السيارة تشيل كم راكب ؟ وانتوا كم عددكم ؟
آنا مو بو عبد الله

السياره تشيل 8 ركاب واحنا 5 .....
انت مو محب الخير ...

والله انا اشوف السعر غالي شوي
من 3000 الى 4000 ليرة هو السعر المناسب
لكن اذا السائق امين وحبوب ويشغل المكيف على طول وباله طويل اعطيه 5000 ويحمد ربه توكل على الله لا تنسى انك في عز الموسم
وفقك الله

متابعه
الباقي تفاعلوا معاي ....

السلام عليكم
0واجد واجد عليه
مثل ما قال ابوصفوان من 3000 الى 4000 ما يزيد
تحياتي لك

أهم شئ ان تكون السيارة والشوفير من شركة رسمية معتمدة
اول ماتوصلون للمطار هناك توجد العديد من شركات تأجير السيارات مثل يورب كار وغيرها
استأجروا ميني فان مع السائق بعقد رسمي وموثق

(( مسائكم ياسمين دمشقي ))
اختي
هلا فيكي
صراحة انا ما حبيت اتدخل إلا بعد ما شفت مداخلات بعض الأعضاء في هالموضوع والموضوع اللي تم إغلاقه
وما راح اعلق على مشاركات البعض بس اللي ودي اقوله
يا ليت اذا حبينا نكتب ونخدم بعضنا اننا نكتب شيء واثقين منه ومجربينه ومتأكدين منه
وما نكتب معلومة صار لها مدة او سمعنا عنها يمكن تكون صح ويمكن غلط
وانا قبل ابدي الرأي ودي اقول لأخونا
محب الخير
ترى رايتك بيضاء وما قصرت هنا وهناك
اختي
وبما انك غيرتي رأيك ونيتك وبعد ما كنتي ماشية تمام وقفتي السيارة ومسكتي بريك وسحبتي جلنط
وقصدي انك في البداية طلبتي فزعة ومساعدة واخونا محب الخير ما قصر حاول ان يوصل لكي الرقم وما قدر وراح لمنتدى ثاني كله علشانك
وفعلآ اخذتي الرقم وكلمتي الشوفير وتقريبآ اتفقتي معه لكن ربما مشاركات البعض كانت سبب في تغيير رأيك وتحول نيتك
وبهذي صراحة محد يلومك لأنك يمكن اول مرة تسافرين وما تعرفين الأسعار
لذلك انا هنا احب اني اوضح لكي الصورة حتى تكون عندك خلفية لموضوع الشوفير والسيارات السياحية
وممكن اكون مخطىء لكن بالعموم راح تشوفين الوضع قدامك اذا ما سافرتي
انا وبحكم سفراتي الكثيرة وحبي للتغيير وتجريب اكثر الأشياء من
شقق وفلل ومكاتب عقارية وسياحية ومطاعم وايضآ سواقين
رغم اني ما اسافر إلا بسيارتي او مع اصدقاء بس لي تجارب سابقة وكثيرة معهم
ما راح اقولك على تجارب من سنين او حتى من سنة ونص لا
لأنه ومثل ما قلت في البداية راحت ذيك الأسعار اللي نعرفها ويعرفها الكثير
يعني ايام 1000 وال 2000 ليرة راحت
ومثلآ سيارة صغيرة مكيفة بحدود 2000 ليرة وممكن اكثر
والجميع يعلم ان الأسعار ارتفعت وزادت وطارت مثل باقي دول العالم
اقولك انا ومن خلال رحلاتي
اعرف مجموعة سواقين لكني نخلتهم وصفيتهم وخليت واكتفيت بكذا واحد بعد تجارب كثيرة وطويلة
وهذي التجارب كانت لعوائل وشباب
وفيه من هالسواقين من عنده سيارة وفيه كم واحد ما عندهم سيارات بس انهم جاهزين لأي طلب
يعني ممكن يستأجرون السيارة اللي يطلبها الزبون
الصيف الماضي
كلمت احد السواقين عشان عائلة وعددهم 13 واحد ما بين اب وام وعيال وبنات ومعهم نسيبهم
والسواق اللي كلمته ما عنده سيارة وطبعآ انا اخترته لأسباب منها ثقتي فيه
وقلت له دبر لنا سيارة ولما عرف عددهم حسيت ان عيونه طلعن علي من التلفون
3واحد وهو معهم يعني 14 رقم يخوف ويزعج
تقريبآ اكثر من اسبوع وصاحبنا ينزل للشام يدور على سيارة كبيرة لهذي العيلة لأنه ساكن خارج الشام
يعني حتى السرافيس او الباصات الصغيرة بتكون ضيقة عليهم
واخيرآ لقى صالون
انا هنا اوقف وما اتدخل بالأسعار
وهذي عادتي لما اكلم اي سواق عشان عائلة او شباب ما احب اتدخل واخليهم يتفاهمون ويتفقون مع بعض
وفعلآ ارسلت لهم رقم الشوفير واتفقوا معه وإستأجر الصالون
وقبل يمشون بيوم كلموني انهم ماشين وحسيت من كلامهم ان السعر غالي شوي
واللي كان 8000 ليرة
قلت ولا يهمكم اكلمه وفعلآ كلمته بس اني لمحت له تلميح ومن بعيد عن السعر لأني ما احب اتدخل بهالأمور
وهو صراحة فهمها وقال لي منشانك وكرمالك راح اكرمهم وانزل لهم من السعر
