بشرى سارة لكافة اعضاء ورواد منتدى العرب المسافرون حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق arTravelers.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب وقد تم نشر 400,000 ألف موضوع 3,500,000 مليون مشاركة وأكثر من 10,000,000 مليون صورة ما يقرب من 30,000 ألف GB من المرفقات وهي إجمالي محتويات العرب المسافرون للاستفادة منها والتفاعل معها كحق اساسي لكل عضو قام بتأسيس هذا المحتوى على الانترنت العربي بغرض الفائدة.

لمزيد من التفاصيل يمكنكم مراسلتنا من خلال نموذح الاتصال, العرب المسافرون على Facebook



أبو سعود Q8 أبو سعود Q8
متعة الأطفال في سنغافورة
17-12-2014 - 04:59 am

السلام عليكم جميعا

هذا أول تقرير أشارك فيه ببوابة دول آسيا الأخرى وهو عن دولة سنغافورة
وأتمنى أنه يعجبكم.
SINGAPORE 2012


بالبداية أحب أوضح بعض النقاط قبل ما ندخل بالتقرير:

· تعتبر هذي السفرة فريدة من نوعها وأول مره أسويها لأني سافرت انا وأولادي الثلاثة فقط الله يحفظهم ( سعود 8 سنوات ، سلمان 7 سنوات ، ياسين 5 سنوات ) بدون امهم ، طبعا لكل سفرة مميزيات وعيوب وهذي السفرة لا تخلو من هذي النقاط ، لكن كتجربة جديده أحسها انها ناجحه جدا وان شاء الله راح أعيد هذي التجربة بالسنوات القادمة بإذن الله.

· الغرض الأساسي للسفرة هو الأطفال ووناستهم وراحتهم ، يعني كل الأماكن الي بذكرها بالتقرير راح تكون مناسبة للأطفال أكثر من الكبار، وفي أماكن وايد غيرها ما زرتها لأنها ما تناسب الأطفال أو لأن الأطفال ما يهتمون لهذي الأماكن .

· السفرة كانت لدولتين ( ماليزيا وسنغافورة ) ، كنت بودي اليهال ماليزيا فقط لأني زايرها أكثر من مره واليهال يحبونها وايد ، بس بعد ما قريت مواضيع أعضاء البوابة عن سنغافورة دخلت بمزاجي وقررت أني أزورها وأدمجها مع سفرة ماليزيا ، وكان قرار صحيح وناجح 100 %.

· عدد الأيام بسنغافورة 5 أيام ( 4 ليالي ) ، كنت أتوقع انها كافية لكن اكتشفت ان الي معاه أطفال ويبي يونسهم آخر وناسة راح يحتاج لأكثر من 5 أيام لسنغافورة ، مع العلم ان سنغافورة غالية حبتين يعني مصروف 5 أيام بسنغافورة يعادل تقريبا مصروف 8 أيام في ماليزيا !

· هذي أول زيارة لي لسنغافورة ، وبعد ما شفتها أتمنى أني أزورها مرة ثانية لكن هذي المره مع زوجتي وعيالي كلهم إن شاء الله.

· وآخر شي بقوله ان كل التعليقات والنصايح والنقد و و و ........ تعتبر رأيي الشخصي وليس بالضرورة أن يطابق آراء كل الناس ، قد يختلف معي البعض من الناس وقد يتفق البعض الآخر ، و مو شرط الي يعجبني انه يعجب غيري والعكس صحيح طبعا.

أولا" : وقت السفرة والطيران

وقت السفرة كان بإجازة نص السنة بأواخر شهر فبراير ، الجو كان جدا جميل بهذا الوقت ، درجة الحرارة تتراوح بين 20 إلى 25 بالنهار والرطوبة شبة منعدمة وبالليل تحس بنسيم بارد نوعا ما ، طبعا مثل ما ذكرت ان تم زيارة دولتين ، ماليزيا وسنغافورة ، البداية كانت في ماليزيا لمدة 4 أيام ثم الذهاب إلى سنغافورة عن طريق طيران آسيا ( من تاريخ 1/2/2012 لغاية 5/2/2012 ) هذي الفترة الي كانت مخصصة لزيارة سنغافورة ، وبعدين رجعنا ماليزيا وقعدنا فيها 5 أيام .

