1. المهم ردوا علينا مكتب سفاري النصابين ان الباكج ب 11000 درهم


2. و بكل احترام دفعنا لهم المبلغ و قالوا شكرا و روحنا ..


3. و طول لوقت ادعي عليهم على حركتهم هذي ,,

السلام عليكم و رحمة الله و بركاته
مبروك عليكم شهر رمضان الكريم
هذه تجربتى الشخصيه مع مكتب سفاري ديز في كيرلا والله على ما اقوله شهيد على كل كلمة ..
اولا كيرلا روعة روعة طبيعة بكر .. لكن هذا المكتب حسبي الله عليه عكر مزاجنا طول الرحلة ما يسوى علينا حجزنا عندهم ..
الحين ببدأ معاكم عمليات نصبهم بالتفصيل عشان تاخذون حذركم منهم
اولا كنا رايحين مكتب سياحي عندنا و قررناا نسافر كيرلا و نقعد فيها 17 يوم (16 ليلة) و قال لنا المكتب اللي في ديرتنا ان الباكج ل شخصين 13000 بدون تذاكر و فنادق تتراوح بين 4 و 5 نجوم و غرف ديلوكس
اهني نحن قلنا عاد وايد و قلنا خلنا نفكر و نشوف .. عقب دخلت هالمنتدى الرائع و عالسريع خذت عنوان ايميل مكتب سفاري ديز و جهاد بدون ما اسوي بحث عن اراء الاعضاء عن رايهم بشأن هذين المكتبين ..
خذت ايميلين المكاتب و كلمت زوجي ان نراسلهم على اساس نشوف الباكج عندهم بكم ..
طرشنا لهم جدول الفنادق و في اليوم الثاني الصبح ردوا علينا مكتب سفاري ديز انهم بيشوفون و بيردون علينا على وقت المغرب .. اما مكتب جهاد ما ردوا علينا ..

المهم ردوا علينا مكتب سفاري النصابين ان الباكج ب 11000 درهم

شفنا فرق السعر و قلنا انا و زوجي نتوكل على الله لان مافي وقت و نحن حاجزين التذاكر و ما باقي الا اسبوع عالسفر ..
اتصلت ب زوجي وحدة من مكتب سفاري و قلنا لها احجزي الغرف عشان نضمن ان غرفنا محجوزة و نحن رايحين قالت لنا انتو اولا طرشون قيمة المبلغ المقدم 2200 درهم عقب بحجز لكم كتأكيد .. قلن ماعليه نحن بنطرش لكم المبلغ بس انتو ابدأو احجزوا ,, عقب قالت لنا خلاص من يوصل لنا المبلغ بنحجز ..
رحنا طرشنا لهم المبلغ المقدم و في اليوم الثاني قالت لنا خلاص ببدأ بحجز و كل الغرف مثل ما قلتوا ديولكس
و كان تفاهم بينا عن طريق الايميل كل شوي ننوه لها انا كنا نبغى غرف ديولكس و هي حضرتها تقول اكيد اكيد كل الغرف ديولكس لكن ما اقدر احجز لكم في فندق رمادا لانه فل و زحمة مافي شواغر في يوم اللي تبغوه ( كنا واثقين بكلامها طلعت جذابة حسبي الله عليها عقب تأكدنا من هالشي ) ..
و سافرنا كيرلا وصلنا المطار و كان واحد واقف في الاستقبال ماسك بورد مكتوب عليه اسم زوجي ..
وصلنا فندق دريم وخيسونا في الريسبشن ساعة و نحن ماا كنا نعرف شو السالفة ( السالفة ان مكتب سفاري النصاب توهم يحجزون من وصلنا و هم اصلا ما كانو حاجزين قبل )
في الساعة 11 الصبح ودانا الدريول مكتب سفاري عساس بيستقبلونا . دخلنا المكتب و قعدونا و على طول عطونا ورقة مكتوب فيها دفع المبلغ الباقي .. انصدمت في البداية قلت اشبلاهم مستعيلين عالفلوس و ريلي قال لهم راح اعطيكم المبلغ 3 دفعات بس هم رفضوا و قالوا لا عطونا مرة وحدة لان هذا البوليسي عندنا ..

