أنصحك تخليها كلها في ماليزيا
2 سلانقور
3 لنكاوي
3 بينانج
4 كوالا
1 بورت ديكسونالمجموع = 13 ليلة

من سافر الى ماليزيا مستحيل ينصحك بغيرها
ماليزيا طبعا بدون تفكير

بالتأكيد ماليزيا .. وخاصة مع الأطفال ..
بالتوفيق دائما ...

أخوي تقدر تروح الثنتين مع بعض إسبوع في ماليزيا وإسبوع في تايلند مثل ماسويت أنا
أنا توني راجعة من الثنتين ماصار لي إلا إسبوعين ورغم إن ماليزيا رحتها 3 مرات وتاليند بس هالمرة لكن مازالت ماليزيا عندي في الصدارة
بصراحة تايلند ماعجبتني بالمرة خصوصاً بوكت اللي الناس حطتها وشالتها في عيوني ولما رحت طاحت من عيوني كلش وحسيتهم عطوها أكبر من حجمها
يجوز تناسب شلة شباب يمارسون الأنشطة البحرية مثل الجيتسكي والبراشوت والبنانا و و و أو تناسب عرسان يقضون وقتهم في هالمنتجعات الحلوة الرايقة اللي توفر لهم مسابح خاصة
لكن في نظري ماتناسب العوائل الخليجية المحافظة وأصلاً هي مافيها إلا بحر!! وماتستاهل أكثر من 3 أو 4 ليالي بالكثير وإنت حطيت لها 8 ليالي
عشان جذي ماحبيتها وصادني فيها إكتئاب لدرجة إني كنت طول الوقت في الفندق حاطة الهم على راسي وأصيح
كنت أطلع ماجوف إلا تعري في تعري لدرجة ماتصورتها وجفت الأمريكان والأروبيين أكثر من التايلنديين نفسهم كانو منحطين لدرجة إنهم يدخلون المول الملاصق فندقنا بمايوهاتهم!!
وكانو ينظرون لي نظرة غريبة لأني متحجبة وسط هالتعري وبصراحة ضايقني هالشي وايد
الشي الأمر مشكلة الأكل ماكنا نلاقي أكل حلال بالساهل واليهال ماياكلون إلا فاست فود وكلنا ماناكل سي فود
فيه مطاعم عربية لكنها تستغل حاجة السواح العرب وترفع أسعارها فوق نار لكن شنسوي كنا مضطرين ناكل منهم
اللي حبيته في بوكت ومايتفوت بصراحة هو الفنتازي شو أتعب وأنا أقول رائع وحتى اليهال طارو من الفرحة هناك
بالنسبة لبانكوك إرتحت فيها أكثر حلوة للشوبنغ والعرب الخليجيين متواجدين هناك بكثرة بس مب رخيصة مثل ماتوقعت بس بعد مادري يمكن لأني ماتسوقت إلا في أم بي كي ومحل جوجو فقط
وفي نهاية المحصلة زيارتي لتايلند ماعتقد تتكرر ومستحيل أحطها في مقارنة مع ماليزيا حبيبة القلب والروح
بلد إسلامي آمن يحترم جميع الأديان خصوصاً المسلمين والأكل الحلال سهل ومتوفر في كل مكان وحتى برامج ماليزيا ووناستها غير والله غير وبالذات مع اليهال ماليزيا هي الأفضل
فيها تعري شوي عند المسابح والملاهي المائية وعلى البيتش لكنها لا تقارن بتايلند من هالناحية لأني جفت من الإبتذال والقذارة اللي يلوع الجبد
بس إذا إنت تحب البحر والأنشطة البحرية وممكن تناسبك إنت وأم العيال ترى تايلند وبوكت تحديداً فيها رحلات بحرية أكثر لكنها ماتناسبني ولا تناسب اليهال لأنهم يملون من القعدة بسرعة ومابيتحلمون مركب بالساعات وبيتعبون
أدري هذرت وايد لكن والله كان في قلبي كلام وإنطباع حبيت أقوله وأفيد به غيري لكن اللي ماناسبني جايز يناسب غيري هذي كانت تجربة وراي شخصي
على فكرة المسافة بين البحرين وماليزيا أقصر من المسافة من البحرين لتايلند بساعة وحدة
رحلة موفقة بإذن الله

مشكورة أخت كرستالة على هذي المعلومات المهمة جداً جداً
أختصرتي لنا الموضوع كله في عدة أسطر لكن أعطيتينا تصور واضح عن تايلند
اتمنى لو وقتك يسمح أن تضعي لنا تقرير مصور عن رحلتك لماليزيا وتايلند وتوضيحن هذي الأشياء فيه
لأنه للأسف فيه ناس كثيرين مخدوعين بتايلند
مشكورة مرة أخرى والله يوفقك دنيا وآخرة ويكثر من أمثالك

المغادرون 2007
لا شكر على واجب ياخوي
هذي أقل مايمكن إني أقدمه شكر من كل قلبي لك وللأخ وافي والأخ زازاز ولا يهونون الجميع
لكن الجذب خيبة أنا أعرف أتابع التقارير ما أكتبهم ماعرف أكتب وأسرد إعذرني
مع إن كان في خاطري أرد الجميل بتقرير يبيض الويه لكني مب عارفة والله
بس إذا في أي إستفسار أقدر أخدم فيه أنا حاضرة