و عليكم السلام أخي أبو آلاء أهلا فيك ..
بالنسبة لي أنا اعتقد بأنو ماليزيا أكثر دولة مناسبة للعائلة من حيث أماكن التسلية للكبار و الصغار ..
عدا ذلك فهي دولة مسلمة لا أقول تخلو و إنما يقل فيها التعري مقارنة بالدول الأوروبية و استثني من ذلك الشواطئ و الالعاب المائية ..
و غير هذا كله كثرة المعلومات المتوفرة عن الأماكن السياحية و مراكز التسوق و أفضل الفنادق و غيره خاصة في منتدى العرب المسافرون .. و إذا أخذت لك لفة طويلة عريضة في المنتدى راح تلاقي إنك صرت خبير في ماليزيا ..
المهم المقصود من كلامي انتبه تسافر لحالك حلو انك تستكشف البلد مع ام العيال و الأولاد حتى تكون الرحلة لها طعم و نكهة مو تروح و انتا شايف كل شي صدقني يصير ما لها طعم ..
خذهم معاك و أكيد إنك راح تنبسط لمن تشوفهم مبسوطين و فرحانين ..

وعليكم السلام ورحمة الله وبركاته ...
ياهلا وغلا بحبيبنا ابو الاء وصبحك الله بالخير ياسيدي
خالتي موجودة ...صبحك الله بالخير خالة
صراحة شفت انه خالتي العربية ردت فعلى طول حركت الفارة
لاجل لا اشوف ردها عشان لا اجاملك واجاملها
صراحة ماشفت ردها ...ولكن لمحت بعض الكلمات
احط نفسي مكانك ...ميزانيتك جامدة ولا كيف يعني لو رحت
لحالك متى راح تاخذ ام الاء والاطفال الله يبارك فيهم ؟
ان تقول لي السنة الجاية ان شاء الله ...اقول لك اجل بلاش
استكشاف ...الراى اللي ارضاه لنفسي مع اني ماعندي زوجة
انك تتوكل على الله وتشيلهم معاك والبلد امان ومافيها شيء يخوف
ولا يحتاج لها استكشاف ولا شيء واستكشفوا البلد
مع بعض لين ماتسوون برنامج في قناة ديسكفري
شاركهم في كل حلوة وصغيرة ...في البداية سئلت عن الميزانية
لأنه عن نفسي احب امشي والدتي الله يطول عمرها في طاعته
فأن كانت الدولة جديدة علي ...اخذ باكج رخيص واستكشف
حق 10 -11 يوم وارجع ...واخذت فكرة عن البلد وارجع حق
اسبوع اوديها مكة وبعدها نرجع ونجهز للسفرة للدولة الجديدة .
لكن اخوي فكرت شوي وقلت ممكن انك تكون موظف والوقت ما
يسمح ...اما اخوك طالب طول السنة مجاز فقلت الافضل
انك تأخذ الاهل وخلوها فللي ...نسق فنادقك من هنا وخبرنا كيف
مزاجك وحنا جميعاً نرصها لك ...والمنتدى الان اغلبهم خبراء
حتى صرت استحي اكون بينهم لأني اقلهم
ونسق ترتيباتك كلها من هنا و اعرف خطواتك وتوكل على الله
وفرح اهلك وبزورتك ...هذه تسوى الدنيا والله ...بزورتك قدامك
يلعبوا ويضحكوا ...وانا كمان جدد شهر عسلك مع المدام ..الله يهنيكم
ويسعدكم يا اخوي الاطفال كم اعمارهم الله يحفظهم ؟
توكل على الله ...ترددك بارك الله فيك من اي ناحية
ولا يكون انك ناوي تسيبهم اصلاً وبغيت اللي يدعمك
ترى امزح معاك لا تزعل ..لو عندي زوجة اشيلها واشيل ابوها كمان
توكل على الله وربي يعوضك خير ويهنيكم ويجعلها رحلة
سعيدة ولكم تحياتي والسلام عليكم

الأخت العربية ...و الأخ الشعيبي
أسعد الله جميع أوقاتكم بكل الخير والسعادة .
شرفتوني بمشاركتم وابداء رأيكم بموضوعي .
أنا مقتنع جدا بكل الكلام الذي تفضلتم به ولا اشك في أن السعادة في السفر
لا تكتمل الا بوجود من تحب ..فكيف اذا كانوا زوجتك وأولادك.
لكن صارت ظروف جديدة جعلت زوجتي تغير رأيها و رفضت فكرة السفر هذي السنة
وتبغى مني اني أخليها مرة ثانية .......
بصراحة أنا بعد الاجازة راح ألتحق ببرنامج للدراسات العليا .. وهو برنامج متعب من البداية ..
بس ودي قبل ما تبدا .. أن أسافر و أريح .
على فكرة انا وجدت حجزين الى كوالا .. الاول من السابع الى السابع عشر و
الثاني من التاسع الى السابع عشر من سبتمبر ..
ايش رأيكم أفضل الاول أو الثاني ... وكيف تقترحون علي البرنامج هناك..
و الله بعد كلامكم كان ودي اني آخذهم معاي بس الحمد لله على كل حال ..
ما نستغني عن رأيكم ورأي أخواني أعضاء المنتدى والله يحفظكم.

