شوف حبيبي ، انا العام الماضي زرت المانيا والنمسا من 29 اغسطس الى 14 اكتوبر يعني نفس الفتره اللى راح تكون فيها ، والجو كان متقلب ، يعني اول اسبوع اللى هو من 29 اغسطس الى 6 اكتوبر كان الجو رائع ولا شفنا الشمس الا نادرا ، والاسبوع الثاني من 7 اكتوبر الى 14 اكتوبر كان مشمس وحار ، بس يمكن لان الاسبوع الاول كنت في ميونخ وسالزبورغ وزيلامسي وهذي المناطق معروفه ابرد من المناطق اللى زرتها في الاسبوع الثاني اللى هي كونستانس والغابات السوداء . يعني ماراح تعرف اذا كان الجو حيكون مشمس او لا انت وحظك ، ويعتمد على الاماكن اللى راح تروحها ، لكن انا ارشح الفتره الثانية اللى هي من 7 اكتوبر الى 18 اكتوبر ، رغم ان هذي الفتره صادفني حر فيها ، لكن بشكل عام كل ما دخلت في شهر اكتوبر اكثر كل ما كان الجو افضل . وبصراحه الجو لما يكون حلو تفرق مع الواحد في رحلته وحتكون سبب لنجاحها ، لكن لما يكون فيه شمس وحر تحس انك ما استمتعت كثير ، يعني افتكر في عام 2011 رحت باريس وسويسرا وايطاليا في اخر شهر نوفمبر ، وياسلام على الجو كان بارد ودايما امطار واستمتعت جدا بالاجواء حتى ايطاليا اللى معروف ان جوها حار كانت في الفتره هذيك جوها خيال ، ورغم ان الفتره هذيك ما كان موسم وكانت سويسرا بالذات ممله لان كل شي مقفل ، لكن الجو الجميل غطاء على الباقي ، النقطه اللى ابغى اوصلها ان الجو في رايي يمثل 50 % من الاستمتاع بالرحلة والباقي بيكون على المكان اللى بتروحه ، عموما تقدر ترجع لتقرير وحيبان معاك الاجواء في الصور ، واتمنالك التوفيق في رحلتك وان شاء الله يكون الجو خيال عشن تستمتع.