أنتي كالقمر
07-09-2022 - 09:02 pm
بسم الله الرحمن الرحيم
السلام عليكم ورحمة الله وبركاته جميعا
السنه هذي سافرت لماليزيا وكانت هذي هي رحلتي الأولى ..وطبعا انواع الحماس
مابقى موضوع عن ماليزيا ماقريته .....ومابقى ورقه ماصورتها
المهم كنت انا وزوجي ومعانا صديق وزوجته....يعني الدعوه كشته ...وهذا اللي حلاها زود
وعاد اقولكم جهزنا شنيطاتنى ورحنى المطار وهناك تفاجئت انا وصديقتي انا شنط رجالنا اكبر من شناطنى
تقل شنط ناس مهاجره ....لكن عرفنا السبب ان لهم اسبوع وهم يتقضون برمودات وجنزات وخراطط زايد ملى اكبر حجم من الشناط
وبصراحه حنى فطسنى بيننا عليهم وعلى شناطهم وانواع التعليقات ....عاد اقولكم من الحماس كانو جايبينى بدري للمطار
طفشنى وحنى نستنى قلنا يله نشرب كوفي الا مافيه الا هالبوفيتين حقت الهنود لا ومافيها الا حبتين سيزر ....ياربي مطار شكبره واخرتها ....صراحه فشله ....انا نقدت عليهم مره ...وبيني وبينكم انا مرتاً نقود
المهم عاد رحلتنا على شركه صينيه .....طرنا ...وياربي ليل وخير وخيسونا بالهالوايت واين وطقته .....وكل مامرو بغراشهم ..قبل لا احكي رجلي يقول لاتشربين تراه خمر (مدري شقصده هقوتكم يلمح )
وشوي الا يفتح لي على مجلة المبيعات على التتن ويقول يالله اختاري (مدري وشقصته الرجال شكله يبي يخربني ...مدري يبي يأقلمي على الوضع الجديد ...انا نغزني قلبي وبغيت انقز للطيار وقوله افتح الدريشه قبل لا نتعدى الرياض بنزل الرجال
عاد فطسنى كلمه قليله على التعب اللي شفناه ....عاد يوم جت حزة الفجر ويحدني ربي على حمامهم
حمام كلابه ....اعوذ بالله ....الدنيا كلها مروحه ارضيتهم على كلش حلفت ماحط فيه شي
مع انه لو ذا كان ديتول بالنسبه للي شفته توضينا وصلينا وهات ياطلطله مع الدرايش وصلنى هونج كونج يوم نزلنا ....يالله الجنه وين حنى فيه بعالم ثاني رقي وفخامه وعلوم زينه تحس نفسياتنى ارتاحت شوي ساعه الا ركبنا الطياره وعلى ماليزيا ...بغيت احلف ماركب تعبت اولتها وكرهت شي اسمه طياره ...
عاد وصلنا ماليزيا ...واقسم لو تبون تحطوني بكرتون انحط خلاص جسمي خذا شكل الكرسي ...حتى اني يوم قمت ابمشي ماعاد عرفت ...قلت عسى اتذكر كيف الطريقة ...حدود 14 ساعه الى 13 طيران
ايه نسيت اقول لكم انا من يوم ركبنى الطياره وانا ترى بيوزعون علينا كروت و رجلي يناظرني وكنه ناقد علي ......وكل ماغفيت شوي نقزت وقلت لها ها ماجابو الكرت ...وهو يقول ارقدي ارقدي
ماصدقني ويوم اخر الرحله الا وزعوها ...وانا اقوله شفت قايله لك ...اوخذتها قلت هات اعبيها اعرف ونظراته تقول تكفين فكيني منه واطلع الترجمه اللي خذتها من المنتدى الله يجزى من حطها خير واخلصها
المهم يوم وصلنا المطار ويازينه من مطار واقود الفوج الى القطار والطرق كاملا من تخليص الجوازات عند كاونتر نسائي لزوم الفتشه الى تخليص العفش والله يجزى هالمنتدى عنى الف خير ....عاد النكبه اللي صارت لنا في المطار شي وحده من الشنط مالقيناها وعصبت صديقتي ضعيفه ....وعاد حنى فينى شر جلسنى نتنحت شنط الرجال ونقول علشان كذا مكبرينها ..مايصير فيه مجال لنسيانها..المهم عطونا ورقه بالشنطه وركبنى تكسي ب90 ورحنا سيلانجور ....فندق ماينز المطل على البحر
الصراحه الفندق روعه ومريح نفسياً والمنطقه المحيطه به خيال وملحق به مجمع تجاري و حديقة ماينز وندر لاند....وفطوره حلو ...ومستوى الغرف ماقدر اقول فخم .... اعلى من الوسط بشوي بس تبون الصراحه ماغير نمسي فيها يعني ماتحسفنى ولا واحد في الميه ....لأننا انبسطنا في هالفندق فوق ماتتخيلون ...الصبح ادق على خويتي ولا تدق علي ننزل نتمشى فالمنطقه المحيطه بالفندق ونأكل السمك ونغطط رجلينى بالبحر همن نروح نفطر والروعه انك تشوف الناس حولينك بمختلف الجنسيات صاحين
همن نروح للمجمع ناخذ لفه .....والعصر طلعنى للحديقه اللي جنبه لنا مغامرات كثيره بحكيها لانفش اصبعي
ورم من كثر ما اطقطق به يالله لا تواخذونا وسلامي للجميع ولخالتي في دمنهور وبنت عمتي في المنيه واقول للحجه توحيده الله يجزاك خير ارجعي لمصر وكفي طراره من الحرم