تم حجز التذاكر على طيران الإتحاد لعدد 4 أشخاص ( واحد كبير وثلاثة صغار ) من الكويت إلى كوالالمبور بسعر 594 دينار كويتي.

وتم حجز التذاكر لعدد 4 أشخاص ( مافي فرق بين الكبير والصغير )على طيران آسيا من كوالالمبور إلى سنغافورة بسعر 864 رنقت ماليزي ( 82 دينار كويتي ) وهذا السعر شامل الذهاب والإياب والضرائب والوزن ( 20 كيلو ) واختيار المقعد والتأمين وضريبة الدفع بالبطاقة الأئتمانية.

يعني تكلفة الطيران الأجمالية لسنغافورة تساوي 594 + 82 = 676 دينار كويتي.
لو بتروحون دايركت إلى سنغافورة بتحصلون أقل من هذا السعر

هذي بعض الصور لمطار طيران آسيا في ماليزيا ، ويسمونة
LCCT




كانت رحلتنا الظهر ، طبعا اليهال أول ما يشوفون حبيبهم ماكدونالدز على طول يطلبون منه


وهذي الصور من داخل الطيارة



وهذي بعض الصور لسنغافورة من الجو ، والشي الي يلفت الانتباه وجود عدد كبييييييييييييييييييييير جدا من السفن بالقرب من الشاطئ !


بعدين لما وصلنا سألت راعي التاكسي عن سبب وجود هذي السفن وقالي انهم ناطرين دورهم للدخول للميناء ! يقول بعض السفن تنطر دورها لأكثر من 3 أيام !!


اقتربنا من الهبوط


وهذي صورة أسم المطار
Changi Airport





الحمد الله إجراءات الدخول كانت سهله وسلسة وما طولنا فيها ، على فكرة الكويتيون لا يحتاجون فيزا للدخول إلى سنغافورة ، ولا دفعنا رسوم ولا شي نهائيا ، مجرد عبينا بيانات كرت الدخول الي وزعوه علينا بالطيارة وحطيت كل كرت بالجواز وعطيتة الموظف المختص للجوازات ، البيانات مثل الاسم ورقم الجواز وتاريخ الانتهاء و و و وسبب الزيارة ومكان السكن ..... شغلات عادية يعني ومافي أي صعوبة نهائيا.





المشاركات

أبو سعود Q8 أبو سعود Q8
متعة الأطفال في سنغافورة


ثانيا" : السكن


انا من النوع الي ما يحب يتنقل وايد ولا أحب اغير الفندق بنفس المنطقة ، أحب اني أختار فندق وأقعد فيه طول المدة عشان ما أضيع وقت بالتنقلات وترتيب الشنط وفرزهم وعفستهم و و ، عشان جذي فكرة اني أسكن بأهم منطقة أو شارع بسنغافورة وهو شارع اوتشارد ، الكل يتكلم عنه وعن مجمعاته و المطاعم الي فيه وموقعه بنص المدينة وهو من أكثر الشوارع حيوية بسنغافورة ......... لكن

لكن من شفت فندق ( أعتبره صرح معماري وليس مجرد فندق ) المارينا باي ساندز دش بمزاجي حيييييييييييل وتمنيت إني أسكن فيه ، بس الفندق كان سعره غالي بصراحه وماقدر اني اسكن طول الفترة فيه فقررت اني أقسم هذي الفترة في فندقين ، ليلتين في فندق المارينا باي ساندز ( بمنطقة المارينا ) وليلتين بفندق قراند بارك ( بشارع اوتشارد ) .
يمكن في ناس تتفق معاي ومع التقسيمة هذي ، ويمكن في ناس تختلف معاي ، اهو قرار واتخذته والحمد الله ما ندمت عليه ، لكن بعد ما زرت سنغافورة وشفتها عرفت اني لو كنت ساكن طوووووول الفترة بجزيرة سانتوزا لكان أفضل وأفضل من التقسيمة هذي ، مع العلم ان الفنادق الي سكنت فيها تعتبر 5 نجوم وجديدة ونظيفه ومريحه وجميله وحلوه ومافيها عيوب تذكر ! لكن جزيرة سانتوزا للأطفال هي أفضل مكان سواء للسكن أو للتسلية والسياحة .... ومثل ما قلت بالبداية هذا رأي الشخخخخخصي ومو بالظروره انه يكون رأي صحيح ولا انه يناسب الكل.


