يعطيك العافيه يالحبيب ، يبدو انها زياره ممتعه
بس بسألك ،، الفيزا الي طلعتها فيزة طالب ولا سياحه ؟
لأني بطلع فيزة سياحه وانا من المدينه واخاف اطق مشوار لجده واكلها على وجهي
وهل صحيح لازم اخذ موعد قبل لا أروح ؟

هلا بعد قليل ،،
واصل وعساك على القوة ، ومتابعينك ،،

متابع بحماس >> احتري الجزء الثاني بس اخوي فديتك ابي اعرف الاسبلنق حق حب شمسي اخاف اتوهق هناك لأني مدمن هالشي

بالتوفيق يارب .. وش صار معاك بشرنا

1. روبان السفينه ابشر بعزك .


2. والحين اكمل لأني ما ودي اطول عليكم :

الشفق الاحمر انا معي فيزا سياحية لكن اروح ادرس لفترة قصيرة لكن إذا سألوني في المطار ليه جاي اقول سياحة
، إذا اخذت موعد افضل لك ، يمشونك بسرعة وعلى العكس
الميكادو : هلا اخوي وابشر من عيوني
ABDULLH عبدالله : حب شمسي تعني Sunflower seeds أما كلمة seeds لوحدها تعني فصفص .

روبان السفينه ابشر بعزك .

والحين اكمل لأني ما ودي اطول عليكم :

يوم جاء يوم الاثنين ورحت للمدرسة استقبلو جميع الطلاب الجدد وكنا اربعة من السعودية وفيه جنسيات كثيرة من غير السعوديين واذكر انه كان فيه اسبان وفرنسيين والمان وارجنتين وبرازيل وبرتغال واتراك وتشيك وبولند
قاموا وعملو لنا اختبار عشان يوزعونا على الفصول لكن قبل الاختبار قالوا فيه عملية تعارف : كل واحد يقول اسمه ومن وين ، ،،،،،، كل واحد قال اسمه واكثر الموجودين كانوا بنيات ،،،،،،،قال المدرس الحين كل واحد يعرف يصافح زميله ويعرف نفسه سواء ولد والا بنت ،،،،،،،،، ام صراحة موقف لا احسد عليه ،،، انا اعرف ان مصافحة المرأة حرام ،،، وخلونا من اللي يقول عادي انا اخاف الله وما علي من احد ،،، المهم قمت اختار الاولاد واتحاشي البنات وكل مرة تجي بنت انحاش وكأني ما شفتها
المهم المدرس قال الحين كل واحد يسلم على شخص عكس جنسه ،،، يعني الولد مع البنت ،،،، الله يمحاه ،،،، ألحين وش اسوي ،،،، قبل شوي اهج منهن والحين وش الخطة
. إيه فيه واحد سعودي احس انه ما هضم المصافحة ،،، انا بصراحة ما اعرفه اول مرة اشوفه ، على فكرة كان ممنوع تتكلم بلغة الام ،،،، يعني الاسبان ما يتكلمون اسباني والسعودي نفس الشي وجميع الجنيسات ،،،، المهم انا طقيتها حوله
وقلت له ما نيب مسلم على بنات ، لكن كل ما قال شيء خل نسلم على بعض ،،، الولد قال تم . المهم كل مرة يغير . المدرس لاحظ انا كلنا عيال : قال ما يصلح لازم تغيرون المهم ، بوم قال غيروا ،،، ابعدت عن المدرس ورحت للسعودي الثالث . وافتكيت من هالموقف اللي ما احسد عليه .
بعد ما سوو لنا الاختبار : قالوا الحين بناخذكم بالباص نمشيكم على بورمث ونوريكم المحلات اللي تقدرون تاكلون فيها وتشترون حاجاتكم منها ،،، واخذونا على السنتر ،،، مكان حلو
بعد ما رجعنا قالوا بكرة تبدون الدراسة ،،،، يوم جيت من بكرة من محاسن الصدف ان السعودي اللي كنت اسلم عليه ودابل كبده امس معي بنفس الصف ، ما كان معي إلا هو سعودي والبقية اجانب من ديار الله الواسعة .
في المرة القادمة ابقولكم موقف اخر وهو عبارة عن معلومة تفيد الجميع إن شاء الله وشكرا على تشجيعكم والسلام

