السلام عليكم
لكل واحد منا تطلعات.. في رحلاته السياحيه عموما..
وفي ماليزيا (لاننا في بوابتها) بوجه الخصوص..
ودنا ناخذ لفه (افتراضيه) واباعطيكم شوية مشاهد..
للسواح (ربعنا هناك)
محمد وريم..
ريم واقفه تطل بالبلكونه على المناظر اللي قدامها.. ومحمد رافع السماعه يطلب غداء من الفندق..
علشان يسولفون ويتغدون ويتفرجون سوا ..
محمد .. يازين السياحه اللي كذا ترويقه.. وسواليف.. وفندق حلو..يشرح النفس
عبدالله وابتسام..
واقفين ماسكين سرا..في ملاهي عند كشك التذاكر..
عبدالله يسال ابتسام ..هاه يلا وش قلتي.. تبين الالعاب الالكترونيه بس.. والا كل الملاهي
ابتسام.. الا كلها ونص.. اجل طاقين مشوار علشان نلعب وننبسط ولاتبينا نجرب كل الملاهي؟
خالد وخويه ناصر...
قاعدين في كوفي شوب.. على شارع العرب
فاتحين بلوتوثاتهم.. وشغالين (يترزقون الله) قز.. على اصوله وتعليقات..
وضحك .. وفالينه.. من المغرب لمين الساعه 12 يتنقلون بين مقهى والثاني (اصلا ماقاموا الا المغرب)
خالد يقول لناصر.. يقلع ابو الوناسه اللي كذا..
ايه هذي السياحه الصح.. موب كشتاتك بنصف القمر. :112:
الهنوف واختها العنود يدورون بالسوق ويسحبون وراهم 7 اكياس.. وتوهم ماانتصفوا بالسوق يلهثون..
والفيزا تبي تنفجر من كثر الديون..
الهنوف : لاتفوتك الشنطه ذي واو مره شي..
العنود : خوذيها لايصير بخاطرك شي..
اجل مسافرين برا ليه حنا.. موب علشان نتقضى ونجيب شي موب عند احد؟
فيصل ومها جالسين يدورون بمزارع الشاي بالكاميرون..
موب قادرين ولا يرمشون من الحماس..
فيصل.. : ياالله ويننا عن هذا من زمان..البراد.. والخضار
بين الصجه واللجه .. والزحمه..
هذي السياحه الصح.. اذا بيسافر احد .. يجي هنا.. (ويكملون تمشيهم)
نايف وهناء.. ماسكين صنادلهم (اعزكم الله) بايدينهم ويدورون على شاطي البحر بلنكاوي ويسولفون ويتفرجون على الناس اللي يلعبون..
نايف:هاه وش رايك ياهناء؟
هناء: ياليت كل سنه نجي نفس هالمكان.. وبس نقعد هنا من الاول للاخير
بدر ولمى..
جالسين بمطعم فخم.. في موقع استراتيجي..
وياكلون .. ويتلفتون حولهم يتفرجون بهدوء..
بدر: هاه وش قلتي.. وين نروح اي مطعم بكره؟
لمى: والله مدري بس مانبي نكرر شي.. نبي شي جديد.انا استغرب الناس اللي تسافر وتاكل وجبات سريعه.. يقعدون ببيوتهم احسن. .
فهد وأروى.. جالسين يتفرجون على عرض غريب للعادات والتقاليد والتراث الماليزي..
فهد.. شفتي اللي قاله تو؟
تصدقين اول مره ادري؟
اروى: علشان كذا حنا نسافر.. موب علشان نتعرف على عادات وتقاليد غيرنا ونستمتع؟
عبدالعزيز واريج قاعدين يتفرجون على عيالهم راكبين خيل..
ويناظرونهم بحب..
ويناظرون بعض..
اريج: عسى معك فيلم تصور؟
عبدالعزيز: ايه اكيد معي..الحين باصورهم.. يازينهم يالبا قلوبهم.
اريج: والله استغرب الناس اللي يتركون عيالهم .. وشلون؟ موب اصلا السفره علشان ينبسطون؟؟
ابرار وخلود واخوهم سامي واقفين بوسط الزحمه يوالصراخ والرقص الشعبي تفرجون على الكارنفال والاحتفالات ومعهم بوب كورن.. ومبسوطين على الاخر..
ابرار تلتفت على خلود: يختي اشوى اننا جينا بهالوقت.. علشان نشوف هالفله..
يلتفت عليهم سامي قاط.. اذا ماجينا بهالوقت.. وش يجيبنا اصلا.. حنا نبي الاحتفالات والكارنفالات..
الحاصل..
طبعا اكيد كلنا خليط من الشخصيات اللي فوق..
بس اي نوعية تعتبر نفسك بالمقام الاول..
اي واحد انت منهم...ووش اللي تدور عليه بالضبط.. في السفر..؟