- الأولى بخصوص الفنادق والثانيه بخصوص ترتيب الرحلات والجولات
- طبعا راح أذكر نبذه عن ترتيبات الرحلة بصوره سريعه
- تقريبا هذي ملاحظات بسيطة جدا اتمنى انها تفيدكم..
- نجي الان للرحلات الداخلية والجولات
- بالنسبة لكوالا من 25-30 هذا العادل غيره لا لا لا
- واحرصوا على خرائط الزائرين والسياح
السلام عليكم ورحمة الله وبركاته
أحب أصبح/أمسي على الجميع
وخاصة الناس اللي استفدت من مواضيعهم ومن تجاربهم السابقة
ومن مبدأ من رد الجميل لهم وأيضا لتنبيه الاخوان على الاخطاء او الهفوات اللي ممكن تصير لهم
طبعا هنا انا راح اتكلم عن نقطتين
الأولى بخصوص الفنادق والثانيه بخصوص ترتيب الرحلات والجولات
طبعا راح أذكر نبذه عن ترتيبات الرحلة بصوره سريعه
- الرحلة مثل ماذكر في الموضوع من تاريخ 2-6-2011 إلى 15-6-2011
- السفر الدولي عن طريق الخطوط الاماراتية، الدرجة السياحيه
- السفر الداخلي بين المدن عن طريق الخطوط الماليزية و التاكسي بالاضافية للفيري
- الفنادق (المكان، اسم الفندق، نوع الغرفة، المدة)
+ سلانجور ، صن واي لاقون ريسورت، كلوب ستديو ، 2 - 5
+ كاميرون هايلاند ، أكواتوريال ، ديلوكس ، 6 - 7
+ بينانج ، هارد روك ، ديلوكس ، 8 - 9 من افضل الفنادق في بنانج والكلام عن صوت الموسيقى انه قوي ، انا صراحه ما شفت الشيء صحيح فيه موسيقى بس مو بالصخب اللي ذكروه الاخوان في بعض المواضيع
+ لنكاوي ، ويستن ، سبيريور ، 10 - 11
+ كوالا لمبور ، تريدرز ، ديلوكس ، 11 - 15
الآن راح نتكلم عن المشاكل والحلول المهمة اللي لازم تحطونها في بالكم
بالنسبة للفنادق
أهم شي الفوتشر أهم شيء جدا (بحيث انه يكون محتوي على جميع المعلومات المهمة ونوع الغرفة ونوع السرير والطلبات الخاصه)
على سبيل المثال: نوع الغرفة ديلوكس ، السرير كنق أو توين ، مطلة على الحديقة أو البحر أو التل ، مدخن او غير مدخن
وهذي من المشاكل اللي واجهتني (عدم تحديد نوع السرير في الفوتشر مع اني كنت متفق مع مكتب الحجوزات)
أيضا من الملاحظات المهمة يفضل قبل السفر بيومين أو ثلاثة التواصل مع الفنادق والتأكد من الحجوزات حتى وان كان معك فوتشر (الفوتشر مجرد ورقة طبوعه من المكتب وليست تعني انها فعليه)
وهذي ايضا مشكله حدثت لي عند وصولي لصن واي لاقون ريسورت قالو ان حجزك يبدا من تاريخ 3 والفوتشر من 2 **انتبهوا** (وللامانه الفندق جدا متعاون مع ان الفندق كان مزحوم وما فيه غرف الا انهم اعطوني غرفه نفس حجزي لكن بكرا اغيرها لان الغرفة هذي محجوزه لشخص اخر من بكرا )
بالنسبة للفنادق يفضل انك تكون عارف للغة الانجليزية حتى اذا ماحصلت على مرادك فطالب فيه ولا تخاف من احد ولا تسكت ابد ، وصلها للمدير ارسل ايميل للشركة ، لادراة الفندق ... وكل هذا يصير وانت عندهم يعني اجلس في اللوبي قدام الاستقبال وافتح الاب توب وارسل ايميلات ,, خذ رقم الادارة واتصل فيهم .. لا تخاف ابد انت دايم صاحب حق
والله انت تصير احسن من اللي ساكنين في اجنحة ،، خاصة فنادق الخمس والاربع نجوم
ايضا من الملاحظات ،، لما تسوي تشك اوت ويعطونك برنت بمصروفاتك شيك عليها وحده وحده
واذا انت اخذت شيء من المني بار انتبه للسعر واتاكد منه في البرنت اوت حق التشك اوت ...
