1. ملاحظات من اليوم الكئيب:

السلام عليكم و رحمة الله و بركاته..
مرحبا بالجميع
والله ما أدري ايش أقول و كيف أبدأ بس يمكن العنوان يبين نوعا ما حالة الاحباط المؤقتة اللي تعتريني.
قبل يومين كان موعدي في السفارة الأمريكية، و كان حلم الذهاب لأمريكا بين عيوني، من يوم حجزت الموعد (في يناير 2009) و أنا انتظر يوم 25 مايو بفارغ الصبر، و من الحماس الزايد خلصت كل أموري من بدري مره.
طبعا ذهبت للسفارة و أنا حاط في بالي 90% إن شاء الله راح أطلع بالورقة الخضرا و انتظر بعدها أسبوعين لثلاث أسابيع و الجواز بيكون عندي بالفيزا، لكن اللي حصل كان غير اللي أتمنى.
أخذت الورقة الزرقا و طبعا قالولي شيك في الموقع عشان ترسل جواز السفر لما نطلبه منك
طبعا الأمل بدأ يتلاشى و أصبت بإحباط شديد لأن السفر ما بقى له كثير يعني شهر و شوي، و من خلال بعض المواعيد و الردود اللي قريتها هنا اعتقد إنه من الصعب جدا انهم يطلبوا الجواز و يفيزوه و يرسلوه لي خلال شهر و نص.

ملاحظات من اليوم الكئيب:

• * بالنسبة للمواعيد مثل ما ذكر الكثير انهم بياخذوا بالمواعيد و كلن يدخل بموعده.
• * تعامل الموظفين داخل السفارة رائع جدا و محترم.
• * نقطة مهمة جدا أتمنى الجميع يحطها في باله، و هي مسألة اعطاءك الورقة الخضرا أو الزرقا تعتمد بالدرجة الأولى على الكومبيوتر و ليس على الشخص اللي يسوي معاك المقابلة و هذا طبعا ما يمنع إن الشخص اللي يسوي معك المقابلة له الحق إنه يعطيك الورقة الزرقا إذا شك فيك أو كانت أوراقك ماهي كاملة. فمثلا أنا أوراقي كلها كانت كاملة، و مو ناقص منها أي شي حتى اللي قابلتني قالتلي كل شي ممتاز و رائع، و انبسطت مره لما شافت إني مسوي جدول الرحلة و جدول يبين السفرات خلال العشر سنوات الماضية (طبعا ما فيها و لا سفره لسوريا أو اليمن أو إيران و كلها لانجلترا و فرنسا و إيطاليا و الامارات و مصر) بس فجأه لقيت وجهها عبس و قالتلي أنا فعلا آسفه، كان نفسي آخذ جواز السفر لكن الكومبيوتر ما عجبته إما صورتك أو بصماتك!! قلتلها ليش؟ قالتلي هذا موضوع خارج عن ارادتي و لو كان علي كنت اعطيتك هي الآن، لكن قالتلي و لا يهمك أنا راح أعمل توصية لك عشان يخصلوا أوراقك قبل موعد سفرك لأنك انت فعلا كول و هذا الشي الوحيد اللي اعطاني أمل
• * آخر شي حصل معي أمس إني بعد ما طلعت من السفارة و كلي احباط، دقوا السفارة على جوالي و قالولي ارجع عشان تعيد البصمة مره ثانيه، والله فرحت و قلت يمكن تضبط و تاخذ جوازي بس للأسف رجعوني لأن اللي سوتلي مقابلة لما كانت تبغى تخلص اجراءات تسجيلي ما ضبط معاها و قالها ان الابهام ما اتصور تمام (ظهرت صورة الابهام مسحوبه كأنه اصبع طوله مترين :109 المهم رجعت سويت بصمة الابهام و قالتلي آسفه لكن انتبه لما تروح أمريكا و خلك دقيق لأن البصمة اللي تسويها هناك في المطار لو ما طابقت البصمة اللي سويتها هنا ما راح يدخلونك.

في النهاية، كلمة شكر و عرفان و تقدير لا تفي حق القائمين على هذا المنتدى عامة و الأخ الغالي Impact و كل الأخوة الذين يعملون لمساعدة الآخرين و ادخال البسمة و السعادة على قلوب الكثير من زوار المنتدى
لا حرمهم الله الأجر.
مودتي؛؛