أبو سعود Q8 أبو سعود Q8
متعة الأطفال في سنغافورة


Marina Bay Sands Singapore


تم الحجز عن طريق موقع طيران أسيا ( الموقع يحتوي على حجز الطيران ويحتوي أيضا على حجز للفنادق ) ، من تاريخ 1/2/2012 إلى 3/2/2012 ليلتين مع الأفطار ونوع الغرفة بريمير بسعر 923 دولار سنغافوري ( تقريبا 210 دينار كويتي ) ، الموقع هذا دايما أحجز منه فنادق لشرق آسيا وخصوصا ماليزيا ، موقع مضمون 100% ورخيص جدا ، غالبا ما يكون أرخص من الموقع الرسمي للفنادق وهذا ما حصل معاي وأتوقع انه أرخص من المواقع الأخرى ، طبعا كل ما حجزت مبجر كل ما حصلت أفضل سعر !



والمواقع الثانية مثل بوكنق ما لقيت فيه غرفة بريمير ، كل الغرف كانت ستاندرد ، طبعا غرفة البريمير تتميز عن الستاندرد بأنها أكبر بالحجم وأحلى بالتجهيزات والأثاث وأهم شي انها بالأدوار العليا.

Premier - With Breakfast
SGD 932
هذا هو الموقع الرسمي للفندق
Hotel in Singapore | Official Site Marina Bay Sands Singapore | Luxury Hotel Casino

صورة الرسبشن


واللوبي



كانت غرفتنا بالدور 42 غرفة رقم 84 مثل ماهو واضح بالصورة




بس مع الأسف ما تطل على المارينا تطل على الخلف

أخليكم مع صور الغرفة من الداخل




طبعا الانترنت مجاني بالغرفة والفندق كله ، سواء عن طريق الواي فاي أو على المكتب هذا عن طريق الكيبل


صور الحمام عزكم الله





صورة من داخل الحمام تكرمون ، أول باب على اليمين لغرفة الدوش وثاني باب على اليسار لغرفة المرحاض وبعدين المغسلة ، ومثل ما تلاحضون حجم الحمام أجلكم الله كبيييييييييييير جدا جدا !


مازلنا مع صور الغرفة
الستارة تفتح وتغلق كهربائيا عن طريق الريموت كنترول ، وهذي الأريكة أو الكرسي كنت بخليها لواحد من العيال عشان ينام عليها ، بس لما دخل حمال الشنط سألني ما تبي سرير إضافي ؟ قلتله بجم سعره قالي ... ببلاش

طبعا على طول قلتله أبيييييييي سرير إضافي


وهذي صور الخزانة ، وهي مجهزة بكل شي



وهذي طاولة التلفزيون


التلفزيون فيه عدة قنوات وتقدر تتحكم عن طريقه بشغلات وايد ، تقدر تشبك على الانترنت بالتلفزيون وتدخل على بريدك أو الفيس بوك وحتى اليو تيوب ، تقدر تطلب الروم سيرفس عن طريق التلفزيون وتقدر توقت المنبه وتقدر تشوف الرحلات السياحية الي يقدمها لك الفندق وتقدر تشوف خدمات ومطاعم ومقاهي الفندق ، وطبعا تقدر تشوف القنوات التلفزيونية ، انا أهم شي كان عندي انهم يوفرون قناة كارتون نتوورك حق اليهال.

