بسم الله الرحمن الرحيم
السلام عليكم ورحمة الله وبركاته ...
تحية عطرة للجميع واتمنى انكم تتفاعلوا معي في الموضوع
الكثير كتبوا عن سلبيات ماليزيا وجيت ورديت عليهم بردود جافة وقوية
ممكن تكون عائق لتحقيق هدف هالمنتدى العامر اللي هو تبصير
السائح العربي بالدول المتجه اليها ... وربي يعلم انه الموضوع مش
شخصي وانما اقتناع ويقين بأنه ماليزيا تعتبر من افضل الدول
السياحية الاسلامية في الوقت الحاضر .
وزعلت اخوان مني وانا متأكد انه للآن منهم شايل في قلبه علي
فحبينا الله يسلمكم في هذا الموضوع اننا نكتب سلبيات ماليزيا
وحلول مقترحة لها لاجل نتطور ... ويكون حوارنا هاديء وجميل
ونتبادل فيها الاحترام قبل الاراء لاجل لا نزعل من بعض وهذا الكلام
اوجهه لنفسي قبل اي شخص ...وكل شخص يقول رأيه ويتوقع
من العضو الاخر انه يفند رأيه ومن بدري لا نأخذها بحساسية
ونعتبر نفسنا عائلة مجتمعة بمجلس وورانا رحلة لماليزيا وكل
واحد يقول رأيه بكل صراحة ولا يفكر في العضو الاخر انه يزعل
او يشيل في قلبه لأننا عائلة واحدة وهدفنا واحد .
الله يجزى كل المشاركين ولو بكلمة كل خير وخلنا نبصر حبايبنا
اللي ورانا اللي بعدهم ماراحوا ماليزيا ومنها نتبادل اراء وافكار .
ادري انه اخونا الخواطر طرح هالفكرة الجميلة ولكن ما نقدر
نتناقش فيها لانه فيها ذكر نقاط فقط .
حنا الان ودنا نتناقش في سلبيات ماليزيا ومن الان نصفي قلوبنا
وخلونا متأكدين انه مش بالضرورة انه الجميع يشاركونا ارائنا
اقول بسم الله وابدأ :
1- اغلب التكاسي وجشعهم ...ترى تعلموا ما يشغلون العداد
ويقول لك مثلاً لفندقك ب15 رينجيت وان كانت بالعداد ما راح
تكلف اكثر من 5 رينجيت .
هذه حلها بأيدنا ولكن تحتاج الى تعب وتضحية مننا ...
اما تتصل على الشرطة السياحية وتخبرهم باللي صاير لك
وهذا حيكلفك مجهود ووقت ولكن حتعطي راعي التاكسي
درس ماينساه ويخاف من كل عربي يقابله انه يكون مثلك
وتبلغ عنه وتجيب له العيد .
وعندك حل اخر وهو بسيط انك ترفضه وتقول دام انك ما تشغل
العداد راح ابحث غيرك وشعره غلطه وبكل ادب امشي وابحث
عن تاكسي اخر وراح تتعب لين تلقى واحد يرضى لك بالعداد
وهذا المجهود تشكر عليه ولو كلنا تقيدنا ونفذناه ماراح تلقى
سواق تاكسي مر عليه عربي الا ويفكر الف مرة .
2- عدم وجود تسعيرات محددة للتنقلات بين المناطق والمدن
وخاصة في التكاسي لأنه الباصات ثابته والطيران مثلها .
هذه حلها بشكوى لوزارة السياحة وهم يتصرفون فيها .
وودنا نتعلم استخدام الباصات وخاصة انه كثير من الحبايب
اللي رجعوا من ماليزيا خبرونا انهم استخدموا باصات
في تنقلاتهم وكنت صراحة اتخوف من اني ادل احد على الباصات
لانكم تدرون عوائلنا وخاصة ان كان فيها نساء كثير وصعوبة
الباصات وعدم تعودهن ولكن شجعني رؤية الكثير من نسائنا
يرجعون وهم مجربين ومستانسين من الباصات .
3- اختلاف تسعيرة بعض الاماكن وبعض الفنادق عن السائح
وابن البلد وبين السياح انفسهم .
ترى دخول الحدائق للماليزين سعر وللسياح سعر اخر
وبعض الفنادق تعطي للخليجي سعر وللاوربي سعر
وللاسيوي سعر فهذه والله مش حلوة حتى ان كان الياباني
يدفع اكثر مننا ولكن هالعنصرية مخربة لجمال الدولة .
هذه حلها شكوى لوزارة السياحة والحمدلله انه اغلبنا ما يحس
بها لاننا نخلص الحجوزات كلها من بدري .
يا اخوان في اي دولة سياحية تجد الشرطة السياحية وهذولي
عملهم وشغلهم خدمتك ... ما ادري حنا ليه ما نشغلهم ونطلبهم
متى ما صادفتنا ولو مشكلة بسيطة ...اتذكر شخص استرالي
ومعاه زوجته على ما اعتقد جاب الشرطة السياحية للسنترال
ماركت لاجل انه البائعة ما رضيت ترد مبلغ اباجورة اخذها
منها بالامس والظاهر ما عجبته وبغى يردها وهي رافضة
فعلى طول اتصل على الشرطة السياحية وصار بينهم كلام
كثير وشفته بعدها بعشر دقائق يتمشى مع مرته والاباجورة
مش معاه ...استنتجت انهم مشوا له شغله .
لا بد اننا نعرف الشرطة السياحية ووزراة السياحية اننا
امة لا تستهان بها واننا لنا وزننا واتوقع اننا اقل ناس
نشتكي ونقول مشي حالك يا ابوية
ادلوت بدلوي بارك الله فيكم ونتمنى منكم اثراء الموضوع
بمشاركاتكم القيمة والله يجزاكم خير على ماتقدموه لاخوانكم .
ولكم جميعاً مني كل تحية وتقديري ولنا عودة بأذن الله
والسلام عليكم