وفعلآ لما استقبلهم واخذهم من المطار قال لهم على السعر الجديد وهو اقل من اللي اتفق معهم عليه
طبعآ صارت احداث وسوالف ومواقف مؤسفة ومخجلة من هالعيلة اللي حبيت اني اخدمهم
وخاصة انهم اول مرة يسافرون لسورية وحبوا يزورون اكثر واشهر واجمل الأماكن فيها
لكن للأسف خيبوا ظني فيهم وفشلوني مع هالشوفير اللي ما قدر يكمل معهم رغم صبره عليهم طول هالرحلة
وتحمله ل 13 واحد معه بنفس السيارة ولأكثر من إسبوعين
لكن هالسوالف ما تهمك والأهم هو ان تعرفي نقطة مهمة وهي
البنزين
بخلال 8 ايام خارج الشام تم تعبئة السيارة بنزين بأكثر من 17000 ألف ليرة
هذي بس 8 ايام من الرحلة لأن السيارة كان يعبيها بحوالي 3500 ليرة
طيب باقي الأيام وإيجار السيارة وغيرها هذي كلها كان يدفعها من المبلغ المتفق عليه
اقولك والله انه طلع خسران من هالرحلة
هذا مثال بسيط وقريب وبالصيف اللي فات وفيه غيره من امثلة كثير
بس هنا حبيت اوضح لكي جانب وشيء يمكن ما تعرفينه وتغفلين عنه وارجع اقوله وهو
البنزين
انا بالصيف اللي مضى جلست بسورية شهر ويومين ما ذبحني واكل الميزانية إلا البنزين
بالديرة افلل السيارة ب 35 ريال وبسورية على ما اذكر 120 ريال وما هي فل
نرجع لموضوعك
اعرفي السيارة بنزين وإلا ديزل
وهذي فيها فرق بالسعر لأن الديزل ارخص
الرأي
انتي امام خيارات وخاصة انكم إلى الآن ما سافرتوا
وبعد ما غيرتي رأيك ويمكن كنسلتي الشوفير
انا اقولك لا تتفقين مع احد ( واتمنى اخونا محب الخير ما يزعل مني )
سافروا ومن المطار اطلعوا بتكسي او بالباص
المهم اطلعوا للفندق ريحوا وارتاحوا
وبعدها اطلعوا واسألوا ونبشوا وبحبشوا عن سيارة ترافقكم طوال رحلتكم
وخلوا اول يوم يضيع بالبحث والسؤال عن سيارة مناسبة لكم ما هي مشكلة ان ضاع هاليوم
روحوا للمكاتب السياحية وبعض المكاتب العقارية وقبلها اسألوا الفندق يمكن يكون عندهم او يعرفون احد
وغير كذا تقريبآ كل سيارات الهونداي او الكيا او الباصات الصغيرة الجديدة وليست السرافيس هذي تأخذ وتودي وتوصل سياح
يعني ممكن تشوفين اي سيارة مثلآ واقفة عند فندق او سوق او مول او حتى عند إشارة ممكن تسألين الشوفير عنها
والسؤال ما هو عيب
يا انه يتفق معكم او يدلكم على غيره
وإبدأي بأخذ الأسعار والمقارنة بينهن
وممكن تروحين على شركة مثل بندة وهي معروفة وتسألين وتأخذين وتتعرفين على الأسعار اكثر
رأي ثاني
ممكن تتفقي مع الشوفير انه يستقبلكم بالمطار ويوصلكم للفندق واذا تبون تطلعون مشوار تتصلون عليه
وبهالوقت برضوا اطلعوا واسألوا عن باصات او سيارات سياحية
( ومن باب الإحترام والتقدير لأخونا العضو محب الخير )
( اذا ما بغيتوا هالشوفير او اتفقتوا مع غيره لا تقولون له خلاص ما نبيك او لقينا غيرك وارخص منك )
وبالنسبة للأسعار وانا اتكلم بالعموم ولا اخص هالشوفير او غيره
السعر داخل الشام طبعآ غير خارجها
واللي يطلعون مشاوير خارج الشام ومن خلال خبرة والله انهم يعانون معاناة كبيرة بس بعض الزباين ما تحس او ما تبي تحس
ومهما كان السعر فهو يستاهله
والسعر اللي قاله لكم لكم جدآ مناسب ( 7000 ليرة ) وفيه من يأخذ اكثر
اما داخل الشام فهذا ومثل ما قلت لكي قبل يعتمد على السيارة هي بنزين وإلا ديزل
واذا السيارة بنزين اشوف 4500 ليرة ممكن تكون مناسبة واذا هو كريم ممكن ينزل لكم بالسعر سواء هالشوفير او غيره
وبرضوا اعرف من يأخذ اكثر من هالسعر
لكن ومن خلال البحث والسؤال ممكن تلاقون ارخص
والرأي بالأخير يرجع لكم
وانا هنا حبيت انورك شوي واوضح لكي كم نقطة حتى تكون الصورة واضحة
ونقطة اخيرة تذكرتها وهي
ان الموسم السياحي لهذي السنة قصير مقارنة بالموسم الماضي
يعني الأسعار اتوقع انها دبل لأن الكل يبي يعوض قصر الموسم
وان شاء الله تتوفقون بسواق على كيف كيفكم يناسبكم وترتاحون معه
واتمنى لكم رحلة ممتعة وموفقة

