بسم الله الرحمن الرحيم

التقرير هذا كتبته بمدونتي قبل اسبوع ,, والعرب المسافرون أول مكان انشره خارج مدونتي ان شاء الله يفيد زوار المانيا ::








هذا اول تقاريري عن رحلتي الأوروبية اتمنى انها تكون مفيدة للي بيسافر إلى Füssen:هذي قرية كان ملك اقليم بافاريا يجيها في فترة الصيف لأنها أعلى منطقة مرتفعة عن سطح البحر في بافاريا ,, وجنبها بحيرة ,, القرية فيها قلعتين ومتحف
هذي صور القلعتين وأسمائهم :


Hohenschwangau Castle وهي القلعة الصغيرة
Neuschwanstein Castle وهي القلعة الكبيرة ( مصدر الصورة )
وايضا فيها متحف لكن مازرته
القرية هادئة جدا وخيار ممتاز للي يحبون السكن بالأرياف والمناطق الخضراء وبعيد عن زحمات المدن والمباني العملاقة
اسعار تذاكر الدخول :
سعر تذكرة الدخول للقلعة الوحدة للكبير 12 يورو وللقلعتين 23 يورو ( كثر خيرهم عالتخفيض !! )
الدخول مجاني للشباب اقل من 18 سنة وللأطفال لكل القلعتين
طريقة الوصول إلى فوسين :
اذا كنت في ميونخ أو اي مدينة داخل اقليم بافاريا يوجد تذكرة لوسائل النقل العامة اسمها Bayern-Ticket تسمح لك تتنقل داخل اقليم بافاريا واستخدام كل وسائل النقل العامة لمدة يوم كامل
هذي التذكرة شريتها من ميونخ وركبت أول قطار يروح لفوسين وكانت مدته ساعتين يروح دايركت لفوسين
الطريق كان ممتع جدا وطول الطريق على يسارك ويمينك أرض خضراء وطبيعة ترد الروح



القطار بيوصلك الى Füssen Bahnhof هذي المحطة الرئيسية للقرية وموجودة في وسط القرية أول ماتطلع منها تلقى قدامك تكاسي وباصات ومحل تأجير سياكل !! أنصح الشباب والي فيهم لياقة ياخذون السياكل لأن منطقة القلاع خيالييية والمشي فيها كثير بتكون أحلى بالسيكل
انا رحت مع الباص بنفس تذكرة اقليم بافاريا ووصلني إلى منطقة القلاع ,, لأن منطقة القلاع حوالي 10 دقايق بالباص برا القرية
هذا رقم الباص :



اذا نزلت من الباص تتوجه لمكتب التذاكر ,, طبعا التذاكر للقلعة الصغيرة والقلعة الكبيرة والمتحف
ولأن فيه زحمة سياح عندهم فكره في تنظيم دخول السياح للقلاع ,, بحيث انك اذا شريت تذكرة يكون مسجل عليها انك ماتقدر تدخل القلعة الا الساعة الفلانية بالضبط ,, طبعا فايدتها انه يدخلون الناس على شكل قروبات ويكون معهم مرشد سياحي يتكلم عن تاريخ القلعة ,, احرص انك تقول للي يقص التذاكر انك تبغى مرشد يتكلم انقليزي لاتتورط بقروب ألماني هههههههههههه



يوم قص لي التذاكر صار باقي ساعة على دخول القلعة الصغيرة وثلاث ساعات على القلعة الكبيرة قلت هذا احلى وقت أجلس استكشف البحيرة والمسارات داخل الغابة










وجلست اتمشى وابعدت عن القلعة وشفت باقي 10 دقايق ويجي وقت دخولي للقلعة !! عاد رجعت أركض للقلعة وأشوى وصلتها عالوقت المحدد
وهذا نظام بوابة القلعة وكيف تعرف هل اقدر ادخل ولا لأ :



