1. السلام عليكم

السلام عليكم

اللي يبي يطلع تأشيرة من سفارة المانيا لا زم تكون أيامه خلال السفرة في المانيا أكثر من الدول الثانية لأني بصراحة أمس توهقت يوم جا دوري في مكتبهم ( بعد انتظار طويل 4 ساعات ) اللي على شارع الملك سعود قال ما اطلع لك التأشيره الا اذا كانت ايامك في المانيا أكثر من سويسرا و النمسا وحاولت فيه بس رفض الخسيس
تبي تقولون ليش خسير لأني اكتشفت انه يبي بخشيش ( رشوة ) علشان يمشي أوراقي لأن المعقب اللي جنبي معه الف جواز وفيهم منهو مثل حالتي ومشاها لهم لأن فيه امور سرية بين معقبين الوكالات و الهنود يدهنون السير و يسير أما انا وغيري اللي يبي يخلص أوراقه بنفسه فلا
من ظمن المواقف اللي حصلت علشان تعرفون ان الامور مهيب نظيفه في ذاك المكتب
جلست اسولف انا وواحد من الاخوان المراجعين ( سعودي ) يقول تو جاي واحد وما معه الا جوازات بس لا ابلكيشن ولا صور و لا بطيخ ويقول لرفيقي انه ارسل كل شي لهم بالايميل وجاي بس بيسلمهم الجوزات الاصلية و الفلوس و ( البخشيش ) طبعا متفق مع أحد موظفي المكتب ولا خذ رقم ولا انتظر 4 ساعات مثلنا ولا شي ... الامور مهيب نظيفه عند ذا الهنود حسبي الله عليهم
الموقف الثاني الشخص السعودي اللي جلست اسولف انا وإياه جاي يقدم فيزا لصاحبه مهوب له وجايب اوراقه كامله قلت له بيطيعونك بيقولون لازم يجي صاحب الجواز نفسه قال كل اللي فيذا معقبين وانا يعدوني معقب مثلهم قلت الله يوفقك ويوم جا دوره راح للمكتب وجلس عند الهندي وقدم اوراقه قاله الهندي وين صاحب الجواز قال مهوب موجود مسافر وانا جيت عنه قال لا لازم يجي هو بنفسه او تدفع بخشيش ( هذي زيادة من الراوي ) بس هو لسان حال الموظف ويقول رفيقنا حاولت فيه ورفظ مرة . يقول يوم شفته قام عن المكتب يكلم له واحد و التفت على المكتب اللي جنبي والقا فيه سوداني ( معقب ) معه كم جواز واعطيه جواز صاحبي و الفزه ب 60 ريال ما معي الا هي والحمد لله مشت اموري و لا جا صاحب الجواز ولا شي بس علشان تعرف ان المعاملة اللي ما يدفع صاحبها تبي تغرز
انا ما ادعوا الى انك تدفع لهم ولا راح يقبل منك شي مباشر لأن فيه كاميرات بس قلت أحسن تعطي اوراقك معقب لأنه بيمشيها لك حتى لو كانت ناقصه و السعودي غير مرغوب فيه في ذاك المكتب غير ان الانتظار مقرف