بعد رغبة عارمة لزيارة هذه الدولة إمتدت لحوالي ست سنوات كتب الله
لي زيارتها أخيراً ولله الحمد. وإليكم تفاصيل رحلتي والتي أرجو أن تكون
بعيدة عن التكرار في مثل هذه المواضيع إن شاء الله تعالى .
رحلتي إلى إندونيسيا:.كان أعضاء هذه الرحلة هما إثنان ، محسوبكم ( الأشهب ) وصاحبه .
فبعد أن شاورت صاحبي هذا في سفرة إلى إندونيسيا للإستمتاع
بالطبيعة هناك أعطاني موافقةً مبدئية بنسبة 70% .
قلت70% نسبة طيبة فذهبت أستفسرعن الحجوزات وأسعار التذاكر ،
وكان ذلك في منتصف شهر يوليو ( تقريباً) فوجدت أن الخطوط
السعودية لايوجد إمكانية للحجز عليها لأنها فل تماماً . قلت ولاحتى
إنتظار ؟ قالوا ولاحتى إنتظار. قلت كله سوا أصلاً السعودية حاط عليها(
x) من زمان . قلت طيب غير السعودية إيش الي متوفر ok قالوا لي فيه
الخطوط الجارودية . قلت والسعر كم ؟ فتفاوتت أسعار المكاتب ، الي قال
لي 2300(مكتب عابر القارات ) والي قال لي 2600 ( مكتب فرسان )
والي قال 2100 ( مكتب كانو للسفريات ) . قلت بس وقف عند أبو
0الصراحة شفت السعر مناسب جداً .وبالمناسبة مكتب فرسان
الآنف الذكر والواقع بحي البديعة في الرياض كان تعامله سيء جداً
ونصّاب بالعربي الفصيح . عموماً قلت هذي ok100% قال 100% قلت
حلو . بس عسى يرد علي خويي بسرعة بالموافقة أيضاً 100% . لكن
خويي كان وسيع صدر شوي الله يحفظه ، جلس أسبوع كامل ماعطاني
علم ماقدرت أصبر أكثر ودقيت عليه هاه يافلان وش العلم ؟ وليه مارديت
علي إلى الآن ؟! قال والله يارجال مشغولين بعزايم ومناسبات !! قلت
المهم هاه وش صار عليك ؟ قال غداً أعطيك العلم الأكيد إن شاء الله .
قلت على خير إن شاء الله .
وبالفعل إتصل خويي وقال توكل على الله ، أنت حجزت خلاص ؟ قلت
وشلون أحجز وانت توك الآن تعطيني الأوكي ؟!!!!
عموماً ذهبت لمكتب ( كانو للسفريات ) لكي أحجز تذكرتين ذهاب وعودة
على الخطوط الجارودية ، وعندما وصلت له قلت يالغالي ودي أحجز على
الجارودية الإسبوع الجاي إن شاء الله ، وانا الي جيتك قبل إسبوع تقريباً
. قال آه فكرك لكن الأسعار تغيرت . قلت وشلون ؟!! قال والله زادت
وسعر التذكرة الآن 2500 ريال !!! قلت يارجال أنا قبل حوالي إسبوع
بس انت قلت لي 2100 . قال صحيح لكن الأسعار هذي مش مني أنا .
قلت طيب مؤكدة الذهاب والعودة ؟ قال الذهاب آه لكن العودة إن شاء الله
راح تتأكد . قلت بعد بالسعر هذا وهي ماهي مؤكدة العودة ؟!! قلت ماش
مايصلح هذا الكلام ، وكنت أقول ( حسبي الله على إبليسك ياخويي !!! )
فذهبت أستفسر عن الأسعار من مكاتب أخرى وكانت كلها حول الدعوة ،
لكن ليست المشكلة هنا ؟! المشكلة أن جميع المكاتب قالوا أن العودة
ليست أكيدة . وهنا تكمن المشكلة ؟!
أثناء ذلك طرأ على بالي أن أتصل بالأخ ***** الشتيوي صاحب مكتب
الشتيوي للسفر والسياحة ، وأحد الوكلاء المعتمدين لدى موقع العرب
المسافرون ، وذلك لما رأيته من الثناء عليه في حسن تعامله والمعاملة
الخاصة التي يحضى بها المنتسبون لهذا المنتدى ، فقمت فعلاً بالإتصال
به وذكرت له حاجتي ، فرحب بي جزاه الله خيراً وطلب مني أن أتصل
عليه في الغد لكي يستفسر لي ، ثم إتصلت عليه وقلت له وش صار
بارك الله فيك على موضوعي ؟ ، فقال أي موضوع ذكرني بالله ؟ وذكرته
ثم إعتذر لأنه لم يفعل أي شيء بالموضوع لنسيانه وكثرة أشغاله . وقد
أجد له عذراً في ذلك . ثم قال لي لحظة وأخذ يسأل الموظف الذي بقربه
كم سعر رحلة الجارودية إلى إندونيسيا فقال لي أن السعر 2650ريال ؟!