و بكل احترام دفعنا لهم المبلغ و قالوا شكرا و روحنا ..

و الدريول ودانا اماكن سياحية في كوتشين و رجعنا الفندق و في اليوم الثاني رحنا فندق اليفنت كورت و هناك خيسونا في الريسبشن ساعة اهني قلت عاد لازم اعرف شو هالاجراءات اللي تطول زيادة عن اللزوم .. عقب كلمت زوجي يكلمهم و زوجي سار يسأل الموظفة .. الموظفة صدمتنا قالت نحن جالسين ننتظر المبلغ يوصلنا .. قلنا اي مبلغ ؟ قالت مبلغ الحجز .. قلت لها لحظة شو معناته انهم مش حاجزين من قبل .. هي قالت لا .. عصب زوجي اتصل لهم و هزبهم و قال لهم ان بيرد كوتشين و بيسترد المبلغ اللي عطاهم لانهم خدعونا خذوا منا المبلغ و قالوا حجزوا و هم مش حاجزين اصلاً .. عقب المكتب قالوا خلاص خلاص الحين بنخلص الاجراءات عطونا نكلم موظفة الفندق و زوجي عطاها التلفون تعرفون شو سوو المكتب جالسين يهزبون الموظفة ان يعطونا الغرفة غصبا عنهم عقب الموظفة قالت ما تقدر لان هالشي مايصير لازم الدفع عقب تفتح الغرفة و تم يهزبها لين ما هي صكرت و عطتنا التلفون و قالت حتى ما عطوكم الفاونشر..؟ قلنا شو هذا بعد ..؟ قالت السياح لما ينزلون الفنادق يكون عندهم فاونشر اي ورقة فيها جدول اسماء الفنادق و رقم حجز الغرف .. قلنا حسبي الله عليهم خدعونا .. قالت لنا لا تثقون فيهم كذا سياح جاو عندنا و صار لهم نفس اللي صار معاكم الحين ....
عقب وحليلها الموظفة قالت نحن ما نباكم تتضايقون و يتعكر مزاجكم تعالوا براويكم الفندق الين ما يرسلون المبلغ ..
طول ما هي تراوينا الفندق زوجي يفكر عقب اخذ من الدريول رقم فندق رمادا و اتصل لهم و سالهم عن يوم اللي كنا نبا نحجز فيه لكن سفاري ديز قالوا انه مافي شواغر .. الصدمة قالوا لنا عندنا كثير شواغر لان هذا مب سياحة عندنا
قلنا متأكدين قالوا هي عمره فندقنا ما كان فل الحمدلله عندنا غرف وايد و تسد النزلاء .... عصب زوجي و اتصل لسفاري و تهازب معاهم و قال لهم ليش كنتوا تكذبون علينا و هم ما يستحون على وجوههم عيني عينك ينصبونا يقولون لان غالي و لازم تدفع اكثر ... زوجي قال انا في البداية حاط فندق رمادا في الجدول و ما خبرتوني ان الباكج بيكون غالي قلتولي ان مافي شواغر و انا وثقت فيكم بدون ما اتأكد و هم يقولون تبون ادفعوا و لا خلاص اخر يوم تمو في فندق دريم ...
الا زوجي يبا يهزبهم اكثر جا موظف و قال تعالو اوديكم لغرفتكم لان لمبلغ وصل ..

