1. رحلتي الجميلة إلى بلاد السحر والجمال


2. كوسوماي + بانكوكالسلام عليكم ورحمة الله وبركاته ....


3. كانت رحلتي هي: البحرين دبي بانكوك كوسوماي بانكوك دبي البحرين


4. وهذه صورة في القارب السريع قبل الانطلاق))


5. وبعدين تكتمل الرحلة بالعوده الى كوسوماي .

رحلتي الجميلة إلى بلاد السحر والجمال

كوسوماي + بانكوكالسلام عليكم ورحمة الله وبركاته ....

بعد تنفكير طويل لقضاء عطلة مميزة قررت الذهاب الى جزيرة كوسوماي التي ابهرتني في الصور خلال بحثي عنها فهي جزيرة جميله تعد ثاني اكبر جزيرة في تايلند تتميز بجمالها وسحر طبيعتها الخضراء وبحرها الازرق الهادئ وسماؤها الصافية ..
كانت رحلتي في شهر مارس 2/3/2007 يو الجمعه سافرت عصرا عبر الخطوط التايلندية لاني لم اجد رحلة عبر اي خطوط اخرى غير التايلنديه

كانت رحلتي هي: البحرين دبي بانكوك كوسوماي بانكوك دبي البحرين

ما اخبي عنكم الرحلة كانت متعبة جدا وهذي آخر مرة اروح فيها على التايلنديه لان اول ماوصلت مطار دبي قالو لنه ان رحلتنه تاخرت فقعدت في المطار 6 ساعات واخيرا ايي الفرج والا تتغير البوابة ونروح نسعي ندور البوابه ونحصلهه وبعد ساعه انتظار على دخول الطياره يعني خالصين ..
طبعا لازم بالاول ننزل مطار بانكوك علشان نركب الطيارة الثانية وبسبب التاخير في مطار دبي طيارتنه اللي في بانكوك راحت عنه وقعدنه ننتظر بعد 2 ساعتين وبعد ين ركبنه الطياره وننصدم بالوجبة انها كانت خنزير ومافي بديل
اول ما وصلت مطار كوسوماي وما احلاه من مطار ومن منظر كان مطار بسيط وكان عباره عن عريش و اول ماتنزل من الطياره ياخذنه باص مفتوح ينزلنه عند المطار
وهذي صورة في الباص))

وسكنه في فندق
Center Villas Samui
الفندق حلو وايد بس مشكلته انه بعيد عن الشاوينغ بيج وسعره ممتاز جدا وهذا موقع الفندق للاستنفسار عن اسعار الغرف
http:/http://www.expedia.com/pub/agent.dll/qscr=dspv/htid=579482
وهذي صورتي في الفندق بجانب الغرفة

قعدت في كوسوماي 6 ايام بس ماكفتني فتمنيت اني اقعد اكثر والبرامج اللي تقدر تسويهه هناك
1 . رحلة السفاري في الجيب : بيكون جيب مفتوح ومعاك مجموعه ويودونه (لامي بيج)
ويراونك صخور (صخرة الجد والجده)

2. الذهاب الى حديقة حيوانات لعرض التماسيح والفيله والقرود .( هذي مو صورتي طبعا)

3. ركوب الفيل وياخذونه في جوله

4. الذهاب الى الشلالات وتقدر تتسبح فيهه الماي بارد عجيب خصوصا بعد التعب في الحر
5. ياخذونك الى الحديقه السحرية اللي بنوهه البوذه في نهر واشجار فواكه ( اعتقاد منهم انهم بيرجعون للحياه مره اخرى بعد مماتهم).

6. الذهاب الى معبد وهناك حاطين رجل البوذا ميت ومحنطينه وحاطينه داخل زجاج وطبعا معابد هناك وتماثيل مطلية بالذهب .

