السلام عليكم ...
الله يعطيك العافية اخوي حمودي على الاعلان الجميل .
اخوك جربها وان بغيت اي استفسار فيه تراني في الخدمة .
والسلام عليكم .

الشعيبي
من اجل اعضاء المنتدي نقدم كل شي
ممكن تكتب تقرير عن هذة التجربة
للاستفادة فقط
حمودي

الشعيبي
شكر على الكلام الجميل منكم
من اجل اعضاء المنتدي نقدم كل شي
ممكن تكتب تقرير عن هذة التجربة
لك للاستفادة ويطلع علية الجميع
حمودي

أرجوك
يالشعيبي
تكتب التقرير
انتظرك بفارغ الصبر
وان حصل عنوانهم بماليزيا علشان ازورهم هالسنه فنور على نور
ولك شكري وتقديري

يالشعيبي السلام عليكم ورحمة الله وبركاته تراني من اطلعت على ذا الإعلان وأنا دايم أتصل فيهم ولا أحد يرد ويطلب ترك رسالة وصندوق الرسايل ممتلي ودخلة على موقعهم قبل ما أدخل على ذا النتدى على طول وتركت رسالهم لهم بعد
ودي أعرف متى برنامجهم يبدأ وش شروطهم وغير ذلك 0
على فكرة كيف الهفوف ؟ واستوى القر عندكم ولا بعد ؟

والله أنا أشوف الواحد يروح على حسابه أحسن له لآن المكاتب مامنها فايده فلوس على الفاضي ..
أعرف ناس راحوا عن طريق مكاتب ويشتكون منها كثير
واللبيب بالاشارة يفهم
هذا كل شي حبيت اوضح لكم هذي الاشياء وماليزيا بلد مسلم فيها العرب ملايين يعني اللي يسال مايتوه
الفلوس اللي بتعطيها المكتب تمشى فيها (( نصيحه ))

الشعيبي ايش درست بماليزيا وكم كانت المدة... وتنصح الواحد ياخذ دورة لغة هناك؟
ياليت تعطينا شرح كامل عن رحلتك الدراسية افضل :d

