- الجزء الأول
- "بوكيت"
- صورة للطيار اللي ركبناها من مطار دبي
- اول صورة التقطتها لبوكيت من الطيارة
- سيلرة الجولف اللي توصلنا لكل مكان داخل الفندق
الجزء الأول
"بوكيت"
يعود فضل هذه الرحله الى الله سبحانه و تعالى و من ثم اعضاء هذا المنتدى العزيز على قلبي....فشكرا لجميع اللي ساعدوني لجعل هذه الرحلة جميلة و اكثر من رائعة.... و بداية اعتذر للاطالة في السرد و ان شاء الله تستمتعون بقراءة التقرير...وفي نفس الوقت احصل تشجيع منكم بما انه هذا تقرير الأول في المنتدى.....
اول شي ساذكر لكم موعد الرحلة و الفنادق يعني التفاصيل الرئيسيه:موعد الرحلة كان 28-6-2006 الاقلاع كان حوالي الساعة 11 مساء
من مطار دبي الدولي
جدول الرحلة: 3 ليال بوكيت (سنترال كارون فيلج)
7 ليال جولد كوست ( ليجند سيرفر برادايس)
3 ليال بانكوك (نوفيتل سيام سكوير)
مدة الرحلة 14 يوم و13 ليله
صورة للطيار اللي ركبناها من مطار دبي
طبعا بدا التخطيط للرحلة قبلها بكم شهرو اخيرا استقرت بشكلها النهائي بعد ما اتغيرت خمسين مرة....وبعد مااكدنا الحجز و خلصنا و كان هذا قبل موعد الرحلة بشهر او اكثر, بدينا الترتيب حق السفرفراح كل واحد منا الي هو انا و زوجي يدورله ثياب و اغراض السفر, وتقريبا خلصنا قبل فترة من موعد الرحلة و لمينا الأغراض في الشنطة و انا بطير من الفرح طبعا.
يا اليوم الموعود والحمدلله كل شي مرتب وماشي اوكي بس كنت احاتي شي واحد واللي هو اولادي الاثنين و اعمارهم 5 و 4 واللي بخليهم عند يدتهم, تراني كنت مهيأتهم نفسيا من كمن شهر و تقبلوا الفكرة بس بعدني كنت احاتيهم. المهم ابوهم ما طاع يخليهم يودعونا من المطار فخذتهم يدتهم عند قرايبنا عشان يلعبون ويا الصغارية اللي عندهم ورحنا المطار عالساعة 8 ترى كانت رحلتنا من دبي و احنا في ابوظبي....ووصلنا عالوقت و يوم بندخل لمكان انتظار الطيارة خبرونا بانه سوولنا ابقريد للبزنس كلاس..في خاطري كنت اقول الحمدلله دام بدايتها جي ان شاء الله بتكون الرحلة حلوة باذن الله. وصلنا مطار بانكوك عالساعة 8 ونص الصبح والمفروض رحلتنا لبوكيت بعدها بساعة وضعنا في المطاروقعدوا ينادون اسمنا و كنا اخر اثنين يركبون الطيارة و يا اثنين ثانيين وكانت الطيارة فل, وصلنا بعد ساعة و ربع واكيد كنا مرهقين بعد تقريبا 8 ساعات طيران بس يا سلام عالمنظر اللي شفناه من الطيارة و الله جنة خلتنا ننسى التعب كله...شي خيالي منظر ولا اروع فسبحان الخالق اللي جمع الخضارويا الجبال وعدالهم البحرفي مكان واحد.
صورة للوجبة الخفيفة (من بانكوك لبوكيت
اول صورة التقطتها لبوكيت من الطيارة
استقبلتنا في مطار بوكيت وحدة تايلندية طيوبة ووصلنا الفندق حوالي الساعة 12 و نص و كلها ربع ساعة و دخلنا الغرفة, الغرفة كانت حلوة و الفندق اصلا عبارة عن اكواخ يايه بين الأشجاربعضها ياي قدامها اشجار مغطية منظر البحرمثل كوخنا وبعضها مواجهة البحر,,,, كل كوخ عبارة عن غرفة و حمام و نظام الفندق غريب كله ممرات و درج الحين اذا نبا نروح المسبح او مكان الفطور نتصل فيهم و يطرشون لنا سيارة ميني نفس مالت الجولف و توصلنا المكان اللي نريده, المهم ريحنا لين الساعة 5 و نص و اول شي يا في بالنا انه ناخذ تاكسي و نروح الباتونج بيتش ترى الفندق اللي سكنا فيه مكانه في اخر الكارون بيتش يعني الباتونج تقريبا 7 دقايق بالتاكسي او التوك توك... قبل ما نروح قعدنا نقرر وين بنروح ثاني يوم و ثالث يوم, كان عنا عدة اختيارات منهم البي بي ايسلاند بس التايلاندية خبرتنا انه الأمواج وايد عالية هاك اليومين و يوم عرفنا مدة الطريق للجزيرة بتاخذ حوالي 3 ساعات هونا (ترى اول ما طلعنا من المطار كان الجو فظيع حر و شمس..بس يوم رحنا للباتونج الجو تحول وصار وايد حلو) والجزيرة الثانية جيمس بوند ايسلاند بعد طوفناها فاستقرينا على الفنتاسي شو”the Fantasea Show”.
صور للغرفة و الفندق
الغرفة الحمرا ء
البلكونة
سيلرة الجولف اللي توصلنا لكل مكان داخل الفندق
وصلنا الباتونج بيتش عالساعة 6 المغرب بالتاكسي 150 بات و اول شي سويناه دورنا عا محل تليفونات و اشترينا شريحتهم ( الشريحة ب 440 بات و عبيناها ب 300 بات)عشان نكلم الأهل و بعدين قعدنا نمشي عالشاطئ الأبيض, الشاطي مالهم وايد حلو لأنه الرمل ياي لونه ابيض و نظيف هذا غيرصوت الأمواج العالي والسماء الملبدة بالغيوم (قمنا نتكلم فصحى) شي خيالي ولا في الأحلام. شوفو شو صار لزوجي قام مسكين يبا يحمل النعال مالي عساس نمشي عالبحر و نسوي اعمارنا رومانسيين الا و يطيح موبايله والله يرحمه حاولنا ننعشه بشتى الطرق "الموبايل ما صار له 6 شهور" بالتنشيف و الاستشوار بس ماشي فايدة "زين اني خذيت موبايلي لأني كنت ناويه اخليه" عقب مشينا عاطول المحلات الموجودة و دورنا مطعم عشان العشا....استقرينا على واحد تحصل عندهم القباقيب و ام الربيان حاطينهم في احواض و عقب يصطادونلك اللي تختاره انت ويشونه لك...واكيد انا اخترت شوربة التوم يوم جانج اللي ماشربت غيرها طول ما احنا يالسين في بوكيت و بانكوك..خلصنا العشاو كان ب 2000 بات " غالي شوي و قلنا الحمدلله عالنعمة اللي احنا فيها و مرينا على سوبرماركت و اشترنا شوية اغراض و ردينا الفندق بالتوك توك.