أما الثلاجة فقصتها قصة


مثل ما تشوفون الميني بار بالثلاجة يحتوي على كل شي ، طلبت منهم انهم يزيلون كل الشغلات هذي لأني ما أبيها وكنت ابي اشتري شغلات من بره تكون ارخص وحلال طبعا عشان اشربها وآكلها ، لكن المشكلة انهم قالولي ما نقدر نحرك أي قطعة من الثلاجة لأنك لو حركت اي شي راح ينحسب عليك ! حتى لو ما استخدمته مجرد انك حركته من مكانه راح ينحسب عليك !! فقلتلهم وشنو الحل ؟ قالوا ولا يهمك احنا نجيبلك ثلاجة ثانية غير هذي بس أصغر منها مجانا ونخليها عندك بجانب هذي الثلاجة
وهذا أول عيوب الفندق ، طبعا اهو مو عيب كبير ولا مشكله عويصه ، بس الثلاجة الثانية ( صورتها بالصورة الي فوق على اليمين ) كانت صغيره ، ما تكفي شغلات وايد ، وما تبرد عدل والأهم انها تطلع صوت صفير

وهذي صور من البلكونة ، مع الأسف الغرفة ما تطل على المارينا ( الواجهه الأمامية للفندق ) إنما تطل على البحر ( الواجهه الخلفية للفندق )



بعد وصولنا بقليل بدأ المطر ينهمر وصوت الرعد كان قويي ي ي ي ي ، عبالي صار تسونامي


تلاحضون وجود حفريات واعمال بناء وتشييد لمباني جديدة تقغ خلف الفندق ، أتوقع انهم يخلصون منها على السنة القادمة





أبو سعود Q8 أبو سعود Q8
متعة الأطفال في سنغافورة


هذي صور الفندق من الخارج















تلاحظون المركز التجاري التابع للفندق




وهذي صورة محل الأزياء الشهير لويس فيتون
LOUIS VUITTON


وخلفه المتحف الخاص بالفندق ، كانوا يعرضون صور ومقتنيات سفينة تايتانيك بمناسبة مرور 100 عام على غرقها 1912 -2012 ، بس ما دخلنا للمتحف لأنه ما يستهوي الأطفال




منظر للمارينا وناطحات السحاب والأبراج المنتشره بهذه المنطقة









وهذي صورة شعار سنغافورة وهو الأسد
Merlion


من هذا المكان تقدرون تاخذون جولة بحرية تشوفون خلالها المنطقة من البحر ، وفي بعض الرحلات تكون مع الأكل مثل وجبة الغداء أو العشاء




ملاحظة : في أماكن ثانية بعد تقدرون تاخذون الجولة البحرية منها مو شرط من عند تمثال الأسد

وهذا الملعب الاولمبي على يمين الصورة
















هذي الصور من داخل المجمع التجاري التابع للفندق


المجمع كبير وضخم وحلو والمحلات أغلبيتها من الماركات العالمية المشهورة






وطبعا كل شي غااااااااااااااالي










الي تبي تتسوق الأفضل لها تروح شارع اوتشارد الشهير ، هناك المحلات منوعة منها الغالية والمعقولة الأسعار والبضائع مختلفة وكان في تنزيلات عندهم بالفترة الي كنا فيها
( التنزيلات موجودة بمحلات ومجمعات شارع اوتشارد وليس بالمجمع التجاري التابع لفندق المارينا باي ساندز )





أبو سعود Q8 أبو سعود Q8
متعة الأطفال في سنغافورة



ثالثا" : الأكل
الروم سيرفيس

العيب الثاني الي واجهناه بالفندق هو الأكل ، المجمع التجاري يحتوي على العدييييييييييييد من المطاعم بس مع الأسف أغلبها مطاعم غير حلال ! والأكل كله أكل صيني ( شاينيز فود ) مانحبه ولا نحب ريحته

ولا في مطاعم للوجبات السريعة بالمجمع التجاري مثل ماكدونالدز أو كنكاتي أو برجركنج ( هذي المطاعم أكلهم حلال وعندهم شهادة حكومية معلقه بالمحل مكتوبة بالعربي والانجليزي تثبت ان أكلهم حلال ) ، فكنا نظطر ان نطلب من مطاعم الفندق نفسه أكل نباتي ، مثل معكرونه وبيتزا خضروات وسمك وبطاط ( فيش أند شبس )






الريوق

الفندق يحتوي على 6 مطاعم ، مخصصين منهم 3 مطاعم للإفطار ، مطعمين باللوبي والمطعم الثالث بالطابق 15

احنا رحنا مطعم واحد وتريقنا فيه يومين متتاليين ، المطعم كان زحمه نوعا ما لكن الأكل متواجد وبكثره ومن كل الأصناف والألوان والأشكال وأتوقع انه يرضي جميع الأذواق ، وهذي بعض صور المطعم والأفطار

