قلت يابو ****** تراني لاقي أقل من السعر هذا ، وانا عضو في
المنتدى قال والله هذي الأسعار الي عندي قلت طيب وتأكيد العودة ؟ قال
والله العودة إنتظار . قلت عندي خبر جزاك الله خير وأنا ابيها ok . ثم
قال لي أنت في الرياض ؟ قلت الله الله قال خذهذا رقم واحد هندي يشتغل
في الرياض قل له جايك من طرف الشتيوي وإن شاء الله يبي يأكد لك .
قلت ماقصرت ومشكور ؟!! الظاهر أن الأخ ***** مشغول ولاهو
فاضي لي ، ومع هذا كله السعر أغلا من غيره ؟!. كلمت الأخ الهندي
وقلت له حاجتي أن الحجز يتأكد ok وهذا أهم شيء . قال لي بلغة
الواثق مافيه مشكلة كم نفر في روح قلت أثنين نفر وعطيته التاريخ وكل
شي يبيه حتى الأسماء بالضبط . قلت له ياصديق إن شاء الله 100%
ok قال إن شاء الله . وجلست أنا وياه ولمدة يومين في لت وعجن وكل
ماكلمته قال ياخي هذا ليسا هينا مشكلة كله فل . قلت الزبدة طيب قال
كلم بكرة انا في سوي محاولة ثانية .
كلمته من بكرة وقال لي شوف ياصديق فيه حل واحد بس ، هذا عوده
كله فل لكن في طريقه أنت يدفع 370 ريال زيادة علشان هذا مكان قدام
أكثر فلوس . قلت قدام وين ؟! في الأولى يعني ؟! قال لاياشيخ مافيه
أولى هذا سياحيه لكن مكان قدام مافيه ورى ، إذا أنت يبغى هذا في ok
ذهاب وعودة . قلت غيره ؟!!! قال مافيه . قلت وش البربسة هذي مكان
قدام ومكان ورى ، وياسلام يعني بكم صارت التذكرة بحوالي
2900ريال؟!!!!!!!!. الظاهر أوروبا أرخص ياولد ؟!!! لا وكان يقول رد
علي بسرعة . قلت خلاص إذا أذن المغرب ماكلمتك كنسل ، وكان الوقت
الظهر .
الحقيقة كنت في حيرة من أمري ، ولاكان عندي خيار آخر ، فجميع
خطوط الطيران الأخرى فل ولايوجد إمكانية .
في تلك الأثناء أخذت أقلب الصحف فوجدت إعلاناً لمكتب ( التسهيلات
للسفر والسياحة ) ، رفعت السماعة وكلمته وكان الأخ سعودي ، قلت
يالغالي فيه إمكانية إندونيسيا مطلع الأسبوع القادم ؟ قال إن شاء الله
أنت بس تعال ولايصير خاطرك إلا طيب . قلت كفو والله ، طيب على أي
خطوط ؟ قال على الكاثي باسفيك . والسعر ؟ قال حوالي 2450 تقريباً .
قلت والله معقول جداً طيب أنت موجود الآن قال موجود . قلت جايك
هوى .
وصلت بالفعل لمكتب التسهيلات والواقع في حي الملز وكان الأخ
الموظف في إنتظاري ، أخذ الأسماء كما في الجواز وقال لي أن الحجز
إنتظار . قلت إيش ؟!!!!!!! قال وش فيك ماعليك ياأخ انا اليوم إن شاء
الله أءكده لك . قلت إن شاء الله أكيد ؟ قال إن شاء الله . قال إنت بس
سدد وراح أعطيك فاتورة عليها قلت كم يالغالي ؟ قام يطقطق بالحاسبه
قال تكلفة الشخص الواحد 2680 . قلت يالغالي انا يوم كلمتك قبل أقل
من ساعة قلت لي حوالي 2450 ؟!!! قال والله يمكن إني غلطان .
!!!!!!!!! قلت طيب أكيد في الرحلة ترانزيت ؟ قال فعلاً ترانزيت في
الذهاب والعودة في هونق كونج لكل رحلة 3 ساعات قلت بس مافيه
غيرها ترانزيت ؟ قال أبد . قال هاه نتوكل على الله قلت توكل على الله .
والحقيقة إرتحت لما قال على خطوط الكاثي باسفيك نظراً لمدح كثير من
الإخوة لها والثناء الكبير عليها في هذا المنتدى لاسيما بعض المشرفين
الأفاضل .
وفي المساء إتصلت على الأخ الموظف وقلت له وش العلوم ؟ قال تعال
خذ تذاكرك المؤكدة الذهاب والعودة 100% . قلت ماقصرت يالغالي .
وأخذنا نجهز للرحلة ومن ضمن ذلك إستخراج الفيز حتى حان موعد
الرحلة في تاريخ 25/7/2004م الموافق ليوم الأحد في تمام الساعة
1-30مساءاً .
ولي عودة قريبة إن شاء الله لإستكمال أحداث الرحلة والإنطباعات
المتعلقة بها .