تقرير جميل أخوي صياد أحس اني اعرفك لاتنسى تكتب تاريخ الرحلة وهل هي سياحة ولادراسة
بالتوفيق وإلى الامام -----)--->

hamd023
هلا والله ومرحبا ... وين تعرفني فيه ياطويل العمر.. والله انا رايح دراسة بس لا تخلو من سياحة
وشكرا على المرور

بدايه حلوه أخي الكريم
سجلني من أوائل المتابعين

*دره*
أتشرف بمرورك دره ...

حياك الله اخوي السراج المنير ( ترى الاسم احسن من صياد)
اقول لك السراج المنير وين محله طالبين مني صور في الجامعة ( بيوزعونها على الطلاب لرفع معنوياتهم
متابعين معك ( لاتطول علينا
الله يوفقك

wooden
ههه ... هلا ومرحبا ومقربا .. ان شا الله قريبا الحلقة الثانية... بس تخبر بداية الترم زحمة مشاوير
اعذرنا يا خوي.. وشكرا على المرور

1. (من لندن الى هاملتون)


2. عدنا ويا حياكم الله...


3. والمشروبات على مدار الساعة كل شوي ناقزين لك


4. وهذي صور بشكل عام لمطار تورنتو..

الحلقة الثانية

(من لندن الى هاملتون)

عدنا ويا حياكم الله...

ويوم ركبنا الطيارة الكنديه .. على عكس ما سمعناه كانت طيارة جديدة "تلق" والشاشات لمس وشغل عدل .. ولا ازعاج ولا شي عدا الورع الصيني وابوه اللي جنبي.. والمضيفين يمشون ويوزعون ابتسامات .. واي شي تامره يقلوون شور _بالتأكيد_ لو تقول لهم خلوا السواق يحط رجله ويدعس قالوا شورض3 .

والمشروبات على مدار الساعة كل شوي ناقزين لك

وش تشرب وش ما تشرب.. اقول لهم صودا كاويه ولا كوفي بالكريم والسكر "دبل دبل" .. اما الصيني كل ما طق عودن حصاة طلب واين _نبيذ خفيف للغاية_ تقول عنز بدو طاحت في مريس ..واما ولده مسيكين:021: كل ما طلب شي حلو قال ابوه لا مالك الا عصير تفاح.. رحمت البزر احس انه اذا كبر بتجيه عقده من التفاح..
وكنت تعبان مره وكان كل جسمي نايم عدا نخاعي المستطيل أطال الله في عمره.. ويوم قمت من غطتي قعدت اشوف وجيه البشرية ( فاضي ما عندي شغل :1370: ).. شفت واحد احدب الظهر شعره اشقر وبشرته بيضاء بس الغريب ان رأسه المتوازي الأضلاع يحتوي على صلعه سوداء دائرية كاملة الإستدارة .. انا استنكرت سواد هذه الصلعة قلت يا رجال رح شف وش السالفة .. ويوم قربت إلا والله الرجال يهودي لابس طاقيتهم المعروفة بس صراحة شكله هيبة ورزة ..
