq8 على وقفاته معي وحرصه ومراسلته على الخاص باستمرار وتوجيهاته
وتقريره الاخير عن اورلاندو
كما اشكر الاخ ابو لانا mmmr240 على تقريره الاخير
دعواتكم لنا
وكل عام وانتم بخير
وعساكم من عواده