1. ( هل كل رخيص مخيس)


2. وهذي بعض ابرز النقاط:

السلام عليكم ورحمة الله وبركاته
صبحكم الله بالخير / مساكم الله بالخير (على حسب الوقت اللي تقرون فيه الموضوع)

( هل كل رخيص مخيس)

ماعليكم من المقوله هاذي الموضوع وبختصار انا تخرجت من معهد الادرة العامه دبلوم محاسبه طبعا معهد حكومي ومعروف صارله حول 40 سنه والتقدير ممتاز ولله الحمد طبعا قبل دخولي للمعهد ماحصلي قبول في الجامعات اللي عندنا في السعوديه الملك سعود وغيرها (هارفرد - اكسفورد ) الا تخصصين اللي هم لغات ياباني واظاهر عبري ولا شي زي كذا قلت بلاش دبلوم افضل
لكن انا شخص طموح للغايه فقلت يابو الشباب انا تخرجت وتوني ورع بداية العشرينات ليه ماكمل دراستي طبعاً راسلت جامعتي هارفرد و كمبردج (سعود و فهد وعبدالعزيز) بعد مده ردو علي: مافيه شي اسمه نظام دبلوم يكمل بكالوريوس فوضى هي على كيفيك. الا عبدالعزيز رحمني وقالي يابو الشباب تعال نقد 3000 ريال بالترم وخذ عندنا انتساب وتدرس من اول قلت والله المشوار وبعد ذلك نصحوني بعض الشباب ان التحق بالجامعه العربيه المفتوحه ومادراك مالجامعه العربيه المفتوحه يعني يكفي الحرم حق الجامعه يغطي على حرم ستانفورد (مبنى شقق مفروشه) المهم عبرنا هاذي ودرسنا وهي ينقالك نظام الجامعه التعليم عن بعد لكن ماحولك احد من المدرسين ياللي واحد مايدري وش الطبخه يقلبها انتظام ولا واحد ماصدق يصير عنده ايميل قلبها كلشي على الايميل طبعاً الوضع ماعجبني مره وانواع المشاكل فيه وكل ترم يغلون الاسعار ويقولون حنا جامعه غير ربحية والزبده اني سقطت ومافلحت وزاد عمري سنه ولا سويت شي
فقلت ياولد مابدهاش الغربه يعني الغربه ابغترب فذهبت الى الى التعليم العالي وبكل ثقه اقدم طلبي اني التحق ببعثه حتى لو يبعثوني بافغنستان راضي والله لاكن مالله اراد قالولي بالعربي تبي نبعثك لازم يصير تكون ماخذ البكالوريوس وعندك فيتامين واو طيب يابو الشباب انا ابي بعثه اخذ البكالوريوس تقولي جب بكالوريوس الحين وشلون اجيبه رد علي قالي مو شغلي قلنا حسبي الله والنعم الوكيل وشلت فكرة الغربه من راسي قلت خلاص السنه الجايه نطلع لروسيا ولا مصر ونشتري شهاده
وبعد مرور شهرين ونيف اتاني احد الاصدقاء وقالي ليه ماتطلع اول ترم او سنه على حسابك بعدين تقدم على البعثه من هناك على السفاره والفكره دخلت مزاجي ورحت بعض المكاتب مثل مكتب IDP حق استراليا لكن فيه مجازفه كبيره والصراحه اجور الدراسه لحالها توصل 25000 الف ريال بالسنه غير المصاريف وهاذي ادنى جامعه وتبخرت الفكره من راسي و حمدت ربي اني حاصل على الدبلوم فيه غيري حتى الثانويه ماخذوها
وبعدها بشهر ونيف اتاني نفس الصديق الشرير عرض علي فكره الدراسه في الخارج لكن في ماليزيا وطبعا هو اللي دلني على موقعكم الطيب والجميل والان ندخل بالزبده ترى هاذي كلها مقدمه وحبيت انكم تشاركوني همومي

وهذي بعض ابرز النقاط:

• انشالله ناوي اكمل من دبلوم الى بكالوريوس باحد التخصصات Markeeting or Management or Accounting وابي منكم مساعده تزودوني بجامعه ممتازه من ناحية هذه التخصصات لكن بشرط تكون الدراسه باللغه الانجليزيه وانها معترف فيها من قبل التعليم العالي بالسعوديه
• هل فيه امكانيه معادلة الساعات؟
• ترى انا مطفر

وجزاكم الله خير