1. سدني


2. جولد كوست

هذي تكملة تفاصيل رحلتنا الرائعه الى تايلند واستراليا و الجزء الأول منها في بوابة تايلند واتمنى ان المشرفين يساعدوني على الصور لأني ماني عارفه اضيفها

سدني

وصلنا الى سدني 10 سبتمبر وبصراحه توقعنا ان مطارهم احلى بكثير و كانت معاملتهم لنا جافه واخرونا في التفتيش لأن معانا أكل, وصرفنا فلوسنا من المطار وهذي كانت غلطه لأنهم خذوا علينا 150 ريال عموله اما غيرهم من المكاتب فما يسوون هالشي.
المهم اول ما خلصنا اجراءات, جانا واحد عربي و عرض علينا التوصيل الى الفندق بالميني باص وصراحه كنا مترددين بس بعدين رحنا معاه.
كنا حاجزين في فندق هوليدي ان دارلنغ هاربر, و الصراحه الفندق ردئ و قديم وغرفه كئيبه بشكل شنيع ومساحتها ضيقه كثيرحتى ان زوجي كان يسميه اللحد والموظفين بعد ما كانوا متساعدين, بس احسن شي فيه موقعه اللي ساعدنا ان نوفر ثمن المواصلات لأن كل شي قريب منه و لأن المشي رائع في سدني وهذا جدولنا
السبت: اكواريوم سدني (احلى في النهار مع انه يفتح الى 10 مساء), عشاء على الدارلنغ هاربر
الأحد: أوبرا سدني, وكان في ماراثون كبير هناك تفرجنا عليهم وهم يجرون, بوتانيك جاردن (حديقه حلوه وكبيره ورايقه), وركبنا oz jet boating , وهو قارب يفحط في البحر عند الدارلنغ هاربر وانصحكم فيه في سدني احلى من جولد كوست لأن المكان خيالي و الركبه فيه تجنن, وفي الليل تمشينا في تشاينا تاون لأنها كانت ورا الفندق
الأثنين: حجزنا مع شركه خذونا في باص الى مزرعه فيها حيوانات وصورنا مع الكوالا والكنغر, بعدين رحنا الأخوات الثلاث و البلو ماونتن و تغدينا فوق الجبل و ركبنا التلفريك و الجو كان بارد ورهيب, واخر شي مرينا على مكان الألعاب الأولمبيه وبعدها ركبنا عباره الى دارلنغ هاربر
الثلاثاء: تمشينا في شوارع سدني و رحنا كوين فكتوريا و هو عباره عن سوق بس مبناه اثري وبرج سدني , و تغدينا في الهايد بارك وفي الليل حضرنا عرض آيماكس وكان لطيف
الأربعاء:فطرنا على الدارلنغ هاربر والظهر طرنا الى جولد كوست
طبعا كنا حاجزين الطيران الداخلي من مكتب اسمه flight center في سدني و عندهم فروع كثيره في كل مكان و اسعارهم حلوه. الخطوط كان اسمها فرجن بلو وهو طيران اقتصادي بس انه يمشي الحال
سدني بصفه عامه راقيه و كشخه وبارده و المشي فيها حلو بس ان الأسعار فيها شوي مرتفعه والأكل الحلال مو متوفر واذا توفر طعمه مو شي والسعر ما يستاهل عشان كذا احس ان الشقق احسن خصوصا للي معاهم اطفال