ههه موقف لا تحسد عليه ، لكن والله انك رجل لأنك تمسكت بتعاليم دينك . وانا لو مكانك ارميها بوجهه اقوله ديننا يحرم علينا هذا الشي .
طيب حبيت أسالك عن الاختبار الي قابلوكم فيه ، ماطريقته ؟

والله كفو بطل فديتك نحتري الجزء الثالث >> افكر اخذ قصتك لأمريكا واخلي مايكل سكوفيلد يمثل طريقة هروبك من البنات ها وش رايك يعني زي بريزن بريك وش رايك والارباح ففتي ففتي خ
نحتري القادم اخوك عبد الله

1. مبتدأ او تحت المتوسط او متوسط او فوق المتوسط او متقدم او محترف .


2. ABDULLH عبد الله : الحقوق غير محفوظة

الشفق الاحمر : الاختبار اللي سووه لنا كان تقييم بحيث يشوفون مستواك وبعدين يحطونك في احد المستويات مثل

مبتدأ او تحت المتوسط او متوسط او فوق المتوسط او متقدم او محترف .

ABDULLH عبد الله : الحقوق غير محفوظة

ونواصل رحلنتنا الجميلة . بعد قضاء يوم الاثنين في المدرسة وخلصنا رحت للبيت ،،،، كان البيت قريب جدا من المدرسة يعني اروح رجل . وكان قريب من شارع الشارمنستر وهو شارع معروف بالمطاعم العربية الاسلامية والبقالات المشابهة لما في السعودية .
وصلت البيت ولقيت فيه طلاب : كان فيه واحد تركي وواحد تايلندي واثنين سعوديين اخوان ، الاخوان كانوا بنفس الغرفة والباقين في غرف خاصة .
بصراحة ،،، أول ما عرفت ان فيه سعوديين تضايقت وكنت ناوي اشتكي للمدرسة لأني رايح اتعلم لغة واحب استفيد من كل دقيقة ،،،، والشباب اللي معي بالعائلة اثنين منهم سعوديين ،
قلت في نفسي اصبر واشوف ،،، ما ودي استعجل .... مر يومين وبصراحة السعوديين كانوا قمة الاخلاق والتعاون معي ،،،
مرة طلعت ابروح للشارمنستر ( اسم الشارع اللي عليه المطاعم العربية ) وانا طالع قلت لواحد من السعوديين ( احمد ) خل نروح مع بعض قال تم . مشينا ومع السوالف والدردشة مسكت يده مثل اي اثنين ماسكين ايدين بعض ،،،، مسكه عادية ( ما ادري تصورتوا والا لا ) المهم احمد واحنا نمشي فصل يدي عن يده وقال ابعد عني
،،، انحش وش السالفة
قال انت وش تسوي ؟ انا ما توقعتها منك
صراحة قلت احمد الظاهر مهوب صاحي
طيب وش السالفة : قال : يعني ما تدري !
قلت : لا
قال : يا اخي لا تحط يدك بيدي ،،،،،
يالله غربله طيب وش فيها :
قال هذي حركة يسويها ال gays الله يكرمكم ،،، و الله ما قدرت اكتبها بالعربي إكراما لكم
المهم قلت اجل كذا : خلاص والله ما عاد اسويها ،،، وهو جالس يكلمني يقول غريبه ما تعرفها ،،،،، هذي ثقافات تختلف عنا و ,,, و،،،،و المهم مع الحماس معه حطيت يدي بيده ،،، والله نسيت ههه
احمد عصب وقال وش فيك انت ، قلت اعذرني والله اني اسويها بالسعودية ومتعود اني وانا امشي نتماسك اليدين
ترى الحركة عادية اللي اثنين يمشون واحد يحط يده بيد الشخص اللي بجانبه .
وللحديث بقية إن شاء الله ،،،، شاكرا لكم على التشجيع والمتابعة

بعد قليل
من الاشخاص الي تستفيد من مواضيعهم المتميزه هنا في المنتدى
وباين عليك شخصيه طيبه ماشاء الله
لو ذكرت لنا اسم المعهد وعلى اي خطوط سافرت اخوي
اكون شاكر ومقدر لك
متابعك باستمرار .