صبحك الله بالخير اخوي ابو الاء
والله يسعدك اخوي وينجحك ويوفقك دنيا واخرة .
الحمدلله يا اخوي دام المدام هي اللي طلبتها اجل جات منها سلمكم ربي .
رأيي انه الحجز الاول احلى لأنه اطول شوي من الثاني
يصير لك بأذن الله 9 ليالي ...عاد انت اللي تجيبها مثل مابغيت .
كوالا لابد منها ...بغيت مرتفعات ولا بحر ...بغيت جزيرة بعيدة عن البشر
بغيت ملاهي وترفيه ...انت عطنا مزاجك وحنا نتعاون فيها ...
والفنادق بغيتها في حدود كم ....لاجل نظبطها لك .
موفق اخوي بأذن الله تعالى وربي ييسر امرك والسلام عليكم

الله يسعد صباحك حبيبنا الشعيبي .
شاكر لك سرعة ردك.
انا ودي آخذ العرض الثاني لاني لوحدي.
ممكن أقضي الثلاثة أيام الاولى في بينينج ومن ضمنها روحة يوم الى لنكاوي
(ما ودي أزعج العرسان الجدد لاني حسب ما قريت هو المكان المفضل لديهم ) .
والاربعة الباقية في كوالا .أحسن من كثرة التنقلات .أو لا..
ولكن لو حبيت أروح الى الكمرون هل أحتاج أسكن هناك؟؟؟ .
والا أطلع لها من كوالا .
يعني أبغى مرتفعات وبحر في سبع ليالي ..
ممكن تجي زي ما ابغى ولا تصير زحمة ؟؟.:confused
بالنسبة الى الفنادق ودي بشي حلو وسعره مناسب
(ياليت أعرفاساميهم و أسعارهم ).
المهم أرجع الى البلد والبال صافي ورايق .
صحيح باغلبك معاي بس اتحملنا شوي ..
والله يعطيك العافية ..

ياهلا اخوي ابوالاء
دائم تحب تكسرني وتفشلني وهذه المرة الثانية ترى امزح
دام انك بغيتها على هالطريقة اجل توكل على الله ...
لكن خل بينانغ 4 ليالي لأنه ان بغيت تروح كاميرون خلها من
بينانغ لانها اقرب وخطها اروق واحلى .
ويصير يبقلى لك 3 ليالي صافية بالعاصمة ...مع اني اتمنى تروح جنتنغ .
يصير الليلة الاولى لراحتكم ببينانغ .
الثانية خاصة ببينانغ .
الثالثة للنكاوي .
الرابعة لكاميرون ....ان شفت فيها اجهاد الغي كاميرون .
ولكن لا تجي لكاميرون من كوالا وخلها من بينانغ .
بغيت فندق ممتاز ببينانغ ...راساساينغ شانغريلا .
بغيت فندق فخم بكوالا بجانب البرجين عليك بماندرين .
وان بغيت شيء بقرب شارع العرب عليك بويستن .
راسا ساينغ ...مطلة في حدود 480 ريال .
ماندرين مطلة على الحديقة 410 .
ويستن 380 .
وان استخسرت هالمبلغ لسبب انك لحالك وطول وقتك بره ومامعاك عائلة
وانت لوحدك نعطيك فنادق اخرى اقل منها ولكن مستواها ممتاز وتعتبر
5 نجوم ايضاً .
بينانغ ...بي فيو ....مطلة على البحر 270 ريال .
كوالا ...بان باسفيك كوالا لمبور ...220 ديلوكس .
5 نجوم وفنادق روعة وماعليها كلام ومن اجمل مايكون .
ومن فندق بان باسفيك للبرجين او شارع العرب بالتاكسي 5 دقائق .
موفق اخوي ابو الاء ورحلة سعيدة والسلام عليكم

صباح الخير حبيبنا الشعيبي .
هذا ظني فيك دائما ..كفيت ووفيت.. والله يعطيك العافية ..
واسمح لي على معارضتك واعتبرها قلة ذوق مني ..بس عديها المرة هذي ...
و شكلي بآخذ بكلامك وأحجز في البي فيو و البان باسيفيك ( انبسط ياعم ).
بس معلش هل أكمل طريقي من الكمرون الى كوالا بالسيارة؟؟
أو أرجع الى بينينغ ومنها بالطيارة ؟؟
وبعدين ما ينفع نسحب لو يوم من كوالا و نروح للجنتنق ؟؟
شاكر طيبة روحك و أخلاقك الحلوة بعد .. والسلام .

