1. بسم الله الرحمن الرحيم


2. الحلقة الأولى

بسم الله الرحمن الرحيم

الحلقة الأولى

احكي لكم في هالموضوع وقائع رحلتي الى كندا ( تورنتو ) بالتفاصيل الدقيقه .. مزوده بصور فيديو وفوتوغرافيه .. اول شي كان التخطيط على السفر قبل سنه ونص كنت ناوي اسافر لبريطانيا وما الله كتب .. والحمد لله كانت خيره لأني كنسلت سفرتي وصارت التفجيرات هناك ..
المهم بعدين فكرت اني اخلي السفره السنه الثانيه اللي هي الصيف اللي فات هذا .. واحترت بين كندا واستراليا وامريكا .. وبعد مشاكل الفيز حقت امريكا اللي سمعتها .. والتعصب الديني في استراليا .. ويوم قرأت كثير عن كندا .. شفت ان ولا دوله من اللي ذكرت تصفّ جنب كندا (( وكان شيء حقيقي لما رحت هناك وشفت بعيوني )) .. ماأطول علييكم
بديت في فتح الموضوع مع امي واني بسافر ادرس شهر (( انا ناوي ثلاث شهور بس لو قلت ثلاث شهور يمكن يجيها شيء لاسمح الله )) المهم قلت ابدأ على خفيف .. وقلت شهر وبرجع وكذا وكانت رافضه الفكره تماماً وهي من النوع اللي يؤمن ان اللي يسافر برا السعوديه يمسكونه ويودونه قوانتانامو (( اتوقع النوعيات هذي من الامهات كثيره )) ههه الله يحفظهم يارب ويخليهم لنا .. المهم وبعد محالات شتّى وخدمات جانبيه (( مشاوير + تميلح + نفعه )) اقتنعت ولله الحمد .. وطاح تقريباً 80% من الهم اللي كنت شايله .. باقي الحين وشلون اقنع الشايب ..
المهم وكّلت المهمّه لأمي .. ويوم من الايام بعد ماشفت الشايب في وضع جيّد لفتح الموضوع أعطيت امي اشاره عشان تفتح الموضوع على انها تسألني وين بروح الصيف هذا .. وانا اقول يمكن اروح ادرس .. ونشوف ردّة الفعل اذا كانت مشجّعه ولا محبطه .. ونفذنا الطريقه .. طبعاً الشايب سوّا نفسه ماسمع ولا كأن فيه ناس تكلم .. وانا طرطعت ماأدري هل هو موافق ولا لا .. تعرفون الحقران يقطّع المصران وفي ذاك اليوم كان أول مره ادري ان هالمثل موجود على ارض الواقع !!!!!!!!!!! ..
يوم ثاني سوينا نفس الطريقه .. ورد علي قال: السنه اللي راحت ماسافرات وكانت خيره وصارت المشاكل هناك .. والسنه هذي الله اعلم وش بيصير .. عشان كذا اقضب ارضك .. واغمز لأمي بحيث انها تدخّل وتحاول تبين انها ماعندها مانع وان الوضع عادي .. المهم وبعد نقاشات حادّه . اقتنع .. والحمد لله انتهى الموضوع بعد تقريباً شهر من المحاولات .. وبعدين بديت في الجد .. وديت اوراقي لمكتب الفيفا (( مجمّها من بدري )) وظبطت كل شي وارسلت الاوراق بدري وجاني شبه احباط يوم قالوا لي الفيفا ان اغلب الفيز يرفضونها .. وخليت اوراق احتياط عشان لو لاسمح الله رفضوا احول على استراليا دايركت