العنوان يخوف صح
اود ان اختصر عليكم الموضوع وابشركم ان المقابلة كانت سهلة والاجراءات رائعة
وكان شعار القنصلية ( الرياض ) تعالو الى امريكا وحياكم الله
طبعا اول واحد دخل السافرة كان انا
رقمي كان رقم 1
مسكت الطابور الساعة 6
طبعا كان ممنوع ادخل السفارات قبل 6 ونص بس العسكري الله يعطيه العافية بالكلام اللين دخلني وماقصر
طبعا الاجراءات مثل ماقالو غيري من الاخوان
باول الطابور وحدة شيكت على اوراقي .. ويوم لقتها كاملة خلتني ادخل..
الساعة 7
تفتيش عادي جدا عند البوابة
اول مادخلت لقيت سيكوريتي ثاني ينتظرني وعطاني رقم
كل الناس كانو مبتسمين ويحسسونك انك جاي مكتب عادي مو سفارة بصراحة
===========
اول مادخلت الصالة الا والقى رقمي على الشاشة
لقيت وحدة عربية محجبة ابتسمت لي وصبحت علي وكانت مرة ذوق واخلاق
شي بسيط ودي اذكره في هذه اللحظة وهو ..
انها يوم شيكت على اوراقي ولاحظت ان معي كل شي حتى ( قلم اكتب فيه لو بغت اي تعديل )
وقالت لي :
انا جدا جدا انبسط اذا شفت شاب وجاهز ومتحمس ونشيط زي كذا ليت كلن زيك ( عاد هنا حسيت اني ملك ههه )
بعد ما اخذت كل شي ( تعريف من العمل + جوازي + نموذج 156 و 157 )
قالت لي استريح
ابد ربع ساعة وينادون رقمي بالمكرفون عشان اخذ البصمات
ربع ساعة ثانية وينادوني عشان المقابلة
==============
في المقابلة:
قابلتني وحدة كبيرة بالسن امريكية طيبة جدا وعسل
اول ما شافتني قامت تسولف وتضحك وتسالني عن بعض الكلمات بالانجليزي ومعناها بالعربي
بعد كذا سالتني 3 اسالة بس:
1) كم سنة لك موظف ؟ جاوبتها 3 سنوات ..
2) لك اقارب بامريكا ؟ قلت لا
3) لحالك بتسافر ؟ قلت ايه
كانت سواليفنا كلها ضحك وابتسامات وردودي عليها سريعة وبثقة وابتسامة كاني اسولف مع احد اعرفه
قالت خذ الورقة هذي مع كرت اصفر ورح لمكتب فديكس وانتظر جوازك خلال اسبوع بنرسله عن طريقهم لك
Good Luck
بالضبط ركبت سيارتي الساعة 8
===============
وان شالله يجي الجواز والفيزا معه ..
وهنا احب اشكر كل اعضاء المنتدى وعلى راسهم اخوي الغالي
IMPACT
على دعمكم وتواصلكم والفوائد اللي استفدت منها
نصيحتي للي رايح للمقابلة:
1) لاحظت كثير من اللي يجون انهم مو عارفين وش المطلوب منهم بالضبط ووش الاوراق اللي لابد تكون متوفرة .. لذلك يتعطلون .. حتى ان واحد جاي مقدم لفيزة دراسة وهو مابعد سدد بالبنك رسوم الفيزا تخيلوا ؟؟
2) ابتسم وخلك نشيط وواثق من نفسك قدامهم .
3) اوراقك خلها كاملة ولا تخلي شي فاضي باي ورقة يطلبونها منك .. ترا هذا يفيد جدا ..
4) لم يسالني احد عن سفراتي السابقة (( علما باني سافرت لسوريا ولبنان .. ولم تسالني اللتي قابلتني )) هذا لمن يهمه الامر
5) في النهاية ترا الوضع سهالات وحلو ولا يوجد اي تعقيدات ..
6) لم يطلب مني التالي : جوازاتي القديمة + كشف الحساب (( لكن احتياط خلهم معك يمكن يطلبونه ))
7) خل معك صورتين اضافيتين ترا يمكن يطلبونها منك ..
ادعولي يجي الجواز مع الفيزا ..
تحياتي وشكرا لسعة صدركم