صباح النور حبيبنا ابو الاء
وتراني كنت امزح معاك الله يسلمك وكلك ذوق حبيب البي
خلاص ...اجل بي فيو وبان باسفيك
كاميرون ...هنا نتوقف شوي لانه لابد نعرف وش هي نيتك
نيتك خير ان شاء الله ولكن قصدي بغيت تبات فيها ولا مثل ماقلنا
اول انه يكون باليوم الرابع من بينانغ .
اتفاقنا الاولاني انه بينانغ 4 ليالي ...يعني 5 ايام .
اليوم الاول = راحة وحول الفندق .
اليوم الثاني = لبينانغ نفسها .
اليوم الثاث = استكشاف لنكاوي وتنسقها من البنوتة تبع المكتب
السياحي اللي قريب من الاصنصيرات بنفس فندقك بي فيو .
اليوم الرابع = لكاميرون ...وتنسقها مع نفس البنوتة وتخليها
تنادي لك مستر جون لانه ذوق وان تحطه على يمناك واتركك من
اسمه وتراه ماهو صيني ...وهندي ماليزي وذوق
وان لقيت اللي احسن منه توكل على الله .
بعد جولة كاميرون ترجع لفندقك لانه عفشك فيها وتنام ليلتك فيها
واليوم الخامس على 11 -12 صباح تسوي خروج بالسلامة .
وقتها تفكر ...بغيت مباشرة لكوالا ولا بغيت مبيت بجنتنغ .
لانه جنتنغ قبل كوالا ...وانصحك بلاش طيران لكوالا لانك جيت
لبينانغ في البداية طيران لاختصار الوقت والجهد وحبيت الان
وانت راجع لكوالا انك تشوف طرقهم السريعة ومناظرها وتخطيطاتهم
وهذه لحالها جولة سياحية
والتاكسي تقدر تتفق معاه من بدري وان شفت واحد طيب في اي يوم
تنسق معاه وتقول له اليوم الفلاني الساعة الفلانية انا ودي اروح
للمكان الفلاني وتجيني الساعة الفلانية ياكثر الفلاين
نقول نيتك على طول لكوالا .....بان باسفيك .
3 ليالي بكوالا ...بان باسفيك كوالالمبور ...يعني 4 ايام .
اليوم الاول ..راحة لوصولك من بينانغ ...وتتعرف على المنطقة
المحيطة وتتجه للمول المقابل للفندق وتقدر تروح للاسواق
وخاصة سنترال ماركت وسوريا klcc وشارع بوكيت بينتانغ .
اليوم الثاني ..اتجه لجنتنغ ...وانت نسق مع موظف الفندق لطلعتك
لجنتنغ لانهم يدبرون لك المواصلات وكل الخدمات وتقدر تكلمهم
يضيفوك لو بغيت لباكيج ويكون ارخص واحلى لانه معاك جماعة
وتصير الزعيم حقهم ونسقها من اول وصولك للفندق .
اليوم الثالث ...بعض تماشي كوالا وتسوق سريع .
اليوم الرابع ...خروج وتوجه للمطار بالسلامة .
وانا جالس اكتب لك حسيت بكثر الضغط والاجهاد لانه الوقت ضيق
والامنيات كثيرة عاد اخوي انت قدم واخر بما يناسبك وكل
انسان ادرى بنفسه من غيره .
مافيش شيء اسمه طيران داخلي في رحلتك الا بعد وصولك
ورغبتك للتوجه لبينانغ نظراً لكسب الوقت وعدم الاجهاد
مسوي على كيفي واقول لك مافيش انا اقصد ياليت
والباقي كلها بر ...الا في رحلتك الاستكشافية للنكاوي راح
تكون بالفيري ...عاد لا تكثر من الفطور يومتها وترى الباص يدور
عليكم من بدري ..قبل 7 وهو دائر لاجل تروحون محطة الفيري
وتنسق كل هذا مع البنوتة اللي قلت لك عليها وراح تبين لك
كل شيء سهل واسهل من السهولة ...وحركات يا سائح
وللدوار عاد في حبوب تباع لمنع الدوار ..انتبه لا تكون مخدرات
وشفت مشاركات الاخوان انهم هناك اعشاب لو بغيت بدل
الحبوب ...اللي هو زنجبيل ...بس ما ادري كيف تسوي فيها ولا جربته
واخر كريم يقول انه تجيب معاك ليمون وتمص فيه
مااقول الا ربي يوفقك ابو الاء وان شاء الله تكون رحلة سعيدة
وتروح وترجع بالسلامة وان عندك اي استفسار فلا تخجل الله يسلمك .
ولك تحياتي وتقديري والسلام عليكم

أسعد الله جميع أوقاتك بكل الخير ...أخوي الشعيبي . واللي يقرأ هذه السطور .
ما شاء الله عليك حبيبنا .. دائما في الخدمة ..
ما تتوقع قد ايش ريحتني من وجع الرأس و التنسيق لهذي الرحلة
مع المكاتب السياحية .
على طول باذن الله راح أمر المكتب السياحي .. و أقوله اعتمد برنامج المرشد السياحي
لحبيبنا الشعيبي ..و أتمنى اان شاء الله ان تكون رحلة موفقة ...
بس ممكن أسأل عن الوقت اللي بياخذه الفيري الى لنكاوي .و هل هو ممتع ؟؟
والا أخليها طيران ..
و بعدين كم يكلف التاكسي من بينانغ الى كوالا ؟؟
أما الباقي فاشهد انك كفيت ووفيت ..
و الله لا يحرمك الاجر ويبيض وجهك دنيا وآخرة ...قل آمين.