1. طبعاً راح تشيك على هالاشياء


2. والابهامين سوا


3. من الاسئلة :

مرحبا جميعاً ..
بحمد الله انتهيت من اجراءات طلب الحصول على فيزا سياحية امس 13-8-2007 ..
حبيت اشرح لكم اللي صار بالتفصيل .. للافادة ..
اول شي بموضوع اختي بنت الصقور راح تلقون الوثائق المطلوبة وكيفية حجز موعد ..
https://artravelers.com
اهم شي تحاولون تجون بدري السفارة .. وتتأكدون مليون مره ان اوراقكم كاملة !
اول ماتوصلون راح يكون سرا قدام مبنى السفارة .. وصراحة اكثر شي قهرني انهم مخلينا نوقف بالشمس والحر ننتظر يجي دورنا .. :112:
عند المدخل كانت موظفة امريكية تشيك عالاوراق اذا كاملة ولالا.. وللاسف معظم اللي كانوا موجودين اوراقهم كانت ناقصة ... وكان اسلوب الامريكية مو حلو مره يعني كانت تهاوش وتهزأ اللي جايها واوراقة ناقصة وتقوله يروح يكملها ويرجع لها ..

طبعاً راح تشيك على هالاشياء

• برنت من الموعد .. بعد ماتحجزون اون لاين راح تطلع لكم صفحة فيها وقت وتفاصيل الموعد
• الفورم حق الفيزا .. يكون معبى صح بالكمبيوتر وتاكدوا ان كل المعلومات صحيحة
• تدبسوا فيه صورة شخصية 5 * 5 خلفية بيضاء.. ( الرجال بدون غطاء عالراس .. والنساء لازم يطلع شوي من مقدمة الشعر ) انا قدمت صورة 4*6 وقبلوها ولا علقوا عليها ابد بس احتياط خليكم ماشين عالروولز .. فيه مكان بالفورم للصورة ..
• جواز السفر بدون اي غلاف ( كفر )
• ورقة الايداع او الرسيت من البنك الامريكي حق دفع الرسوم

بعد ماتشيك عليهم الموظفة وتتاكد ان كل شي كامل .. راح تقولكم تدخلون ..
اذا كان في شي ناقص راح تطلب منكم تطلعوا برة في مبنى ثاني للتصوير او الطباعه ..
بعد ماتدخلون فيه شباك فيه سيكورتي يطلب منكم اي الكترونيات .. جوال .. ريموت سيارة .. ويحطهم بظرف وياخذهم ..
بعدها تدخلون داخل السفارة .. اول شي تفتيش .. مثل تفتيش المطار .. وبعدها فيه موظفة تخليك تفتح اي شنطة معاك وتوريها ايش موجود داخل الشنطة .. وطبعا فوقكم بيكون كاميرا. الموظفة قالت انه لازم صاحب الشنطة يفتح شنطته ويوريها الاشياء اللي داخلها وهي مو مسموح لها تفتحها.
بعدين تدخلون داخل في مكان انتظار .. وفي سيكورتي يعطيكم رقم .. وتجلسوا تنتظروا دوركم ..
وفيه كوفي مان يبيع ساندويتشات وعصيرات وشاي وقهوه .. ( استغربت من كذا مشاركة بهالقسم تقول ان مافيه اكل ومافيه شي غي موية )
اذا جا رقمكم تروحوا للشباك وياخذ الموظف اوراقكم .. اللي شيكوا عليها بالبداية ..
يجلس يقرا الفورم كامل ويحط هايلايت على اي شي ناقص .. ويسألك عن اي شي يحتاجة .. كشف حساب او تعريف عمل او اي شي من هالقبيل .. واذا كان فيه معلومة ناقصة بالفورم .. يخليكم تكتبوها بيدكم ..
بعدها ياخذ الفورم والاوراق والجواز ويقولكم ترجعون للسيكورتي وتاخذون رقم ثاني للمقابلة ..
وترجعون مره ثانية تنتظروا برره .. واذا جا دوركم .. تروحوا للشباك .. اول شي راح يطلبوا منكم بصمات الاصابع ..
الجهاز قدام الشباك .. راح يقولون لكم اول شي تحطوا اربع اصابع اليد اليسار
واربع اصابع اليمين

والابهامين سوا

وبعدها بيقولون لكم ترفعون السماعه ( تذكرت سجون امريكا بالافلام خ ) وتجاوبون عالاسئلة ..
والاسئلة ماهي موحده على حسب مزاج الموظف بس اهم شي انك تكون قاري الفورم حقك صح وتعرف المعلومات اللي فيها لان معظم الاسئلة تكون من خلال الفورم .. عشان لايصير فيه اي اختلاف بين كلامك واللي كاتبه بالفورم ..

من الاسئلة :

• هل زرت سوريا او ايران ؟
• متى وليش وكم جلست هناك ومع مين رحت ؟
• وين تشتغل ؟ كم راتبك ؟
• وين تدرس ؟ ايش تخصصك ؟
• من راح يتكفل برحلتك ؟ ايش يشتغل ؟
• هل زرت امريكا قبل ؟ اي ولاية ؟ وليش؟
• سبب زيارتك لامريكا هذي المره ؟

بشكل عام الاسئلة سهله واذا حست انك ماشي اوكي وواثق ماراح تكثر بالاسئلة ..
بعدها بتعطيك كوبون اصفر عليه رقم الجواز وتقولك ان جوازك راح يكون جاهز بعد اسبوعين ( هذا اللي قالته لنا مادري اذا المدة تختلف من شخص لشخص )
وتطلب منك تدفع الرسوم .. 27 ريال عند الشباك رقم 4

• الموظفين جميعهم تقريباً يتكلموا عربي وانجلش .. يعني حتى اللي مايعرف يتكلم انجلش يقولها من البداية وراح تسوي معاه المقابلة بالعربي.

وبس بعدين تراجع السفارة او تطلب ارسالة بواسطة فيدكس ..
اخذت الاجراءات هذي كلها من اول مادخلت السفارة الين طلعت .. تقريبا 4 ساعات وصراحة زهقت وانا انتظر وحسيتهم بطيئين .. مع اني كنت متوقعه العكس .. بس حسيت نظامهم شوي معقد.
وبعد ما ادري هل معنى هذا ان خلاص الفيزا مضمونه .. او بعد اسبوعين راح اشوف ؟ يعني هل فيه احتمال انهم مايطلعون الفيزا ؟ ولا بس بما اني دفعت الرسوم معناها اضمن اني اخذتها؟
وبس.. باقي اجراءات الحجوزات وهالشغلات .. مادري ايش الطيران اللي تنصحون فيه
ان شاء الله افدتكم بهالموضوع واي استفسار ثاني انا حاضرة
واحب اشكر اخوي impact على مساعدته لي بالمنتدى
تحياتي