السلام عليكم ...
حيا الله شبابنا المسلم اللي يرفع الراس .
اخوي حمودي واخوي مغترب واخوي بن ملحم واخوي ابو معاذ .
ابشروا اخواني وانتم تأمرون امر .
اخوي بن ملحم اي هفوف انا عندكم يا شيخ ماني بماليزيا
اخوي الخطيرمعاك حق وانتظر وشوف الفلم ولا تسبق الاحداث
نبدأ الرواية ....اسف مقدماً على ركاكة التعبيروطول الشرح لكن المهم
انه الصورة توضح للجميع .
توكلنا على الله ...
بداية القصة ...السنة اللي فاتت وان خارج من الكلية عندنا شدني
اعلان معلق في لوحة الاعلانات...شفت فيها اسم معشوقتي ماليزيا
ومكتوب فيه عن الدراسة بماليزيا ....المهم اخذت الرقم وفي العصرية
ذي المجنون دقيت عليهم واول ما اخذت العنوان اتجهت للمكتب ...المكتب
بجدة بشارع حائل امام مبنى زيماس ...طلعت مكتبهم ...اعتقد الدور الرابع
ولقبته معهد اسمه الاندلس ....ودخلت مكتب فيها اخ سعودي ...وقلت له
انا اللي اتصلت بك ...رحب وقال لي انتظر الاخ المسؤول دقائق وهو جاي
والله وجانا الاخ وما قصروا ...عندهم عروض للدراسة بالجامعات الماليزية
وعندهم معاهد لغة ...قلت يا اخوي انا طالب ادرس في الجامعة وودي معهد لغة
وقال حنا نتعامل مع معهدين ..els و البيت الدولي ...قلت له ودني حتي البيت
الوطني المهم ابغى اللي معاي ملايو وفكني من الصينيين المهم ضحك
ضحكة غريبة ...احسه فهم غلط ...المهم قلت له طيب كيف السكن ...
قال ان بغيت فندق موجود وان بغيت سكن طلاب موجود ...طيب عطني الاسعار
حسبها لي شهرين دراسة بالمعهد els والسكن بفندق 4 نجوم اللي هو فندق
كريستال كراون ببتالينغ جايا في حدود 7500 ريال .
وان بغيت دراسة من غير سكن لمدة شهرين ب4000 ريال .
وان كنت ودي اطول اكثر من شهرين احتاج ادفع 400 دولار حق فيزا الطالب
وتأمين صحي اجباري ....وطبعا تزيد التسعيرة ...
المهم رجعت البيت واستخرت وجبتها يمين وجبتها يسار ...للمعلومية قبلها
رحت ماليزيا 11 مرة لكن كسائح ورغم كل هذا كنت متردد ...المشكلة اللي كنت
شايل همها السكن المناسب ...لو فندق بسيطة لكن كنت ابغى ادخل في اعماقهم
وكنت احلم بسكن طلاب وان كان بسيط ...ودنا بنت الحلال ياهوه افهموها
المهم كلمت اصدقائي بماليزيا وقالوا حنا نفزع لك وهذه الاسعار غالية ..قلت
ما تقصروا ونشيلكم لاكبر ..المهم احد الاخوان المقربين ارسل لي عنوان
لمكتب بماليزيا يقدم هذه الخدمات ...المكتب اسمه عرب لينك ...كلمت اخ اسمه
وليد ...وبعدها حولني للمسؤولة اللي هي الاخت نعيمة ويتكلموا عربي موية .
المهم قلت لها ودي معهد els ومعاه سكن لي خاص بسكن طلاب ..قالت طيب
حق المعهد في الشهرين 2500 ريال .
ونعطيك غرفة مكيفة في سكن نظيف ب400 ريال للشهر .
لكنها مشتركة مع طالب ...قلت اسف اختى ابغاها لحالي ..قالت ان بغيت
لحالك تدفع حق نفرين ..يصير الشهر 800 ريال ...قلت لها توكلنا على الله
وهم ياخذون 600 ريال على خدماتهم ...ياخذوني من المطار ويسجلوني
ويحجزون سكني وما يتركوني لين ما يستقر حالي ...قلت نوكلنا على الله .
اوفر صح وعلى كيفي ...ودكم تسجنوني بفندق لمدة شهرين .
كل السالفة مع اختي نعيمة ما كلفت 5000 ريال .
الدراسة والسكن والخدمات ....لكن التذكرة والمعيشة والمواصلات
هذه كلها حسبة ثانية .
كل هذه بداية
اسبوع رحلتي ارسلت لهم فاكس بموعد وصولي وكلمتها على التلفون
أأكد عليها ...طارت الطيارة ووصلت ارض الملايو ...وبرد قلبي يوم
شفت ارض الملايو وانا خارج لقيت فتاة ماليزية شايلة ورقة بأسمي
ابتسمت لها وسلمت طبعاً بدون مصافحة وعرفتني بزوجها ووصولني
لسيارتهم ...وكان وصولي يوم احد وكان عند علم من اول اني حأسكن
في فندق مؤقتاً لين يوم الاثنين ...اخترت فندق بان باسفيك وقبلها عزموني