ادخل التذكرة في البوابة الالكترونية واذا كان موعد القروب حقي تكون الشاشة خضراء وتخليني أدخل
المهم دخلت القلعة الصغيرة Hohenschwangau Castle وانتظرنا 5 دقايق عشان يكتمل القروب وقبل لا ندخل القلعة قال المرشد التصوير ممنوع داخل القلعة وقلت له بنفسي ايه هين :d
وبدينا نتمشى داخل قصر الملك والله ياهو صغير ومبني من خشب !! واضح انهم كانوا يسلكون لملوكهم اول ولا شافوا القصور الهندية !! القصور الهندية بدعة في فخامتها وهندستها وجمالها
بالقصر موجود بعض الهدايا الي استقبلها الملك مثل درع منقوش عليه 55 شعار ولا مجسم لنفس القصر منحوت من ذهب خالص
هذي صور متفرقة داخل القلعة الصغيرة :









الصورة الأخيرة عبارة عن صندوق مصمم باليد كان هدية زواج ومكتوب بالصندوق حرف الزوجة وحرف الزوج بالذهب !!



وهذي الصورة من احد نوافذ القلعة
وأكملنا جولتنا داخل القلعة وطلعنا للساحة الخارجية صغيرة وحلوة وفيها نافورة داخلها فلوس !! يرمون فيها قروش كان ودي اعرف ليش يسوون كذا
يوم شفت تذكرتي لقيت باقي ساعتين ونص على القلعة الكبيرة Neuschwanstein Castle لكنها بعيدة تحتاج ساعة كاملة عشان اوصل لها مشي برجليني ,, جلست اتمشى حول البحيرة واصور ولقيت واحد يأجر قوارب في البحيرة






بعد التمشي والتصوير ويوم بقى ساعة على موعد القلعة الكبيرة Neuschwanstein Castle قلت يلا شد العزم يبوو داحم لأنها في قمة مرتفع والمشي لها مرهق




هذي بوابة القلعة الكبيرة ( يوم وصلتها لقيتها مزحومة كثييير بالسياح اكثر من القلعة الصغيرة )
وألي فيه لياقة حلووة وخلص القلعة الكبيرة فيه جسر فوق شلال ورا هالقلعة يمكن نص ساعة مشي من القلعة يستحق الزيارة
هذي صورته :
Marienbrücke (Mary's Bridge), Fussen, Germany | Flickr - Photo Sharing!
القلعة الكبيرة غرفها اكبر وفيها 4 ادوار والدرج فيها متعب ( اصلا مايوصل هالقلعة الا الي لياقته ممتازة ههههههههههههههه )
عاد هالقلعة دلع فيها غرف الملك و صالة فيها مسرح مخصصه الملك للحفلات الموسيقية والمطبخ وش كبره والنقوشات عالجدران حلووة ,, وهذي صور من داخل القلعة













هذا منظر من احد نوافذ القلعة ,, يالله الجنة !!
وهذا المطبخ مدري من يوكل على كثر هالقدوور !!






عاد تدروون !! الملك ماسكن في هالقصر الا شهرين وبعدها مات !! وسكروا القصر ست شهور ثم فتحوه للسياح !!
وعلى كذا انتهت رحلتي للقرية الجميلة Füssen ورجعت لميونخ
نصائح هامة للي بيزور القرية :
* اهم حاجة تهتم لها تكون لابس جزمات مشي مريحة لأنك بتمتر القرية مشي بتتعب رجليك بدونها
* جو هالمدينة أبرد بقليل من ميونخ
* يوجد عربات خيل توصل من مكتب التذاكر إلى كل قلعة وسعر الركوب 2 يورو لكل شخص
* الي ناوي يسكن بفوسين فيه القرية نفسها فيها بيوت وفنادق وفيه منطقة القلاع وجنبها فنادق مبنية على استايل القلاع انصحكم تسكنون فيها عشان تعيشون جو الريف بجد
* القرية تاخذ منك يوم كامل اذا كنت في ميونخ أول قطار يروح لها الساعة 9:50 واحسب 4 ساعات الطريق و 5 ساعات تجلس فيها ,, يعني ماترجع لميونخ الا الساعة 7 المغرب
ان شاء الله يكون هالتقرير فيه معلومات مفيدة للي بيزور القرية