إخوي الحبيب كلامك ما يزعلني بالعكس يفرحني واللي مخليني أزكي أبو حامد عدة أمور منها إن الخوات راح يسافرون من غير رجال و أول سفرة لهن ومحتاجين رجل أمين ويخاف الله وهو موظف بمكتب سياحي معروف بالشام وما ودي أذكر بعض مناقبه لأن هناك من سيتهمني بالمبالغة
آنا أقترح تتفقون معاه على المشاوير الخارجية أما داخل دمشق فالتاكسي ممكن يؤدي الغرض ولا يمنع أن يكون هناك مفاصلة وأبو حامد صدره وسيع ويتقبل
نقطة مهمة ودي أذكرها إن الأخ أبو حامد مرشد سياحي يعني الرحلة من دمشق إلى بلودان ما يخلي أي معلم سيياحي إلا ويمر عليه وبدل النصف ساعة ياخذ الطريق ساعتين وهذا كله استهلاك بنزين مثل ما تفضلت يا الغالي فرق بينه وبين من يطير فيك وبطريق مختصر ولا يعرف شي عن المعالم السياحية
تصدق إخوي تعبت وآنا أكتب أخاف يقولون آخذ منه عمولة
حبينا نخدم أهلنا في خليجنا اللي يتشرف بأمثالك يالغالي والله يكتب لهم اللي فيه الخير

اخوي
هلا بك
اهم شيء ما زعلت مني ههه
وانت ذكرت نقطة مهمة وهي ان يكون السواق مرشد سياحي
وهذي الكثير من السياح يبحث عنها وتهمه
اما النقطة الثانية وهي العمولة
فهذي ياما وياما انسألنا واتبهدلنا واتهمنا فيها
واقولك على شيء
ما حلفتني لكن
والله العظيم قبل كم سنة سكنت بشقة بأحد المصايف وكانت هالعيلة مسلمة وما عندهم غير هالشقة
وصراحة ارتحت لهم انا ومن كان معي ورجعنا بعد كم شهر وبرضوا سكنا عندهم
المهم رجعت وكتبت عن هالشقة بأحد المنتديات
الآن وبعد تقريبآ 3 سنوات يمكن اكثر او اقل ناسي
ما شاء الله هالعيلة عندهم اربع شقق وكله بفضل وتوفيق الله سبحانه ثم الموضوع اللي كتبته عن شقتهم
ورغم اني ما حطيت صور للشقة إلا صورة وحدة وهي إطلالة من البلكونة
والله وبالله العظيم لو تروح لهم وتسألهم عن اللي كتب عنهم بالنت ما يدرون من هو
اللي هو انا
وقس على هالمثال امثلة بالعشرات
والله اذا دخل بجيبتك انت ليرة وحدة من هالشقة او غيرها فأنا دخل بجيبتي مثلك
وهي السالفة ومثل انت قلت نقدم خدمة لحبايب او اصدقاء او معارف او جيران او حتى اعضاء بالمنتدى
حتى يسافروا وهم مرتاحين ويلاقوا شيء مضمون ومأمون ومعروف ومجرب وما يستغلون وينضحك عليهم
نرجع ونقول الرأي للأخت
ممكن انهم بالشام يجربون كذا واحد ويشوفون ويسألون ويقارنون بالأسعار
ربما يلاقون من يرتاحون معه ويكون مناسب لهم بالسيارة والسعر