وشفت لي واحد اسمراني في اخر صفي عند النافذة البيضوية انا قلت هالملامح ملامح مألوفه .. الولد كنه يسمعني ناظرني بنظرة عاطفية وضم شفتيه البرونزيتين ثم اطلقها ثم ظمها .. انا شكيت في نفسي .. قلت لا يكون الرجال اللي بالي بالك.. هو حس اني مافهمته.. فأطلقها مدويه "مرحبا يا زول" (الأخ سوداني ض3 ) فبادلته التحية برفع يدي اليمنى ملوحاً بها ..ومع التلويح هذا قالوا استعدوا للهبوط .. وكان شعور خبال ان تلوح بيدك وتسمعهم يقولون استعدوا للهبوط ( يسمع بالمشاعرض3 )..
ويوم نزلنا .. انقسمنا فريقين.. فريق يدخل كندا بسلاسة متناهية .. وفريق يمسك سرا مع الماسكين الى مكتب الهجرة الكندي ..و انا ماسك سرا .. وجهي حمر وبدا العرق يتصبب من جبهتي:021: قلت في نفسي هذي والله اللخمة اللي سولفولي عنها (مسوي ما قد انلخم ض3 ).. و هذي عمايل هرمون الإدرينالين ..
ويوم جا دوري كان قدامي خيارين يا أروح لموضف مشهب قبيح الوجه عضيم الهامة او موضفة نحيلة الجسم طويلة الرقبة لابسة نظارة دائرية.. قلت في سري يا صياد ما يبغالها تفكير رح للبنت وعطها ابتسامة وبتمشي أمورك ان شاء الله..وانا ناوي اذا لخموني بسؤال شاطح.. تلقائياً اسوي نفسي دايخ واخر صريعا مجندلا امام مكتب الهجرة أو اني أقوم بأداء رقصة السلسا او السامبا حتى ينبهروا فهم قوم يقتنعون بالإنبهار.. وقطع حبل أفكاري قول الموظف الأشهب نيكست بليز..
الموهم.. رحت للموظفة النحيلة وكانت تتبع لشعبة الفقاريات ومن فصيلة النساء اللاتي كيدهن عظيم..بهذلتني بكثر الأسئلة بس الحمد لله كله تمام..
وعند سير الشناط المكوكي .. كل البشرية خذوا شناطهم الا انا وعائلة تركية مليحة .. ندور..ندور ماعندك أحد.. وعندها جائني الخبر الصدمة "أعلن مصدر مسؤول بخدمات العفش: بعون من الله وتوفيقه تمكنت قوات مطار تورنتو ورجالها البواسل الموسومين بابطال الديجتال باعتقال شنطة سوداء اللون سوداء الكفرات (مفكك الطيس).. وذلك بعد كمين محكم قام به رجالنا وذلك لاحتوائها على خلطه مشبوهه تقتضي المصلحة عدم ذكر ماهيتها " انتهى الخبر..
طبعاُ شنطتي هذي دوخت كلابهم البوليسة لاحتوائها على قهوة باشنفر درجة أولى ممزوجه بالهيل الغواتيمالي والزعفران عالي الجودة وكذلك التمر السكري المجفف والمكنوز.. وبما اني ما كتبت _فهاوتاً_ في ورقتهم السقيمة التي وزعوها علينا في الطيارة أني اقتني بعض الطعام عشاني ما كنت مقتنع أن القهوة أكل وشرب يعني كنت معتبرها زي ما تقول مواد مسليه..قال موظف خدمات العفش عطنا عنوانك وبنرسلها لك بعد مده اقصاها 3 ايام الظاهر عشان يفتشون امها صح.. قلت اوكي..