جولد كوست

اول ما وصلنا ركبنا باص المطار و وصلنا الى الفندق وكنا حاجزين في كراون بلازا وكان حلو وغرفه واسعه وموقعه جيد وجلسنا فيه 3 ليالي بعدين انتقلنا الى منتجع التايم شير راديسون بالم ميدوز وكان بعيد مره عن كل شي لدرجة ان اي مشوار نحتاجه لازم نروح باسيفيك فير ب35-60 ريال ومن هناك ناخذ باص للمكان اللي نبيه حتى ان زوجي صار يسميه المقبره لأنه كئيب في الليل وفي مكان مقطوع بسبب ملاعب الغولف اللي فيه
واكره شي فيه ان تنظيف الغرف عندهم كان مره في الأسبوع واي شي نطلبه يحسبونه علينا
وهذا جدولنا في جولد كوست
الأربعاء: بعد ما ارتحنا طلعنا نستكشف المنطقه عند الفندق
الخميس: اخذنا الباص الى موفي وورلد ومن هناك حجزنا التذاكر لكل من وارنر برذر (موفي وورلد), وتن وايلد(الألعاب المائيه), سي وورلد ومعاهم تذكره رابعه تدخلك كلهم في اي وقت لأن المالك واحد
المهم موفي وورلد كانت رحله حلوه و فيها استعراضات و انشطه كثيره بس احس ان اللي عندهم اطفال كبار يستانسون اكثر, أما بنتي فما عجبها من كل هذا إلا تويتي
الجمعه: سي وورلد وكان مكان رهيب استمتعنا فيه كثير لأن فيه حيوانات مائيه والعاب و عروض دلافين و حيوانات كثيره وفيها هليكوبتر بعد
السبت: انتقلنا الى المقبره المذكوره سابقا, وتركنا اغراضنا عندهم و رحنا باسيفيك فير و تمشينا فيه و الصراحه انه مجمع رهيب و التسوق فيه ممتع واسعاره معقوله
الأحد:رحنا الى اوتلت شوبينغ هاربر وهو سوق تجيه البضايع مباشره من المصانع و اسعاره معقوله, بس ماحسيت ان عندهم شي يستاهل خصوصا انه بعيد مره و في الليل تعشينا في السيرفرس بارادايس
الأثنين: رحنا وتن وايلد و كان مكان فيه ألعاب مائيه ووناسه للكبار و الصغار بس أحس ان وايلد وادي اللي في دبي اكبر و العابها احلى
الثلاثاء: رحنا مجمع اويسس (بصراح بايخ) بعدين رحنا منطقة سيرفرس بارادايس و تمشينا وتغدينا هناك و البحرهناك رهيب و هي احسن كنطقه للسكن لأن فيها حياه وناس تروح وتجي
الأربعاء: رحنا دريم وورلد وهي عباره عن شي يضم كل شي رحناه في استراليا: الحيوانات البريه و المائيه, مدينة العاب و فيها العاب مائيه بعد, بس العابها بصراحه يبيلها واحد شجاع و قلبه قوي
الخميس: حجزنا لركوب الباراشوت, وركبنا الباص الى الشاطئ اللي عند فندق جراند ومن هناك تقدرون تحجزون لكل الرياضات البحريه اللي تحبونها. وتغدينا هناك على البحر في مطعم اسماك رهيب
الجمعة: كان يوم الوداعيه و قضيناه في التسوق في باسيفيك فير و طبعنا الصور و ضحكنا ضحك و طبعا تذكرت اعضاء هالمنتدى الرهيب اللي لهم فضل كبير بعد الله في انجاح هالسفره بمساعدتهم لي و تعاونهم واحب اشكرهم كلهم وادعيلهم بالتوفيق
السبت: توجهنا الى برسبن و من هناك طرنا الى دبي, طبعا احنا كنا حاجزين من سدني الى دبي مباشر بس حسينا ان الرحله بتكون متعبه 15 ساعه فغيرنا الى برسبن سنغافوره دبي ووصلنا بالسلامه الى دبي يوم الأحد 25 سبتمبر صباحا وفي الليل طرنا الى الدمام
استراليا بصفه عامه حلوه بس ما تصلح لشهر عسل, بعدين الروحه لها عوايل أحسن و افضل شي اكثر من عايله عشان يوفرون في مصاريف التنقلات لأن المواصلات عندهم غاليه و السكن في الشقق افضل عشان الأكل
الأكل الحلال مش متوفر بسهوله و حتى اذا توفر فكله صنف او اثنين و ما يستاهل سعره
وعندهم شي حلو و هو توفر غرفه للصلاه في كل مكان
والسفر مع الأطفال مريح كثير عندهم لأن استعداداتهم رهيبه من كل النواحي
احلى شي لقيته عندهم الأمان. يعني لو تنسى شي في مكان و ترجع بعدين راح تلقاه مكانه. و بعد ان الواحد يجرب اشياء ما عندنا مثلها مثل الباصات و القطارات و غيرها و تكون على مستوى و تعامل الناس راقي فيها
بس بيني و بينكم, أحس ان ما يصلح تايلند واستراليا مع بعض لأنهم مختلفين تماما, بس الواحد أذا كان منجن على السفر...........
بصراحه هالرحله كانت شي حلو كثي ر.................