هذي مشكلة واجهتها عند تريدرز ، انهم ضايفين لي اشياء من المني بار انا ما استهلكتها ، وما سكت ومباشرة الادارة شالتها علطول ( وللامانه الفندق هذا راقي جدا في تعاملهم .. صحيح الاستقبال زحمه بس اي تذمر منك وتوصله للادارة مباشرة يعدلون وضعك ولا بعد يرضونك .. اهم شيء عندهم انك تكون راضي)
تقريبا هذي ملاحظات بسيطة جدا اتمنى انها تفيدكم..
نجي الان للرحلات الداخلية والجولات
أهم شيء عند الاتفاق مع اي سائق لا يجلس يلعب عليك ويعطيك بكج او يعطيك اياها قطوعه لا مباشرة اتفاهم معاه بالساعه. واذا انت رايح لمكان راح تطول فيه اكثر من خمس ساعات كمدن الالعاب المائية يفضل انك تخلي التاكسي يوديك وترجع مع تاكسي اخر او تتفق مع التاكسي انه يجي لك اذا كلمته لان اتفاق الساعات راح يكون ظلم لك في هالحاله
جميع الولايات ما عدا كوالا اتفاق الساعه العادل 20 رنقت للساعه غيره راح يكون غالي
بالنسبة لكوالا من 25-30 هذا العادل غيره لا لا لا
خلو عندكم خطة واماكن انت تبغون تروحون لها لا تخلونه هو ياخذكم وين ما يبي (والمنتدى مليان بالتقارير)
معرفة مكان الاماكن مهم جدا عشان السائق ما يلعب ويجلس يلف ويدور عشان الوقت يزيد ، الخرائط موجوده في كل مكان في الولايات وخاصة في المطارات والفنادق واذا ما حصلتها تحصلها في بعض المحلات بسعر رخيص جدا 2-5 رنقت
واحرصوا على خرائط الزائرين والسياح
بالنسبة للتنقل بين المدن افضل طريقة التاكسي لو انها غالية شوي بس والله تستاهل ، اول شيء راحه ، اي وقت تبي تمشي تمشي ، تقدر توقف السواق باي مكان بالطريق اذا فيه اماكن تبي تروحلها وانت مسافر بالتاكسي ما عليك الا تتفق معاه (يعني مثلا واحنا ماشين من كاميرون لبنانج بعد الاتفاق على السعر 350 رنقت قلنا للسواق نبي نمر على مزرعة الشاي قال اوكي وعرض علينا بعد نمر مزرعه النحل، مره انسان حبوب ولطيف)
للمعلومية التاكسي واسعاره
من سلانجور لكاميرون 300 رنقت
من كاميرون لبنانج 350 رنقت
من بنانج لكوالا كداه محطة الفيري الاخرى 230
من كوالا كداه للنكاوي فيري طبعا ب 23 للشخص
من لنكاوي الى كوالا بالطيارة
ملاحظة ما قبل الاخيرة ( بخصوص الاماكن الترفيهية الكبيره حاولو تتجنبون اوقات الاجاوات والويك اند ، ايضا انتبهو لساعات العمل وايام الاغلاق للصيانه . وهذي تحصلونها في مواقع الانترنت الخاصه بالاماكن)
اخيرا بخصوص الصرف (يفضل اخذ دولا كاش معاك وتجنب البطاقات والكردت كارد)
الصرف يفضل باوقات مختلفه يعني كل فرتة اصرف حاجتك حتى لا ترجع ومعاك باقي نقد
افضل محلات الصرافه ، اول شيء بمطار كوالا ، بعد ماتنزل في المطار وتنتقل بالقطار للصالات الثانة وقبل الدرج الكهربائي اللي ينزلك عند الجوازات طالع للخلف جهت اليمين راح تحصل محل صرافه لوحته حمراء (هذا افضل واحد في المطار)
سلانجور فيه محل داخل برميد مول بالوسط هذا سعره ممتاز
كاميرون ولنكاوي فيها بس غالين يفضل قبل ما تروحلها
بينانج في زاويةالعماره اللي فيها كنتاكي (خلي كنتاكي بيسارك وامشي لين نهاية العماره وتلقى المحل بيسارك)
كوالا افضل شي في شارع العرب المحلات اللي تكون في الوسط لا تصرفون من اللي قريبين من ماكدونلدز هذولي مرره غالين (تخيلو الريت عندهم 2.90 واللي بالوسط 3.015) فرق شاسع فاانتبهو
اتمنى اني افدت الجميع واسف على عدم الترتيب
بس انا الفجر وصلت والحمدلله وقلت خلني الحق عشان الناس اللي بتسافر تنتبه
اي سؤال واستفسار انا حاضر واللي يبي ارقام سواقين مجربهم انا (ممتازين) كمان انا حاضر
اخوكم عبدالله
الله يجزاك خير