و طول لوقت ادعي عليهم على حركتهم هذي ,,

عقب رحن فندق كرلتون و نفس السالفة نخيس في الرسبشن و ننتظر لما يوصل المبلغ و يسألونا عن الفاونشر و نتصل للمكتب و نتفاهم معاهم بس هم اسلوبهم حقير غلطانين لا و بعد يصارخون علينا و يصكرون فويوهنا ..
والله اني بكيت ان هذي كانت فكرتي ان نحجز من كيرلا و الا كنا بنحجز من بلدنا معززين مكرمين مب في كيرلا خذوا فلوسنا و نصبونا و لا يسألون عنا و لا احترام .. عقب تمينا يومين و بعدها رحنا مونار فندق كلاب ماهيندرا و نفس القصة نخيس ساعة و زوجي يتصل و يهزبهم و يطلب منهم ارقام حجوزات في فنادق ثانية و هم يتماطلون و لا يطرشون لنا و يصارخون و اسلوب حقير ..
لكن الصدمة ان دخلنا غرفة في الطابق الارضي مواجهة للبركنات السيارات و غرفة عادية اهني ما سكت زوجي اتصل لهم و عرف السالفة ان هم قاعدين ياكلون مال الحرام من ورانا و هددهم بالسفارة و المدير مالهم اسلوبه والله كأنه حيوان مايعرف كيف يتفاهم مع الاوادم يصارخ و اسمع صراخه واصل لي و يقول لزوجي الموظفة اللي تفاهمتو معاها جديدة ما تعرف تضبط مبلغ الباكج و ما نبهتو انكم تبون غرف ديولكس عقب زوجي قال ان كل شي مكتوب في الايميل و خافو ربكم خافو ربكم تاكلون فلوس الحرام و طفر منهم و صكر و عقب اتصل للسفارة و خبرهم بالسالفة و قالو لنا ان نحن تعرضنا لجريمة النصب من شركة سياحية و لازم نرفع دعوى قضائية عقب زوجي قال يا رجال نحن مب جايين عشان نعور رؤؤسنا نحن جايين لتغيير جو .. و عطيناهم رقم مكتب سياحي عساس يتفاهم معاهم و اللي صدق صدق بين معدنهم انهم مب محترمين السفارة .. عقب السفارة قالو لنا ان هددوهم يعطونا غرف ديولكس و وافقو مكتب سياحي انهم بيعطونا ..
فرحنا و مافتحنا الشنط على اساس يننتقل لغرفة ديولكس بس صدق صدق انهم كذابين ما نقلونا و لا شي و تصلنا للسفارة و السفارة مخلصين دواماتهم .. و قعدنا في الغرفة يوم و نحن متعكر مزاجنا مضايقين في الغربة ما نعرف حد اهني و الدريول حليله يتصل يقول ما تبغون تتمشون قلنا لا بوي تعبانين و بكره بنتمشى ..نمنا ووالله عيوني متحسفة اني بهدلت زوجي و عكرت مزاجنا من اتفقنا مع هذولا الحرامية
في اليوم التالي اتصلنا للسفارة و قلنالهم بالسالفة انهم ما عطونا غرف ديولكس و انصدمت السفارة عساس المكتب عطوهم كلمة انهم بيعطونا غرفة ديولكس و حاولو السفارة يكلموهم بس هم ما يردون عليهم و زوجي حرق تلفونهم و حرق تلفون الموظفة اللي قالت انها مسؤؤلة عنا و اللي حسبي الله عليها قصت علينا ماترد و اخرتها طرشت مسج و قالت لا تتصلون بي لان دوامي مخلص .. حسبي الله حسبي الله عليج ..
قعدنا 3 ايام في غرفة عادية و نحن والله مضايقين و عقب السفارة اتصلو لنا و قالو لنا ادبناهم و بيعطونكم من اليوم و رايح غرف ديولكس قلنا اكيد قالو على ضمانتنا اكيد و لا تتصلون بهم و اقعدو في الفنادق اللي اخترتوها غرف ديولكس و السموحة و من عقبه كل ما ندخل فندق الحمدلله نلقى في حجز و اللي يضحك ان لما نسأل متى حجزوا لنا يقولون اصحاب الفنادق التاريخ اللي السفارة تضاربت مع مكتب سياحي ...
و هذي نصيحتي لكم خواتي و اخواني دخيلكم تاكدوا قبل و شوفوا سمعة مكتب سياحي قبل ما تحجزون عندهم لان هذي كانت غلطتي ااني وثقت فيهم و هم اكلونا عدل حسبي الله عليهم قاطعو هذي الشركة اللي ما تخاف ربها ..