- ملاحظاتي :
رجعنا ولله الحمد من الشرقية يوم الجمعة الماضي وكانت الرحلة لمدة 4 أيام (( يعني مشينا يوم الاثنين الماضي )) ولله الحمد الرحلة كانت ناجحة
ملاحظاتي :
1- الجو في الشرقية خلال وقت رحلتنا (( من يوم الاثنين الى الجمعة )) كانت الجو جيد ماكان فيه رطوبة إلا يوم الخميس بالليل في الدمام ، ولكن بتاكيد هذي بداية الرطوبة.
2- الشرقية ممتلئة على الاخر (( زحمة )) كورنيش الخبر في الليل عند الاشارات مزدحمة بشكل غير طبيعي وكذلك الدمام، وكل المطاعم وخصوصا الوجبات السريعة ، وكذلك الاسواق ممتلئة على الاخر وخصوصا الراشد (( اعتقد ان الراشد هو الملاذ الوحيد للشباب ))
3- السكن في الشرقية 3 غرف ودورتين مياة ب400 ريال في ركن الشموع خلف التميمي شارع الاميرحمود ، الشكن لابأس به ، الشقة نظيفة والمفارش النوم نظيفة ولكن كنب الصالة ماكان نظيف (( غير مهم أهم شيء المفارش ودورات المياة أعزكم الله ))، سكنت أنا وزوجتي بنفس الشقق غرفة واحدة ب200 ريال وكان نظيفة وكويسة.
4- بصراحة اللي يبي يروح للشرقية في الموسم هذا لايناظر شقة غرفة واحدة قيمتها أقل من 180 ريال ، او شقة 3 غرف قيمتها تساوي 300 ريال أو أقل ، أو شقة غرفتين قيمتها 250 ريال أو أقل ، ببساطة راح تكون غير نظيفة وماتستاهل السكن حتى لو ببلاش، يعني بالعربي لو اتصلت على شقق وقال لك قيمتها في حدود هذي الاسعار نصيحة لاتقربها ولاتضيع وقتك.
5- متوسط أسعار الشقق الممتازة 3 غرف هو 500 ريال وغرفتين 400 ريال وغرفة وحدة 300 ريال وذلك حسب تجولي في حي العليا القريب من الراشد.
6- من وجهة نظري ووجهة نظر الاهل الشرقية بصراحة غطت على جدة كثيير (( بحكم ان اهلي سنويا في جدة لعمل الوالد هناك )) يكفي الواجهة البحرية للدمام والخبر والهالف موون، اهلي اعجبو بالهالف موون حتى اننا رحنا له مرتين على الرغم من ضيق الوقت للرحلة.
7- بصراحة الشرقية تستحق ان تكون اكثر مدن المملكة من حيث التزام معظمها بانظمة المرور (( اقصد الاشارات والافضلية لمن بداخل الدوار )) وهذا الشي لاحظه الاهل.
8- بعض الشقق على الكورنيش وكذلك داخل الخبر تجاوز سعر الليلة ل 3 غرف 700 ريال وبعضها تجاوز الالف ريال.
9- الله يحلل الدراسة ويبيحها ويازين الشرقية في الدراسة ، شقق رخيصة لا وتتشرط عليهم وتتدلع ، الكورنيش فاضي وهادي ، الاسواق هادية ، المطاعم هادية ولاازعاج اطفال ولاشيء ، والجو زين ، يازينها في الدراسة بس، أنا تعودت اني اروح للشرقية في شهر فبراير كل سنة.
10- أنا أقول والكل يقول الله الله بفحص السيارة قبل الرحلة وغير الكفرات خصوصا في هذي الاجواء ، الحمد لله انا غيرنا الكفرات وماصارت لنا مشكلة مع الكفرات ولله الحمد ، ولكن وانا راجعين وانا ماشيء وكنت أمشي 110كلمساعة ، اللي حصل أن السيارة ماعاد تستجيب (( حلوة ماعاد تستجيب ثقافة كمبيوتر :109) ، المهم ادعس بنزين ولاتمشي السيارة يعني بالعربي فصل الموتر معي ولااعرف وش السبب وما أسرعت بالسيارة ، وقفت السيارة حتى طفت من نفسها ، أنا قلت خلاص ماعاد تشتغل ، شوي أدق سلف (( اشغل السيارة )) إلا تشتغل وتمشي زي الحلاوة ، والحمد لله ماوقفت أبد حتى وصلنا ، اتصل الوالد بعمي الخبير الميكانيكي وقال ان المشكلة يمكن في طرمبة البنزين كهربائية وتفصل اوتماتيك مع ارتفاع الحرارة ، مع العلم ان السيارة جمس 2003 .
11- والله الله بدعاء السفر.
وشكرا لكم ولتعاونكم معي
والسلام