وهذي صور بشكل عام لمطار تورنتو..

وغالب المحلات اللي في المطار يكون ما عليها ضرائب.. وبرضوه فيه حركه حلوه انهم يحطون أشكال هندسية بالورق ويحطونها في قزاز في الممرات .. والناس دايماً يتأملون في ذي الأوراق وحتى لو انهم فيهم النوم وماسكين الوسادة إذا شافوها طار عنهم النوم..
وفيه ناس اذا شفتاهم من بعيد تحسبهم يمشون بطة.. ولا انه معاق _الله لا يبلانا_...
بس اذا قربت عرفت انهم يصورون عيالهم(فلذات الأستباد) ... وفلذات الاكباد ساحبين عليهم...
وفيه مجسم نمر وكل المبزرة فاقين معه .. يتسدحون ويتشقلبون عليه.. وعلى فكره لقد تم اخفاء بعض الاجزاء الكاشطة للحياء (أكشط وأربح ض3 ) من الصورة..
بس بشكل عام الكنديين شعب محترم ومثقف ويعطيك جوك يعني تصلي في المطار ما عندك مشكلة .. بس عاد الويك اند لك عليهم شوي..
وعند الإستقبال اشوف كل الطلاب لهم ناس يستقبلونهم وكاتبين لهم اسمائهم على لافتات ويهنونهم بالوصول .. أدور اسمي في هاللافتات.. يمين.. يسار..ما عندك أحد.. يا ناس أنا دافع لواحد يستقبلني هناك :cry: ..
عندها أطلقت زفرة أسى وحزن:cry: ملء حويصلاتي الرئوية _بارك الله فيها_ و قلت في نفسي افا يا صياد من أولها ساحبين عليك كذا تدخل كندا على الناشف تسحب رجليك ولا احد يستقبلك ولا شي ..بس أبشركم ياحبايبي تراي ما أستسلمت رحت أستقبلت نفسي وعزمت نفسي على مشروب بارد مع بعض الدونات المحلاة بالشوكلاته ..
الموهم رحت خذلتي تاكسي على مدينة هاملتون وهي تبعد حوالي 50 كيلو متر عن تورنتو يعني زي ضرما عن الرياض..
و لقيت كنيسة مدري ليش حاطينها على الخط السريع.. ذكروني بمساجد خط الحجاز ولا الدمام (الله يشرف مساجدنا)
وهي مدينة حلوه جدا للي معهم سيارة لموقعها الجيوكيمودزنطاريوفيزيائي و الإستراتيجي (مسوي مثقف ض3 ) بين تورنتو وشلالات نياجرا والمدن المثناثرة على جنبات الطريق وكذلك هي حلوه للي يحبون الكشتات لكثرة الغابات والبحيرات اللي جنبها.. وكذلك لاحتوائها على اناسٍ غريبي الأطوار (سطول + زاحفين)..
وقبل ما أوصل للبيت المطلوب بلحظات كنت أتخيل أن اللي بيفتح لي الباب بنت حنطية اللون عيونها زرق وعمرها عشرين أو حاجة زي كذا..
إلا والله ويفتح الباب خال صغير_ بزر أسود كالليل_ .. وكلنا خوال في الإسلام ( ما يعرف يصرف ض3 ).. أنا جتني صدمه الله أعلم بها ولا زلت أعاني من هذه الصدمة:021: حتى هذه الساعة .. بس الحمد لله صرت غلطان وصار البيت اللي وراه .. طبعا كل بيوتهم تتشابه لانها مجمع سكني..
رحت للبيت المطلوب و شفت بزارين الحارة يلعبون وش زينهم... هادين لا ازعاج ولا شي
ويوم صرت انا و الباب وجهاً لوجه.. جا في مخي صوت طبول نفس طبول السيرك أو زي كذا..
وما وقف الصوت إلا يوم رنيت الجرس إلا ويفتح لي الباب ذاك الولد الأعطر الأحمر
صياد: هذا بيت مسزز بينزا ويلز؟
الولد : يا.. يو ار ويلكم مان ( مرحبا ومقربا)
صياد ( مسوي أخلاق): ممكن أدخل واذا فيه ازعاج ترى عادي ما أدخل
الولد : آب تو يو.. يو كان كوم ان ( لا يكثر وادخل )
المهم طلع البزر للدور الثاني يلعب بلاي ستيشن ..
وانا دخلت جوا.. وقابلتني عَرَضاً شغالتهم الطاعنة في السن _ العجوز السمراء_
الشغالة : هاي
صياد (معطيها بالخامس) : هاي ... همن دخلت الصالة وجلست أحتري أمهم تنزل من فوق .. أحتري..و احتري .. المهم جلست الشغالة في الصالة..
الشغالة: هذا اللي فتح لك الباب ولدي
صياد ( عيوني طلعت من محلها :sprint: ) : يعني أنتي مسزز بينزا ..انا ضاعت علومي لاني اول ما دخلت ساحب عليها ولا عطيتها وجه
ذي العجوز سبحان الله تشبه الممثلة الكويتيه العجوز الراحلة حياة الفهد ..
#
ويوم تأملت ان هذي اللي بعيش معها :1361: قامت انزيمات الكبد بالإرتفاع فأيقنت اني في حالة حومة تسبد شديدة .. وطبعا هي مطلقة و أصلها من المكسيك وزوجها بريطاني الأصل..
بس صراحة و الحق ينقال.. تراها محترمة وحبوبة وسوالفها غانمة.. عطتني السجادة_جايبتها من جيرانها المسلمين_ وعلمتني القبلة عشان الصلاة وقالت ارتح وبكرة ان شاء الله نشوفك وأي شي تبغاه من المطبخ ترى حلالك...قلت اوكي..
رقيت لغرفتي وصليت العصر و الظهر جمعاً وقصراً وبعدها ألقيت بنفسي على السرير ............وهي النومة.
ونشوفكم في الحلقة الثالثة (إستكشاف المدينة)...واعذرونا على القصور :heart: ...

وعليكم السلام
هلا والله اخوي... صياد بن سمك
والله الحمد لله انك شغلت النور هالسنه ولا كان رحت جزر واق واق
دمت بخير

موضوع ولا اروع
وانا بعد سجيلني متابع