السلام عليكم ورحمه الله
اتمنى ان تقبلوني مسافرة جديدة في هذا المنتدى الجميل الذي اقمت معه علاقه طويله مملوؤه بالصمت والحب الا اني اتووق شوقا بكل يوم لاجول بين طياته الخلابه واهله الرائعين ..
اشكر جميع القائمين على هذا المنتدى ومشرفي الاقسام الذين كسوها باجمل الحلل والثياب حتى باتت بنظر الجميع الرائده والوجهه الاولى لكل مساافر .. فكما استفدت احببت ان افيد ..
واستميح العذر من الجميع لانه التقرير الاول بالنسبه لي ..
الرحله : كويت – فرانكفورت – فينا ..
وقت الرحله 2011
المسافرون : انا وزوجي وبنتي 4 سنوات وابني 2
على الطيران الالمااني
اول الرحلة كان خطأ فادح حتى اني الى الان وانا اكره حتى ان اتذكر ذلك اليوم الاول الذي توقعت ان يكون اجمل يوم في الرحله
والخطأ بعينه اننا اخترنا محطه الوصول فينا واحنا مو حاطين ببالنا انه نقعد فيها على اساس على طول نروح لفندقنا بكابرون ..
فتخيلوو معاي من ثمان بالليل بمطار الكويت الى فرانكفورت ومن فرانكفوورت وحووسته ومطاره الكبير اللي فقدت فيها دراجه ولدي
الى مطار فينا وصلنا مطار فينا ماندري وين نروح ونسحب الجناط معانا الله يعز الكويت وخدمها وهنودها من قبل ماتكلم ساحب العربه ويشيل اغراضك ..
ولدي سنتين متعب الولد جوعان وتعبان من السفر والطريج ومايقدر يمشي يبينا نشيله وانا يالله اشيل روحي
ومعانا ثلاث جناط كبار .. ويالله عاد دور محطه القطار اللي يوديك كابروون ..
زوجي ساحب جنطتين وانا ايد بالجنطه وايد شايله ولدي وانادي بنتي امبيه احس ببجي وانا اتذكر كسرت خاطر نفسي
ماكنت حابه اذكر اول يوم لانه جدا حزين بالنسبه
العبره من الحجي اللي فوق كله طبعا اهي كلها اخطاء مني انا اول شي ..
اول شي كل مسافر الى دول اوربا يهيئ نفسه ان كل شي خدمه ذاتيه اخدم نفسك بنفسك ..
اخذ جناط على قدك .. وعيالك قبل ماتسافر اخذهم معاك جربهم بجم طلعه بالديره اذا حسيت نفسك اوكي ماعندك مشكله تاخذه معاك وديان وانهار وبحيرات اخذه معاك ..
انا عن نفسي اول خطأيين ولدي الصغير والشغله الثانيه كان المفروض من مطار ميونخ اقرب لكابرون بما اني ما ابي فيينا ..
او الحل الثاني اني اسكن لو على الاقل يوم واحد بفيينا وعقب اروح لكابرون..
وطبعا مأساه بالقطار فيها مواقف جدا سيئه مابي اذكرها كافي الكدر اللي فوق ولا راح اتكلم بتفاصيل اليوم الاول وشصار بكابرون ..
زبدة الموضوع وصلنا الساعه 10 باليل
وهكذا انتهى اليوم الاول التعييس