7. واخيرا الذهاب الى مطعم فوق الجبل وهناك يقدمون الطعام لك( بيكون الاكل من ضمن الرحلة مدفوع بس اي شي بنشربه علينه).
اليوم الثاني اخذنه رحلة الى جزر كوسوماي القريبه منهه طبعا هذي تحجز له من مكتب الرحلات نفس رحلة السفاري . وهذي البرنامج وايد حلو لازم تقعد من الصبح علشان الباص ياخذنه ويودينه الى قارب مع مجموعة ناس وتاخذ تقريبا 45 دقيقة.

وهذه صورة في القارب السريع قبل الانطلاق))

1. اولا (السنوركلينغ) مثل الغوص لكن هذي الجسم برع ووالوجه بس داخل طبعا المعدات كله من عندهم الجاكيت ونظارة الغوص ، ممتع جدا المنظر تشوف الاسماك اشكال وانواع والوان جميله تمر صوبك وتسبح معك وتقدر تاكل السمك وهناك في القارب يبيعونك كاميرة للماء لتصوير السمك للي يحب .

2. الذهاب الى جزيرة وهناك بيكون الغدا في الجزيرة ونقعد هناك اللي يبي يتسبح في البحر واللي يبي يتصور هناك لان مناظر حلوة للتصوير ( وهذي صور من هناك )

3. ركوب قارب الكايك (وهناك نشوف المغارات وبعدين نتوقف ونسبح في البحر المنعش الجميل وبعدين نرجع مرة ثانية الى الجزيرة .

4. الذهاب الى بحيرة طبيعيه كبيرة ومنظرها حلو ورائع لكن السباحه فيهه ممنوع.

وبعدين تكتمل الرحلة بالعوده الى كوسوماي .

وهناك برامج كثيرة تقدر تسويهه من مكاتب السياحه بس احنه اختنرنه هذي البرامج وفوتنه علينه برنامج التسلق في الغابه كنت ابي اروح بس خساره مارحنه. طبعا هناك تقدر تقضي اليوم كله في الشاوينغ بيج لان شاطئ متركز فيه كل شيء من نشاطات كركوب الجت سكي ولعب الكرة والمساج التايلندي العجيب والمطاعم متركزه على الشاطئ والسباحه في البحر المنعش .
طبعا بالليل متلاقي كل هذا على الشاطئ لانه تنقلب قعدات عشا رومانسيه حلوة وبيكون اكلات بحريه لذيذة .
وطبعا الاسواق هناك حلوة وفي الماركات العالميه الاصليه وفيه التقليد والسوق حلو بالليل والنهار ماينمل لكن لازم تتقاصص مع الباعه في السلع لانهم يرفعون الاسعار وايد .
وموجود هناك طبعا مطاعم كثيرة وماكدونالدز موجود وهناك مطعم عجبني وايد كل يوم انا هناك فيه اسمه ( ثري مونكي ) وايد حلو ونظيف والاكل لذيذ .
( واتمنى انه تعجبكم جزيرة كوسوماي مثل مااعجبتني والكلام والصور غير انك تروح وتزورهه وتشوفهه)
بعد 6 ايام ذهبنا الى بانكوك وجلسنا هناك 6 ايام وسكنت في فندق جميل جدا ومنطقته نظيفه اسمه
Grand President Executive Serviced Apartments, Bangkok
ةهذا موقع الفندق
http:/http://www.expedia.com/pub/agent.dll/qscr=dspv/htid=520975
البرامج اللتي قضيناها هناك :
1/ معبد النمور ( والذهاب اليها بالتاكسي والطريق ياخذ ساعتين ونص تقريبا)

2/ مزرعة التماسيح

3/ رحلة ليلية باليخت مع مجموعة من الناس وهناك بوفيه عشاء سهرة جميله جدا هذا آخر يوم في تايلند

وطبعا باقي الايام كانت تجوال في المجمعات والاسواق.
وتنتهي رحلتي بالعودة الى دياري

التذاكر كلفتنه: 1500 دينار بحريني غير الفنادق
الفنادق مااذكر كم لان حجزناهم عن طريق الانترنت بالفيزا فما اذكر