JUSTSHUHS JUSTSHUHS
متعة الأطفال في سنغافورة


ماشاء الله عليك يابو سعود ابدعت واتحفتنا في تقريرك جزاك الله خير

ننتظر الباقي ولا تطول


أبو سعود Q8 أبو سعود Q8
متعة الأطفال في سنغافورة


رابعا": متعة الأطفال

SKY PARK


السكاي بارك أو حديقة السماء هو أول مكان ترفيهي زرناه ووديت له اليهال واستانسوا فيه وايد ، من بعد الريوق إلى الظهر تقريبا واحنا هناك نشوف ونسبح ونتشمس ونشرب ..... عصير طبعا


السكاي بارك هو مطل يطل على منطقة المارينا وما حولها ، مكانة بنفس الفندق بالدور الأخير ( السطح ) ومسوين فيه مثل الحديقة الصغيرة ومتفننين فيها


فيه عدة شغلات هناك مثل بار ومطعم صغير لتقديم المشروبات





وطبعا الشي الرئيسي هناك هو حمام السباحة


كبيييييييييييييييير جدا جدا وشكله منحني على نفس انحناء الفندق


مرتب ومجهز بكل الوسائل اللازمة للسباحة من فوط وكراسي وحمامات تكرمون لتغيير الملابس



وأيضا فيه محل لبيع الملابس و الكريمات الخاصه للسباحة وللحمام الشمسي وغيره


وطبعا حمام سباحة للكبار وآخر للصغار



بس أكثر شي يميزه موقعه .............. ابداع









وهذي بعض الصور للأبراج وناطحات السحاب ومنطقة المارينا وما حولها من الأعلى







طبعا بعد السباحة بحمام السباحة لازم يسبحون بحمام غرفتهم العجيب





أبو سعود Q8 أبو سعود Q8
متعة الأطفال في سنغافورة


Singapore Flyer



العجلة الدوارة أو السنغافور فلاير هو ثاني مكان سياحي أو ترفيهي قمنا بزيارتة
مكانه قريب من الفندق تقريبا 10 دقايق مشيا عالأقدام من فندقنا

هذا هو الموقع الرسمي للفلاير


الاسعار ما أذكرها بالضبط ( على ما أظن كان الشخص ب 7 دنانير كويتية ) يمكن تحصلونها بالموقع الرسمي ، بس كان يستاهل الزياره والركوب ............ اليهال استانسو عليها


هذي بعض الصور أثناء الذهاب للسنغافور فلاير








وقت زيارتنا لها كان الظهر بثاني يوم لنا بسنغافورة ، بس مادري ليش ماكان في ناس وايد هناك ! السياح كان عددهم قليييييل جدا عند الفلاير

العربة ( الكابينة ) المفروض تستوعب 15 شخص بس لأن مافي ناس وايد خصصو لنا عربة خاصه فينا


المطاعم والكافيهات عند المدخل



وهذي الصورة من داخل المبنى











لازم البرد بالنهاية








وهذي بعض صور للفندق بوقت العصر لمنطقة المارينا














Mr. Jo Mr. Jo
متعة الأطفال في سنغافورة


أهلا وسهلا ومرحبا أخي العزيز بوسعود

ماشاء الله تبارك الله


يا سلام عليك وعلى هالتقرير الجميل البسيط المرتب جداً


وفعلاً أحس انها رحلة شبابية راااائعة وجميلة ومتعة
انت وعيالك الله يحفظهم ويخليهم لك ان شاء الله يارب

احساس اكيد غييير


وفعلاً مثل ماقلت .. سنغافورة ساحرة بأجواءها و5 ايام فقط لاتكفيها .. كثيرة الاماكن الحلوة اللي الواحد ممكن يزورها في سنغافورة


وأشكرك من صميم القلب على هكذا موضوع رائع وجميل ومرتب وصور جميلة جداً ذكرتني بهذه الدولة التي اعتبرها احدى اجمل الدول التي زرتها في حياتي