على غذاء لذيذ وبعدها راحوا بي اشتري شريحة جوال ...لأجل اطمن اهلي
وقدني اتصلت عليهم من اول ...واتواعدنا نتقابل بكرة الساعة8 صباحاً .
ذهبوا بي الى بيتالينغ جايا ...30 دقيقة من كوالا واتجهنا للمعهد وقالت
لا بد تقدم اختبار تحديد مستوى ...اخبرتها اني راضي بمستوى صفر ...
نيتي ودي اعرف طريقتهم واسلوبهم وان كان على فلوس الاختبار خذوها
لكن لا تختبروني ...المهم اقنعوني ...
كان الاختبار سمعونا شريط ومنها تكون الاجابة ...واختيارات .
ومعها مقابلة شخصية بسيطة ....وش اسمك ومن وين ...الخ .
وبعدها يظهر المستوى ....المهم طلع مستواي 4 وعندهم 9 مستويات
وكل مستوى بشهر ....وبداية الدراسة تبدأفي اول يوم اثنين من كل
شهر ميلادي ...المهم كان هناك واحدة ملايو دحلستها تنزلني مستوى
صفر لأني عندي هدف وصارحتها فيه ...وجزاها الله خير ما قصرت
لكن اخذوا مني عهد اني لو طفشت ما اطلب منهم يغيرون المستوى ..
لا تخافين ...المهم اعطونا الكتب بعد ما دفعنا واخبرونا بموعد حضورنا
وبعدها اتجهت للسكن بعد ما خيروني بين فندق وسكن ...قلت سكن وفكونا
من الفنادق ...ودوني لسكن اسمه ملينيوم كورت جنب جامعة ملايا ...بالسيارة
3 دقائق ...وحطيت عفشي وشفت الغرفة ...بسيطة ومكيفة وبها دورة مياه يكرمكم
الله ...وأكدت على موضوع لحالي ...ودفعت حق نفرين .
كان السكن نظيف وبه امن ومصلى ومطاعم بالاسفل وسوبر ماركيت ومكتبة ومقهى انترنت
وغرفة للزوار وصالة حديد وبلياردو وحلاق وكان بالغرفة خط انترنت..بشهادة
الاخوان الماليزيين انه السكن ممتاز ...وكانت 4 مباني 3 غير مكيفة وواحدة مكيفة
اللي كنت بها وكانت مليانة عرب .
المهم جاء يوم الدراسة ....الساعة 8 انطلقت مع اخوين من اليمن اتعرفت عليهم
بالسكن وقالوا ننتظر شوي اخوان لنا لانهم ادرى بالطريق ...المهم نزلوا3 شباب
عرب وسلمنا على بعض ولقيت واحد منهم سعودي ويدرس بأم القرى وجاء ياخذ
لغة لكنه سابقني بشهر ...ومشينا كعابي ....الجو كان حلو وكنا مجموعة ومع
السواليف ما حسينا بالمسافة والوقت ...مرينا من حارة اغلب الطلاب يمرون منها
و5 دقائق وانت واصل المعهد .
وصلنا وقالت الانسة جووانا الجداد على فوق ...تعارف وفرجونا فلم وخلونا
نغني اغنية المعهد والله شيء يفشل ....وشرحوا لنا خطتهم واعطونا الجداول .
واتجهنا كل صوب فصله ...دخلت فصلي اللي هو المستوى صفر ولقيت العجب
4شخص عربي وشخصين ماليزيين من اصل صيني وفتاة تايلندية ...
دخل علينا مستر lee الصيني واعطانا درس فيها ضمائر .
وبعد ساعة ونصف رحنا للمعمل فوق .
وبعدها جاتنا مدرسة المحادثة الانسة شاندرا الهندية ...طبعاً هذه اصولهم
لكن جنسيتهم الماليزية .
وبعد ساعة ونصف وبعد انتهاء الدرس كانت فترة راحو وغداء .
من 12ونصف ل1 ونصف ...جنب المعهد مطعم صيني لكن اشك في انه
ماهو بحلال ....صرنا ناخذ تاكسي ول سيكشين 16 ناكل ونرجع بعدها
للمعهد ....وبعد الغدا نرجع للفصول ويكون درس قراءة وكتابة ...مع
السيدة لوان الصينية .والساعة 3 افراج ونرجع للسكن وان اخترت
الفندق دقيقة واحدة وانت واصل الفندق ...اما حنا تعبنا من مشي الصباح
والجو في الظهر حار وبعض الاحيان مطر فصرنا بالتكاسي .
وبالسلامة ننزل بالسكن ....والحمد لله .
بالله ما طفشتوا من القصة ...اصابيعي صراحة تعبت
المهم ان كان اي شي ماهو ظاهر او موضح قأبشروا بالتوضيح ..
والمكتب اللي تعاملت معاه اسمه عرب لينك ..الاخت نعيمة الله يسلمها .
ورقمها عندي لكن يمنعون في منتدانا الاعلانات اجل اللي يبغاها يعطيني
خبر وانا ارسلها له على الخاص .
الله يوفقنا جميعاً وجزاكم الله انكم تحملتوني ولكم كل تحية وتقدير .
والسلام عليكم