وعليكم السلام ورحمة الله وبركاته
أختي حياج الله بديرتج الثانية
المطار يبعد عن الدمام 30 كيلوا متر والخبر تبعد عن الدمام قرابة 10 كيلوا متر
يعني المسافة بين المطار والخبر 40 كيلوا متر هاي واي محترم 3خطوط مفصولة ن بعض وتاخذ المشوار من المطار للخبر مايقارب 45 دقيقة على سرعة 120 كيلوا متر
بالمسبة لفلكية والله ما اعرف عنها شي لكن إن شاء الله احد يجاوبج
بالنسبة لمنطقة العليا والعقربية
منطقة العليا هي المنطقة اللتي بها مجمع الراشد
والخبر ماتتضيع وافضل شي أنكم تشترون خريطة الفارسي من أقرب مكتبة أوقرطاسية أو منجرير اللي بالراشد وسعرها 20 ريال خريطة مفصلة
بحيث أي شي تبونه تسألون عن أسم الشوارع وتروحون له دايركت وأختصار للوقت
ولا خلوكم على طريقة العرب (( اللي يسأل مايضيع خاصة وأنه الخبر ماتضيع ))
وبالنسبة للمولات
الراشد بالخبر
فينيسيا مول نسائي فساتين وشنط واحذية الله يكرمكم " المجمع فساتينه روعه واسعاره خطيرة " وهو مقابل الراشد مول
مجمع الظهران "" جيان "" مجمع رائع جدا بماتعنيه الكلمة بس كبير جد يعني يبيله حذاء مخصص للمشي عشان تفرينه كله ويبغاله أقل شي 3 ساعات
مطاعم :- كوبر شندي مطعم هندي
بيت التنور صيني وهندي
مغل هندي
فرايديز وتشيليز والشلة الامريكية وكاسبر اند غامبينيز وابل بيز تلاقينهم على الكورنيش حق الخبر
مطعم أونو بالدمام
كوفي شوبات منثرة بعد على كورنيش الخبر والمولات وأفضل اللي خارج المولات عشان الروقان
وانصح بمحل عصيرات وهذا تقريره
https://artravelers.com/p/re/231513
اتمنى اكون افدتج وأي استفسار احنا حاضرين
أخوك/عبدالرحمن

و عليكم السلام و رحمة الله و بركاته
حياك الله أختي أميرة ... أن شاء الله توصلون سالمين
بالنسبه لسؤالك الاول ... راح يبعد المطار تقريبا 40 كيلو من الخبر للمطار في طريق سريع ... من شقتكم للمطار أشارة مروريه وحيده
أما الفلكيه سويتس فانا أضفت لك صورة موقعها على هالرابط
http://www.wikimapia.org/
بس لا تسأليني عنها .. من برى شكلها حلوو بس ما دخلتها
موقعها : العقريبه .. قريب من مجمع الراشد و فنسيا مول ...صراحها موقعها جدا ممتاز
ان شاء الله اكون افدتك

معليش يعني بس حنآ مطارنا بعيد عن الخبر.. الروحه للمطار بروحهآ سفره لحالهآ ههه
يعني إذا بغينا نروح للمطار نقول دعاء السفر بالخبر وإذا صلنا المطار وركبنا الطياره نقول دعاء سفر ثاني ههه
بس سياحه حلووه تتعرفون على معالم الشرقيه .. بحيث تمرون على الخبر والظهران والدمام وانتم رايحين المطار
على فكره .. مطار جده دايم مبهذل ف توقعوآ أنكم تتبهذلون هناك وتنزلون بسلم وتركبون في باص
هذا غير قاعة الوصول اللي تسد النفس وزحمه
مو مثل الدلع في مطار الملك فهد بالدمام ههه تدخلون الطياره بالقيت وآي ولا باصات ولا قررف
أقولكم الكلام هذا عشان تستعدون نفسيا ههه أدري أنكم قد جيتو مكه قبل كذا .. بس برضو لازم أأكد هه

• - - - - - - - - -

الشقق الفخمه
مدهال وفيه بعد ميلان .. واثنينهم على شارع الملك عبدالله ( شارع الظهران )
بس الشقق هذي تعتبر غاليه شوي ....
فيه شقق أعلى من المتوسط وحلووه مرره ومجربه أسمها أكنان
خلف كارفور بالراشد .. وأعتقد مسوين موضوع عن هجري الشقق في القسم هذا
إذا تبون تفسقون وتخربونهآ وتروحون فنادق خمس نجوم
المريديان . قولدن تيوليب . موفنبيك . كورال إنترناشيونال . إنتركونتيننتل . تيولب إن
وفيه بعد السوفوتيل بس للحين ما خلص

• - - - - - - - - -

مجمعات
الرآشد : غني عن التعريف .. بالتوسعه ماركات عالمية فخمه ولأول مره تفتح في الشرق الأسط خذولكم فره فيه
وأهم شي وقفوا سيارتكم في مبنى الموآقف مو بالمواقف العاديه .. لأنهآ دايم فل وزحمه
مجمع الظهران : مشكلته دور وآحد ومساحته وآحد كيلو ومع التوسعه الرآئعه حقته يمكن 2.5 كيلو ..
زين للي يسوون رياضه ههه وكله ماركات عالميه وراقيه
بس نستنى يفتحون البحيرة اللي بالمجمع وبيصير خيالي
طبعا مو بس هذا اللي عندنا بس هذولا الأساسيين .. فيه عندكم فينيسيا مول والمخازن الكبرى وشارع الظهران
وشارع البيبسي والكورنيش .. وكل شارع يقول الزوود عندي
ترآ الخبر مو كبيره مرره .. مو زي الرياض مثلا
اللي بين كل شارع وشارع مجمع .. وبين كل مجمع ومجمع مجمع ههه

ياهلا والله باهل الكويت أهلنا الغالي ومرحبا
وحياكم الله في ديرتكم !!
لو تتكرمين تذكرين لنا كم المدة الي بتقعدون وكيف الميزانية ،، ممكن نساعدكم ببرنامج يناسبكم