موضوعك باختصار مدهش ورائع ووجبة دسمة


ومرة ثانية وثالثة وعاشرة ... الله يخليكم لبعض ان شاء الله وتكثرون مثل هالرحلات الجميلة انت وابناءك ان شاء الله


وتفضل بقبول فائق تحياتي

بوعلاوي



أبو سعود Q8 أبو سعود Q8
متعة الأطفال في سنغافورة


NIGHT SAFARI


النايت سفاري هي ثالث مكان سياحي أو ترفيهي قمنا بزيارتة
حسب ما قريت انها الوحيده بشرق آسيا او شي من هذا القبيل

هذا هو الموقع الرسمي للنايت سفاري





المهم .... الحديقة تفتح بالليل فقط ، من الساعة السابعة إلى الساعة 12 منتصف الليل ، طريقتها مثل حديقة الحيوانات العادية تقريبا ، تقدر تركب الترام أو الباص الخاص بالسفاري مع القروب ويكون فيه قايد ( قائد ) يقود الباص هذا بشارع خاص داخل الحديقة وتكون الحيوانات على اليمين والشمال وهو يشرح لكم ويصف هذي الحيوانات



أيضا تقدر انك ما تروح بالباص وتروح مشي عالأقدام بطريق آخر ، لكن أتوقع انه بيكون متتتتعب جدا خصوصا للأطفال

احنا فضلنا الباص وركبنا فيه











وهذي بعض الصور بس مع الأسف كلها مهزوزه ومرجوجه لأن التصوير بالليل وممنوع نستخدم الفلاش نهائيا واحنا راكبين بالباص وهو يتحرك فكان التصوير الفوتوغرافي صعب








أحلى شي بالحديقة هو العروض

كان في عرضين بهذاك اليوم الي زرناها الأول كان عن الحيوانات والآخر كان عن سكان الغابة الأوائل ، العرضين حلويييييييين وجميلين وهم أحلى شي بالحديقة .








الحديقة فيها بعض المطاعم الي تقدم الأكل الصيني والسنغافوري ( أكل شرق آسيا ) بس ما شفت ولا مطعم يقدم أكل حلال





بالنسبة للتذاكر كان هناك عرض ، تحجز تذاكر لثلاث حدائق
( سفاري نايت + سنغافور زو + حديقة الطيور )
Bird Park + Zoo + Night Safari
بسعر 58 دولار سنغافوري ، يعني تقريبا 14 دينار كويتي طبعا للشخص الواحد وبهذي الطريقة توفر 12 دولار
احنا أخذنا هذا العرض على أساس ان بنزور الحدائك ثلاثتهم ...... لكن للأسف ما كان عندنا وقت كافي وزرنا حديقتين فقط.


تقييمي للحديقة : حديقة جيدة ، بس ما حسيت إن فيها شي عجيييب أو مميز جدا ، الحيوانات أغلبها نعسانه أو نايمه ، والظلام بكل مكان ، والريحه كانت .............. بدون تعليق

العروض كانت جميله وحلوه وفيها مفاجآت حق الأطفال ويخلونهم يشاركون معاهم ، فنصيحه للي حاب يزور السفاري نايت انه أول ما يدخل يسأل عن وقت العروض ومكانهم ويروحلهم ويشوفهم وبعدين يتفرغ للركوب بالباص ورؤية باقي أجزاء الحديقة.


ملاحظة هامة : النايت سفاري موقعه ملاصق لحديقة الحيوانات ( سنغافور زو ) بس حديقة الحيوانات تفتح من الساعة 10 الصبح لغاية الساعة 7 بالليل والنايت سفاري تفتح من الساعة 7 بالليل لغاية منتصف الليل ، والحديقتين موقعهم بعيد نوعا ما عن وسط المدينة ( تقريبا ساعة إلا ربع بالتاكسي ) .





طبعا بعد ما رجعنا من الحديقة رحنا غرفتنا وزهبنا جناطنا لأن هذا كان آخر يوم لنا بفندق المارينا باي ساندز ، بننام ونقعد ونروح الفندق الثاني




يمكنك فتح موضوع جديد للمناقشة او الاستفسار والمشاركة.

احجز الفندق بأعلى خصم:
خصم يصل إلى 25%

Share

متعة الأطفال في سنغافورة